აზერბაიჯანში ორი ვაქცინის კომბინაციის გამოცდას მოხალისეებზე იწყებენ
ერთ-ერთმა აზერბაიჯანულმა სამედიცინო დაწესებულებამ მოხალისეები მიიწვია კორონავირუსის საწინააღმდეგო ორი ცნობილი ვაქცინის კომბინაციის გამოსაცდელად. მათი თქმით, კვლევაში მონაწილეთა რისკები დაზღვეული იქნება.
ორი ვაქცინის კომბინაცია
გავრცელებული ინფორმაციით, კვლევის მონაწილეებს უკვე ცნობილი ორი ვაქცინის კომბინაციას გაუკეთებენ – რუსული Sputnik V-ისა და დიდი ბრიტანეთისა და შვედეთის ერთობლივი წარმოების R-COVI-ის.
აზერბაიჯანში კვლევა 2020 წლის დეკემბერში გაფორმებული ხელშეკრულების ფარგლებში ჩატარდება, რომელსაც ხელი მოაწერეს აზერბაიჯანულმა კომპანია R-Pharm-ამ, კომპანია AstraZeneca-მ, რუსულმა გამალეის სახელობის ეროვნულმა კვლევითმა ინსტიტუტმა და რუსულმა პირდაპირი ინვესტიციების ფონდმა.
კვლევაში მონაწილეობის მიღება შეუძლიათ 18 წელზე უფროსი ასაკის მოხალისეებს. ტესტების დაწყებამდე, კვლევაში მონაწილეები აუცილებელ დიაგნოსტიკურ პროცედურებს ჩაიტარებენ. პაციენტებს ნებისმიერ ეტაპზე შეუძლიათ უარი თქვან პროგრამაში მონაწილეობაზე. აღსანიშნავია, რომ ყველა რისკი, რომელიც კვლევასთან არის დაკავშირებული, დაზღვეული იქნება.
განცხადება დღეს გამოქვეყნდა, მაგრამ JAMnews-ის თანამშრომლების ყველა მცდელობის მიუხედავად, დაკავშირებოდნენ კვლევის ორგანიზატორებს მათ მიერვე გამოქვეყნებულ ტელეფონის ნომერზე, უშედეგოდ დასრულდა – ზარს არავინ უპასუხა. გაუგებარია, რა რისკებზეა საუბარი და როგორ იქნება ის დაზღვეული.
როგორ მიმდინარეობს ვაქცინაცია ქვეყანაში
ახლა, აზერბაიჯანში, ვაქცინაციისთვის ჩინური წარმოების Sinovac-ის ვაქცინა გამოიყენება. 40 წელზე უფროსი ასაკის ყველა მოქალაქეს შეუძლია ონლაინ-რეგისტრაცია გაიაროს და კორონავირუსის წინააღმდეგ აიცრას.
ამ დრომდე, მთელი ქვეყნის მასშტაბით, ვაქცინის პირველი დოზა, დაახლოებით, 600 ათასმა ადამიანმა გაიკეთა, მათგან, დაახლოებით, 360 ათასი მეორე დოზითაც აიცრა.
კიდევ ორი ტიპის ვაქცინა
COVAX პლატფორმის ხაზით, 4 აპრილს, აზერბაიჯანში, სამხრეთ კორეიდან Vaxzevria-ს (AstraZeneca-ს ვაქცინის ახალი სახელწოდება) 84 ათასი დოზა ჩაიტანეს, ვაქცინაციის პროცესში გამოსაყენებლად.
![](https://jam-news.net/app/uploads/2021/04/trend_silkway_010421_32.jpg)
მაისის ბოლომდე, ქვეყანაში, შვედურ-ბრიტანული ერთობლივი წარმოების Vaxzevria-ს ვაქცინის 432 ათასი დოზის შეტანა იგეგმება.
ამავდროულად, უახლოესი რვა კვირის განმავლობაში, აზერბაიჯანში, Pfizer-BioNTech-ის ვაქცინის 218 790 დოზას ჩაიტანენ.
ჯერჯერობით უცნობია, როგორ გამოიყენებენ ამ ვაქცინებს, უკვე დანერგილი ჩინური ვაქცინის პარალელურად.
ინფიცირების მაჩვენებელი მატულობს
ვაქცინაციის პროცესის მიმდინარეობის მიუხედავად, აზერბაიჯანში, კორონავირუსის პანდემიის მესამე ტალღა დაიწყო და ინფიცირების დღიური მაჩვენებელი უკვე 2000 შემთხვევას აჭარბებს.
ამის გამო, ბაქოსა და ქვეყნის რამდენიმე სხვა დიდ ქალაქში ჩაიკეტა საშუალო სკოლები. ამავდროულად, მუშაობას აგრძელებენ საბავშვო ბაღები.