ილჰამ ალიევის ბიძაშვილი შეიძლება ბრიტანეთში დააკავონ

აზერბაიჯანის პრეზიდენტის, ილჰამ ალიევის ბიძაშვილი შეიძლება დიდ ბრიტანეთში დააკავონ.  

ბრიტანული გამოცემა Evening Standard-ის ცნობით, აზერბაიჯანელ ემიგრანტებს იზიათჰანუმ ჯავადოვასა და მის მეუღლეს, სულეიმან ჯავადოვს, რომლებიც ათ წელზე მეტია ლონდონში ცხოვრობენ, ბრიტანეთში მილიონობით ფუნტის ოდენობის „ბინძური ფულის“ შეტანას ედავებიან.

Mikaela Jav ანუ იზიათჰანუმ ჯავადოვა

იზიათჰანუმ ჯავადოვა – ჯალალ ალიევის ქალიშვილია – აზერბაიჯანის მოქმედი პრეზიდენტის აწ განსვენებული ბიძისა და პარლამენტის ყოფილი დეპუტატის, რომელსაც ოდესღაც დიდი პოლიტიკური ავტორიტეტი ჰქონდა ქვეყნის საზოგადოებრივ-პოლიტიკურ ცხოვრებაში.

მისი მეუღლე სულეიმან ჯავადოვი, თავის მხრივ, გიულმამედ ჯავადოვის შვილია, რომელიც ბოლო პერიოდამდე აზერბაიჯანის ენერგეტიკის მინისტრის მოადგილის პოსტს იკავებდა.

დაახლოებით 10 წლის წინ, იზიათჰანუმ ჯავადოვამ ლონდონში კომპანია Love the Underground Records-ი დააფუძნა და დიდი ბრიტანეთის დედაქალაქში, ასევე, ესპანურ საკურორტო კუნძულ იბიცაზე მუსიკალურ ღონისძიებებს მართავდა. ის ევროპაში ცნობილია, როგორც დიჯეი ფსევდონიმით Mikaela Jav. მიკაელა ჯავადოვების 22 წლის ქალიშვილია და იზიათჰანუმი თავის სასცენო სახელად ქალიშვილის სახელს იყენებს.

• აზერბაიჯანული ელიტის ფარული ქონება ჩეხეთში. რა გამოიძიეს ჩეხმა ჟურნალისტებმა
• აზერბაიჯანის ელჩის გაწვევის მიზეზი, შესაძლოა, საქართველოს გავლით სომხეთისთვის იარაღის მიწოდება გახდა

რაში ადანაშაულებენ ჯავადოვებს?

დიდი ბრიტანეთის დანაშაულთან ბრძოლის ეროვნული სააგენტო (NCA) იზიათჰანუმ ჯავადოვასა და მის მეუღლეს, სულეიმან ჯავადოვს ლონდონში, მათი ცხოვრების კორუფციის შედეგად მიღებული თანხებით დაფინანსებაში, ასევე, ქვეყანაში უკანონო გზით 14 მილიონი ფუნტის (დაახლოებით, 19.2 მილიონი დოლარის) შეტანაში ადანაშაულებს.

ამ საქმის გამოძიება უკვე რამდენიმე წელია გრძელდება და ამ დრომდე ბრიტანული პრესა მათ წარმოადგენდა, როგორც „ცოლ-ქმარს აზერბაიჯანიდან“ და არ ასახელებდა მათ სახელებს. ოჯახი ყველანაირ ბრალდებას უარყოფს და სასამართლოში სახელების გაუხმაურებლობას მიაღწია.

გაზეთი Evening Standart-ი უკვე თითქმის ორი წელია ბრალდებულების ვინაობის დასახელების უფლებისთვის იბრძვის. ბოლოს და ბოლოს, სასამართლომ მათ აზერბაიჯანელი ცოლ-ქმრის სახელების გასაჯაროების უფლება მისცა.

NCA ამტკიცებს, რომ მათ მილიონობით ფუნტი სტერლინგი ბრიტანულ ბანკებში „ბინძური გზით“ შეიტანეს და გაყალბებული ქვითრებით მალავდნენ შემოსავლის უკანონო წყაროებს. 

გაზეთი სასამართლო გარჩევის მასალებზე დაყრდნობით წერს, რომ ჯავადოვები რამდენიმე სასახლეს ფლობენ ლონდონში, ასევე, უძრავი ქონება აქვთ იბიცაზე: „ცნობილი ხდება, რომ მათ აქვთ ვილა ზღვის ხედით იბიცაზე და მდიდრული ბინა კუნძულის სხვა ნაწილში, ასევე უძრავი ქონების ფართო პორტფელი აზერბაიჯანში“.

მაგრამ NCA-მ სასამართლოში განაცხადა, რომ მათი აზრით, „შემოსავლის ნამდვილი წყარო არის კორუფციული და არანაირი კანონიერი შემოსავალი არ ემთხვევა იმ უზარმაზარ თანხას, რომელიც ლონდონში შეიტანეს“.

დოკუმენტში ასევე აღნიშნულია, რომ თანხა, რომელიც „არენდის საფასურის“ სახით გადაირიცხა (13.8 მილიონი ფუნტი [დაახლოებით 18.9 მლნ$] ექვსი წლისა და რვა თვის განმავლობაში), თითქმის ორჯერ მეტია ჯავადოვების მიერ გამოძიების მიმდინარეობისას მითითებულზე და ორჯერ აღემატება თანხას, რომელიც აღნიშნულია არენდის შესახებ დეკლარაციაში ბანკ Coutts-ში, რომლის გავლითაც გადარიცხვები ხორციელდებოდა.

სასამართლო მასალებში მითითებულია, რომ ფული, რომელიც ჯავადოვების ანგარიშებზე ირიცხებოდა, 21 „ბნელი“ კომპანიიდან მოდიოდა. ყველა მათგანი სეიშელისა და მარშალის კუნძულებზე არის დარეგისტრირებული და სხვადასხვა ადგილიდან იმართებოდა, ასევე, ესტონეთსა და ლატვიაში მდებარე ბანკებიდან.

მომავალ კვირას სასამართლო პროცესი დაიწყება, რომლის დროსაც, NCA-ს იმედი აქვს, რომ ყადაღას დაადებს ჯავადოვების 6.5 მილიონი ფუნტის (დაახლოებით 8.9 მლნ დოლარი) ოდენობის ანგარიშებს ისეთ ბანკებში, როგორებიცაა Coutts, Barclays, Lloyds, Metro Bank და Santander.

„დაუსაბუთებელი სიმდიდრის“ მფლობელებზე ნადირობის პირველი „მსხვერპლი“

შეგახსენებთ, სამი წლით ადრე NCA დაინტერესდა დიდ ბრიტანეთში ზამირა გაჯიევას მიერ „ბინძური ფულის“ შეტანით – აზერბაიჯანის საერთაშორისო ბანკის ყოფილი ხელმძღვანელის, ჯაჰანგირ გაჯიევის მეუღლის, რომელიც 2015 წელს აზერბაიჯანში განსაკუთრებით დიდი ოდენობის თანხების მითვისების ბრალდებით დააპატიმრეს.

ქალს განმარტება მოსთხოვეს ორ უძრავ ქონებასთან დაკავშირებით: ლონდონის რესპექტაბელურ რაიონში – ნაითბრიჯზე მდებარე სახლზე – რომლის ღირებულებაც 11.5 მილიონი ფუნტია (დაახლოებით 15.75 მილიონი დოლარი) და მიწის ნაკვეთზე ქალაქ ასკოტის მახლობლად, რომელიც 10.5 მილიონ ფუნტად (დაახლოებით 14.4 მილიონ დოლარად) შეიძინა.

2018 წლის ოქტომბერში, ზამირა გაჯიევა ლონდონში დააპატიმრეს, ერთი თვის შემდეგ კი 500 ათასი ფუნტის ოდენობის გირაოს სანაცვლოდ გაათავისუფლეს. მაგრამ სასამართლოს მიერ დადებული ყადაღა მის „საეჭვო წარმომავლობის“ ქონებაზე ჯერ ისევ ძალაშია.

• აზერბაიჯანელი ბანკირის ცოლი ლონდონში დააპატიმრეს
• აზერბაიჯანელი ჩინოვნიკის ცოლმა ლონდონის უნივერმაღში 16 მილიონი ფუნტი დახარჯა

ზამირა გაჯიევას დაპატიმრება აზერბაიჯანულ საზოგადოებაში ლოგიკურ შედეგად მიიღეს. იმიტომ რომ, ის იყო სახელმწიფო სახსრების მოპარვაში ბრალდებული ჯაჰანგირ გაჯიევის მეუღლე. ამასთან, 2016 წელს, აზერბაიჯანში, სისხლის სამართლის საქმე აღიძრა თავად ზამირა გაჯიევას წინააღმდეგ და სასამართლომ მას დაუსწრებლად შეუფარდა პატიმრობა. 2020 წელს, აზერბაიჯანის მთავრობამ ბრიტანეთის ხელისუფლებას გაჯიევას ექსტრადირების თხოვნით მიმართა, მაგრამ ბრიტანულმა სასამართლომ ამაზე უარი განაცხადა.

ახლა კი ბრიტანული სამართალდამცავი ორგანოების სამიზნეში ქვეყნის პრეზიდენტის ბიძაშვილი აღმოჩნდა. საზოგადოებას შექმნილ ვითარებაზე მმართველი ოჯახის რეაქცია აინტერესებს. ჯერჯერობით ხელისუფლების წარმომადგენლები ამ საკითხზე დუმან.

კომენტარები

პრეზიდენტის ბიძაშვილის შესაძლო დაპატიმრების თემა ხმაურიანი განხილვის საგნად იქცა სოციალური ქსელების აზერბაიჯანულ სეგმენტში. აი, რამდენიმე სახასიათო კომენტარი:

„ჯალალ ალიევის ქალიშვილი ინგლისში აზერბაიჯანში მოპარული ფულის გამო დააპატიმრეს. არ არის საჭირო, ჩავუღრმავდეთ გენეტიკურ მეცნიერებას. ასეთი უზარმაზარი ნიმუშებია ჩვენ თვალწინ. რაც მამა, ის ქალიშვილი“.

„ცუდი არაფერია იმაში, რომ ილჰამ ალიევის ბიძაშვილი DJ Mikaela ევროპაში დიჯეია. მაგრამ ის არასოდეს არ მოხვედრილა ყურადღების ცენტრში ამ თავისი პროფესიის გამო. მაგრამ ამ დღეებში ყურადღების ცენტრში აღმოჩნდა თავისი მდიდრული ცხოვრების, უზარმაზარი სახსრებისა და ქონების გამო, რომლის წარმომავლობის მითითებაც არ შეუძლია. ამასთან, ინგლისურმა სამართალდამცავმა ორგანოებმა მის წინააღმდეგ სისხლის სამართლის საქმე აღძრეს. ერთ მშვენიერ დღეს ყველას მოუწევს პასუხისგება იმისათვის, რაც ღარიბ ადამიანებს მოჰპარა“.

„დიდ ბრიტანეთში მილიონობით ფუნტის ღირებულების სიმდიდრე აღმოუჩინეს ზიათ ჯავადოვას (ფსევდონიმით DJ Mikaela Jav), აკადემიკოსის, მრავალგზის დეპუტატის, ჯალალ ალიევის ქალიშვილს. საინტერესოა, როდის დასრულდება ასეთი სამარცხვინო ახალი ამბები იმ დროს, როდესაც ათობით ათასი ოჯახი სიღარიბის ზღვარს მიღმა ცხოვრობს? დარწმუნებულები იყავით, რომ ასეთი ადამიანები ყველგან პატრიოტი მშობლების შვილებად არიან წარმოდგენილნი, რომლებსაც უყვართ თავისი სამშობლო. ვინ იცის, შეიძლება თქვან, რომ ეს ფული მათ ჩვენი არმიისთვის შეიარაღების შესაძენად შეაგროვეს.“