ავღანეთში მყოფ კიდევ 10 ქართველ სამხედროს კორონავირუსი დაუდასტურდა
ავღანეთში, ნატო-ს „მტკიცე მხარდაჭერის მისიაში“ მყოფ კიდევ 10 ქართველ სამხედრო მოსამსახურეს covid-19 დაუდგინდა. ისინი გერმანიის საჰაერო ძალების სამხედრო თვითმფრინავის სპეციალური რეისით საქართველოში დღეს ჩამოიყვანეს. ჯარისკაცები მკურნალობას თავდაცვის სამინისტროს სამხედრო ჰოსპიტალში გააგრძელებენ.
გორის სამხედრო ჰოსპიტალში გადაიყვანეს სამკურნალოდ ის 28 ინფიცირებული სამხედროც, რომლებიც ავღანეთიდან საქართველოში 10 ივლისს ჩამოიყვანეს. თავდაცვის სამინისტროს ინფორმაციით, მათგან 8 უკვე გამოჯანმრთელდა და სამედიცინო დაწესებულება დატოვა. დანარჩენი სამხედროების ჯანმრთელობის მდგომარეობა დამაკმაყოფილებელია და დაავადება გართულებების გარეშე მიმდინარეობს.
- საქართველო საზღვრებს ხსნის ევროკავშირის ხუთი ქვეყნისთვის. ოღონდ ფრენები არ არის
- “გამარჯობა, თქვენ დაწერეთ სტატუსი კორონავირუსზე?”- სუს-ი ფეისბუკ-პოსტების გამო პოლიტიკოსებს და ჟურნალისტებს იბარებს
როგორც თავდაცვის სამინისტროში აცხადებენ, ინფიცირების წყარო წინა შემთხვევის მსგავსად იგივე კლასტერს – ადგილობრივ ავღანელ პერსონალს უკავშირდება.
“ავღანეთში დარჩენილი ქართული კონტინგენტის ნაწილი, რომელიც როტაციის წესით საქართველოში რამდენიმე კვირაში დაბრუნდება, დადგენილი წესის შესაბამისად 2-კვირიან კარანტინს გაივლის,” – აცხადებენ თავდაცვის სამინისტროში.
