მოსაზრება: შესაძლებელია, რომ ტრამპმა გადმორეკოს, მაგრამ ეს ზარი შედგება მხოლოდ ბიძინა ივანიშვილთან
ვალერი ჩეჩელაშვილის მოსაზრება
მე ვფიქრობ, სრულიად შესაძლებელია, რომ ამერიკის პრეზიდენტმა საქართველოში გადმორეკოს, მაგრამ ეს ზარი შედგება მხოლოდ ბიძინა ივანიშვილთან და არა იმ წერილების ავტორებთან, რომელსაც ჩვენ გავეცანით – ამის შესახებ საქართველოს სტრატეგიული ანალიზის ცენტრის გეოპოლიტიკური კვლევების ცენტრის ხელმძღვანელმა, ვალერი ჩეჩელაშვილმა განაცხადა.
მისივე თქმით, საჭიროა ქმედებები, რომელიც აშშ-ს დაუდასტურებს, რომ “ქართული ოცნება“ მზადაა სერიოზული კომპრომისებისთვის, როგორც შიდა პოლიტიკურ ველზე, ასევე საერთაშორისო ურთიერთობებში.
“ქართული ოცნების” პრეზიდენტმა მიხეილ ყაველაშვილმა გაეროს გენერალურ ასამბლეის მე-80 სესიაზე სიტყვით გამოსვლისას განაცხადა, რომ ქართველი ხალხი არ შეეგუება ულტიმატუმების, შანტაჟისა და დაშინების ენით საუბარს. მისივე თქმით, საქართველო ღიაა ნებისმიერი დიალოგისა და თანამშრომლობისთვის, მაგრამ “ვითხოვთ” პატივისცემას, სამართლიან და ღირსეულ დამოკიდებულებას.
აღსანიშნავია, რომ მიხეილ ყაველაშვილს თავის გამოსვლაში “რუსეთი” საერთოდ არ უხსენებია. მან მხოლოდ ერთხელ ახსენა “ოკუპაცია”, ოღონდ რომელი ქვეყნის მიერაა საქართველო ოკუპირებული, ყაველაშვილს არ დაუკონკრეტებია.
ვალერი ჩეჩელაშვილი: “მე ვფიქრობ, სრულიად შესაძლებელია, რომ ამერიკის პრეზიდენტმა საქართველოში გადმორეკოს, მაგრამ დარწმუნებული ვარ, იმ წერილების ავტორებთან არ გადმორეკავს, რომელსაც ჩვენ გავეცანით. ვფიქრობ, თუ ეს ზარი შედგება, შედგება მხოლოდ ბიძინა ივანიშვილთან. რატომ გადმორეკავს?! იმიტომ რომ, თუ ლუკაშენკოსთან რეკავს, რატომ არ უნდა დარეკოს საქართველოში?! ალბათ, პირველი მოთხოვნა იქნება პოლიტიკური პატიმრების გათავისუფლება და ამას მოჰყვება ის კარგად ჩამოყალიბებული “მესიჯბოქსი“, რომელიც ამერიკის შეერთებულმა შტატებმა ერთხელ გააჟღერა, მათ შორის, ბოლო შეხვედრაზე, რომელიც ყოფილმა ელჩმა მაკა ბოჭორიშვილთან გამართა. მე ვფიქრობ, პოლიტიკურ პატიმრებთან ერთად იქნება კიდევ ორი თემა – კანონები და არჩევნები.
კატეგორიულად არ ვეთანხმები თეზისს, რომ ჩვენ ახალი ფურცლიდან უნდა დავიწყოთ ურთიერთობები, ვინაიდან ჩვენ გვქონდა ძალიან კარგად ჩამოყალიბებული ურთიერთობების სტრუქტურა, სტრატეგიული თანამშრომლობის ქარტიის საფუძველზე. ჩვენ ვმოქმედებდით ამ თავებიდან გამომდინარე და წელიწადში ერთხელ ეწყობოდა პლენარული სხდომა საგარეო საქმეთა მინისტრის დონეზე. იქიდან ამას ხელმძღვანელობდა სახელმწიფო მდივანი. თანამშრომლობის განვითარების დონეს ეძლეოდა პოლიტიკური შეფასება და იგეგმებოდა შემდგომი ნაბიჯები.
მე ვფიქრობ, ეს გამოცდილება წყალში გადასაყრელი სრულიადაც არ არის, ისევე როგორც ის მრავალმილიარდიანი დახმარება, უნდა იყოს დაფასებული. როგორც მინიმუმ, უმადურობაა აშშ-ის მიმართ საუბარი იმაზე, რომ ჩვენ სუფთა ფურცლიდან უნდა დავიწყოთ ურთიერთობები, მაგრამ იმისთვის, რომ ჩვენ განვაახლოთ და აღვადგინოთ ურთიერთობები საჭიროა, არა განცხადებები, არამედ ქმედებები. ვფიქრობ, “ქართულ ოცნებაში“ კარგად იციან, რომ მხოლოდ შიშველი განცხადებებით და მოწოდებებით ამის გამოსწორება ვერ მოხერხდება. საჭიროა ქმედებები, რომელიც აშშ-ს დაუდასტურებს, რომ „ქართული ოცნება“ მზადაა სერიოზული კომპრომისებისთვის, როგორც შიდა პოლიტიკურ ველზე, ასევე საერთაშორისო ურთიერთობებში.
ძალიან კარგია, რომ ყაველაშვილმა თავი აარიდა საერთაშორისო არენაზე “გლობალური ომის პარტიისა“ და “დიფ სთეითის“ გაჟღერებას. არ ვიცი ურჩიეს თუ თვითონ გადაწყვიტა, მაგრამ ყოველ შემთხვევაში, კარგი გადაწყვეტილება იყო. კარგია, რომ ის გამოვიდა ქართულად. ეს სრულიად ნორმალურია, მიღებული პრაქტიკაა. ისეთი შთაბეჭდილება შემექმნა, რომ მისთვის ყურადღებით რომ ესმინათ გაიანას ან ბოლივიის დიპლომატებს, რომლებიც საქართველოში არსებულ პრობლემებს არ იცნობენ, იფიქრებდნენ, რომ ეს წარმატებული და სტაბილურად მდგარი ქვეყანაა.
სიმწვავე აკლდა და სამართლის აღიარებითი ნაწილი. თუ რეალობას შენ არ უსწორებ თვალს, შესაბამისად, ვერ დაინახავ არსებული პრობლემების გადაჭრის გზებსაც. ყველაზე მაღალი ტრიბუნიდან გამოსვლისას ძალიან მნიშვნელოვანია, რომ შენ იმ აუდიტორიას დაამახსოვრო საკუთარი თავი და ქვეყანა, რაღაც წინადადებით, რომელიც იქნება გამორჩეული და საინტერესო. ახლა ვერაფრით დაამახსოვრდებოდა [მიხეილ ყაველაშვილი თავს აუდიტორიას]. ეს იყო სავსებით გაწონასწორებული, კარგად ჩამოყალიბებული გამოსვლა.”
