ქართული arrow icon
დაგვიჭირეთ მხარი
დაგვიჭირეთ მხარი
ქართული arrow icon
messenger vk-black email copy print
არქივი-

ნემცოვის პატივსაცემად გამართული მარშის დასრულების შემდეგ მისი მკვლელობის ადგილზე ექვსი აქტივისტი დააკავეს

messenger vk-black email copy print
27 თებერვლის ღამეს მოსკოვის პოლიციამ ბოლშოი ზამოსკვორეცკის ხიდზე, ბორის ნემცოვის “სახალხო მემორიალის” მახლობლად, ექვსი ადამიანი დააკავა. მემორიალის დასაცავად ხიდზე აქტივისტები მორიგეობდნენ. მოგვიანებით დაკავებულები გაათავისუფლეს.
დაკავებამდე მემორიალს პოლიციის ოთხი ავტომანქანა მიუახლოვდა. სამართალდამცავების ავტომობილებს “გორმოსტის” შვიდი მანქანა მიჰყვა. კეთილმოწყობის სამსახურის თანამშრომლებმა მემორიალის ტერიტორიიდან ყველა ყვავილი და პორტრეტი გაიტანეს. “რადიო თავისუფლების” მიერ გავრცელებული ინფორმაციით, ხიდზე ჯერ ხუთი აქტივისტი დააკავეს, ერთი საათის შემდეგ კი კიდევ ერთი დემონსტრანტი დააპატიმრეს.
გუშინ მოსკოვში ოპოზიციონერი პოლიტიკოსის, ბორის ნემცოვის პატივსაცემად სამახსოვრო მარში გაიმართა. იგი ორი წლის წინ კრემლის მახლობლად, ხიდ ზამოსკვორეცკიზე მოკლეს.  მსვლელობა სტრასტნი ბულვარიდან დაიწყო და სახაროვის პროსპექტზე დასრულდა. ოპოზიციის გამოთვლებით, სამგლოვიარო მარშში მონაწილეობის მისაღებად 15 ათასზე ოდნავ მეტი მოქალაქე შეიკრიბა. მოსკოვის პოლიციის მონაცემებით, აქციაში დაახლოებით ხუთი ათასი ადამიანი  მონაწილეობდა.
 
ბორის ნემცოვის მკვლელობასთან დაკავშირებით ჩეჩნური წარმოშობის ხუთი ადამიანი დააკავეს. ერთი ეჭვმიტანილი, ბესლან შავანოვი, დაკავების დროს დაიღუპა.  ბრალდებულები თავს დამნაშავედ არ ცნობენ, თუმცა გარკვეული პერიოდის წინ ზოგიერთმა მათგანმა ამ საქმესთან დაკავშირებით გამოძიებას აღიარებითი ჩვენება მისცა. ბორის ნემცოვის მკვლელობასთან დაკავშირებული სასამართლო პროცესი მოსკოვის საოლქო სამხედრო სასამართლოში 2016 წლის ოქტომბრიდან მიმდინარეობს, გამოძიება მკვლელობის დამკვეთად ჩეჩნურ ბატალიონ “სევერის” წევრ რუსლან მუხუტდინოვს მიიჩნევს, რომელიც ამჟამად საზღვარგარეთ იმალება. ნემცოვის მომხრეებს მიაჩნიათ, რომ ბრალი მხოლოდ მკვლელობის შემსრულებლებს წაუყენეს, დანაშაულის ორგანიზატორების წინააღმდეგ კი დევნა არ ხორციელდება.

პოპულარული

ახალი ამბები

მოსაზრება