Azərbaycan prezidentinin əmisi qızı həbs oluna bilər
Azərbaycan prezidenti İlham Əliyevin əmisi qızı Böyük Britaniyada həbs oluna bilər.
Britaniyanın “Evening Standard” qəzetinin yazdığına görə, on ildən çoxdur ki Londonda yaşayan Azərbaycan əsilli İzzətxanım Cavadova və həyat yoldaşı Süleyman Cavadov Britaniyaya milyonlarla “çirkli pul” gətirməkdə ittiham olunurlar.
![Azərbaycan prezidentinin əmisi qızı həbs oluna bilər](https://jam-news.net/app/uploads/2021/07/mikaela-welcometoibiza4.jpg)
“Mikaela Jav” və ya İzzətxanım Cavadova
İzzətxanım Cavadova Azərbaycanın hazırkı prezidenti İlham Əliyevin mərhum əmisi, keçmiş millət vəkili, sağlığında ölkənin ictimai-siyasi həyatında böyük nüfuza sahib olan Cəlal Əliyevin qızıdır.
Onun həyat yoldaşı Süleyman Cavadov isə az əvvələ qədər energetika nazirinin müavini vəzifəsini tutan Gülməmməd Cavadovun oğludur.
İzzətxanım Cavadova Londonda təxminən 10 il əvvəl “Love the Underground Records” şirkətini yaradıb və Britaniyanın paytaxtında, İspaniyanın İbiza kurort adasında musiqi gecələri təşkil edib. O, Avropada “Mikaella Jav” adı ilə DJ kimi tanınır. Mikaela Cavadovların 22 yaşlı qızlarının adıdır və İzətxanım onun adını səhnə adı kimi istifadə edir.
- Azəbaycanlılar Çexiyada: parlayan hər şey demokratiya deyil
- Azərbaycan hökuməti GRECO-nun bəzi tövsiyələrini icra etməyib
- Serbiyadan Ermənistana silah, Azərbaycanın Gürcüstandakı səfirinin işdən çıxarılması – bunlar arasında nə əlaqə var?
Cavadovlar nədə ittiham olunurlar?
Britaniyanın Milli Cinayət Agentliyi (MCA) İzzətxanım Cavadovanı və onun əri Süleyman Cavadovu paytaxtdakı həyatlarını “korrupsiya yolu ilə əldə edilmiş vəsaitlə maliyyələşdirməkdə, ölkəyə qanunsuz yolla 14 milyon funt sterlinq (33 milyon manata yaxın) gətirməkdə” ittiham edir.
Bu təhqiqat bir neçə ildir ki, gedir və Britaniya mətbuatı indiyə qədər onları “adları açıqlanmayan Azərbaycan əsilli cütlük” kimi təqdim edirdi. Bütün ittihamları rədd edən cütlük məhkəmədən şəxsiyyətlərinin açıqlanmamasını tələb etmiş və buna nail olmuşdu.
“Evening Standart” qəzeti cütlüyün kimliyinin açıqlanması üçün iki ilə yaxın idi ki, məhkəmə mübarizəsi aparırdı. Nəhayət, məhkəmə onların şəxsiyyətinin açıqlanmasına icazə verib.
Milli Cinayət Agentliyi iddia edir ki, onlar milyonlarla funt sterlinqi Britaniya banklarına “çirkli yollarla” gətiriblər və gəlirin qanunsuz mənbəyi saxta qəbzlərlə gizlədilib.
Cavadovların Londonda bir neçə yerdə mülkü olduğunu yazan qəzet məhkəmə materiallarına istinadən əlavə edir ki, onların İbizada da daşınmaz əmlakı var: “Belə aydın olur ki, onların İbizada dəniz mənzərəli villası və adanın başqa yerində bahalı bir mənzili, o cümlədən Azərbaycanda geniş daşınmaz əmlak portfeli var”.
Amma Milli Cinayət Agentliyi məhkəməyə bildirib ki, “həqiqi mənbənin korrupsiya olduğunu və hər hansı bir həqiqi gəlirin Londona göndərilən böyük məbləğlə üst-üstə düşmədiyini” düşünür.
Sənəddə o da vurğulanır ki, “kirayə haqqı” kimi köçürülən vəsaitin məbləği (6 il 8 ay ərzində 13,8 milyon funt sterlinq) Cavadovların təhqiqatda dedikləri məbləğdən təxminən iki dəfə, köçürmə əməliyyatlarının aparıldığı “Coutts” bankına bəyan etdikləri kirayə dövriyyəsindən iki dəfə çoxdur.
Məhkəmə sənədlərində Cavadovların hesablarına göndərilən pulların Seyşel və Marşal adalarından tutmuş, Potters Barda və Ayd-adan idarə olunan 21 “qaranlıq” şirkətdən, Estoniya və Latviyadakı banklardan gəldiyi iddia olunur.
Milli Cinayət Agentliyinin Cavadovların Coutts, Barclays, Lloyds, Metro Bank and Santander banklarında təxminən 6,5 milyon funt sterlinq olan hesablarına həbs qoyulması iddiası ilə bağlı məhkəmə iclası isə gələn həftə başlayacaq.
![](https://jam-news.net/app/uploads/2021/07/Suleyman-Graveside-Commemoration.width-1024.jpg)
“İzaholunmaz varidat” sahiblərinə qarşı ovun ilk “qurbanı”
Xatırladaq ki, 3 il əvvəl Böyük Britaniyanın Milli Cinayət Agentliyi Azərbaycanın Beynəlxalq Bankının keçmiş rəhbəri, 2015-ci ildən külli miqdarda mənimsəmə ittihamı ilə Azərbaycanda həbsdə olan Cahangir Hacıyevin həyat yoldaşı Zamirə Hacıyevanın ölkəyə gətirdiyi “çirkli pullarla” maraqlanmışdı.
Qadından iki daşınmaz əmlak – Londonun nüfuzlu Naytsbric rayonundakı 11,5 milyon funtluq ev və Askot şəhərinin yaxınlığında yerləşən, 10,5 milyon funta alınmış torpaq sahəsi barədə izahat tələb olunmuşdu. Hacıyeva gəlir mənbəyinin qanuniliyini sübut edə bilməmişdi.
2018-ci ilin oktyabrında Londonda həbs edilən Zamirə Hacıyeva həmin ilin noyabrında 500 min funt sterlinq müqabilində zaminə buraxılıb. Amma məhkəmə tərəfindən “mənbəyi şübhəli” olan bütün əmlakına qoyulan həbs qərarı hələ də qüvvədədir.
- Zamirə Hacıyevanın işi: Böyük Britaniya “izaholunmaz varidatı” olan əcnəbilərə qarşı ova başlayıb
- Azərbaycanlı bankirin həyat yoldaşı Londonda həbs edilib
- Britaniya keçmiş azərbaycanlı məmurun həyat yoldaşının pullarının mənbəyi ilə maraqlanır
Zamirə Hacıyevanın Londonda həbs olunmasını Azərbaycan cəmiyyəti məntiqi nəticə kimi qəbul edilmişdi. Çünki o, Azərbaycan hakimiyyətinin üzərindən xətt çəkdiyi, üstəlik oğurluqda ittiham edərək həbs etdiyi Cahangir Hacıyevin həyat yoldaşı idi. Üstəlik, elə onun özünə qarşı da Azərbaycanda hələ 2016-cı ildə cinayət işi qaldırılıb və həbsi haqda məhkəmə qərarı çıxarılıb. 2020-ci ildə Azərbaycan hökuməti Z.Hacıyevanın ölkəyə ekstradisiyası ilə bağlı Britaniyaya müraciət etmiş, amma rədd cavabı almışdı.
Hazırda isə ölkə prezidentinin doğma əmisi qızı Britaniyanın hüquq-mühafizə orqanlarının hədəfindədir. Bu vəziyyətə hakim ailənin reaksiyasının necə olacağı cəmiyyət üçün maraqlıdır. Hərçənd, hakimiyyət nüməyəndələri hələ ki, susqunluqlarını qoruyurlar.
Şərhlər
Sosial şəbəkələrdə isə qızğın müzakirələr gedir. Bəzi şərhləri diqqətinizə çatdırırıq:
“Cəlal Əliyevin qızı İngiltərədə Azərbaycandan oğurladıgı pullara görə yaxalanıb. Genetika elmini çox da dərin oxumağa ehtiyac yoxdur. Bu boyda nümunələr gözümüzün önündə varkən. Atası necə, balası da elə”.
“İlham Əliyevin əmisi qızı Dj Mikaelanın uzun illər Avropada DJ -lik etməsində heç bir qəbahət yoxdur. Amma o, heç vaxt bu sənəti ilə diqqət mərkəzinə düşməyib. İngiltərədə yaşayan Mikaela bu günlərdə dəbdəbəli həyat tərzi, mənbəyini göstərə bilmədiyi külli miqdarda vəsait və mülklə diqqət mərkəzinə düşüb. Həm də İngiltərə hüquq-mühafizə orqanları ona qarşı cinayət işi açıb. Qara camaatdan oğurlananlar bir gün hər kəsin burnundan gələcək”.
“İlham Əliyevin əmisi, dəfələrlə deputat təyin olunan, akademik Cəlal Əliyevin qızı İzzət Cavadovanın (təxəllüsü DJ Mikaela Cav) Böyük Britaniyada milyonlarla funt sterlinq sərvəti ortaya çıxıb. Görəsən, on minlərlə ailənin yoxsulluq içərisində yaşadığı halda, ölkəmiz haqqında bu cür biabırçı xəbərlərin nə vaxtsa sonu olacaq? Əmin ola bilərsiniz ki, belə insanlar hər yerdə vətənpərvər valideynlərin vətənini çox sevən övladları kimi tanınır və təqdim olunur. Kim bilir, bəlkə də deyəcəklər ki, orduya silah-zad almaq üçün yığırmışlar bu pulları”.