2015-2020 წლებში ხელისუფლებამ ლობისტურ კომპანიებს 5 მლნ დოლარი გადაუხადა
ბოლო 5 წელიწადში ლობისტური მომსახურებისთვის საქართველოს ბიუჯეტიდან 5 მილიონ დოლარზე მეტი დაიხარჯა. აქედან 3 485 515 აშშ დოლარი საქართველოს მთავრობამ გადაიხადა, 1 660 469 აშშ დოლარი კი ეკონომიკის სამინისტრომ. პოლიტიკური პარტიებიდან აშშ-ში ლობისტური მომსახურებისთვის ფულს მხოლოდ „ერთიანი ნაციონალური მოძრაობა“ და „ქართული ოცნება“ ხარჯავს – ბოლო 5 წელში ამ ორმა კომპანიამ ლობისტებს ჯამში 500 000 აშშ დოლარზე მეტი გადაუხადა. მონაცემებს ინფორმაციის თავისუფლების განვითარების ინსტიტუტი (IDFI) აქვეყნებს.
2015-2020 წლებში საქართველოს მთავრობა 5 ამერიკულ ლობისტურ კომპანიასთან თანამშრომლობდა და ჯამში 3 485 515 აშშ დოლარი გადაიხადა.
Chartwell Strategy Group-თან 2019 წლის 25 იანვარს გაფორმებული ხელშეკრულების თანახმად, ლობისტურ კომპანიას საქართველოს მთავრობისთვის უნდა გაეწია შემდეგი სახის მომსახურება:
● აშშ-ს წამყვან ჯგუფებთან ურთიერთობების გაღრმავება, მათ შორის, თეთრ სახლთან და სახელმწიფო და თავდაცვის დეპარტამენტთან;
● სტრატეგიული რჩევების მიწოდება საქართველო-ნატოს ურთიერთობების გაღრმავების, აშშ-დან საგარეო უსაფრთხოების სფეროში დახმარების მიღების საკითხებზე;
● აშშ-ს ადმინისტრაციის ოფიციალური პირების ჩართვა საქართველოში მეტი პირდაპირი უცხოური ინვესტიციების მოზიდვის მიზნით, ორმხრივი სავაჭრო ურთიერთობების გაფართოებაში დახმარება;
● მთავრობის მეთაურის საკომუნიკაციო მხარდაჭერა ყველა მნიშვნელოვან საერთაშორისო ღონისძიებაზე;
● რჩევების მიცემა მთავრობის ადმინისტრაციის კომუნიკაციების გუნდისთვის მედიასთან ურთიერთობის საკითხებზე;
● მედია სტრატეგიის მომზადება და აშშ-ს წამყვან მედია საშუალებებთან კომუნიკაცია.
● აღსანიშნავია, რომ საქართველოს მთავრობის ადმინისტრაციას ამ საკონსულტაციო მომსახურების შესყიდვისთვის საჭირო თანხა – 491 668 აშშ დოლარის ეკვივალენტი ლარი მთავრობის სარეზერვო ფონდიდან გამოეყო.
● საქართველოს ეკონომიკისა და მდგრადი განვითარების სამინისტრომ 2019 წლის 17 დეკემბერს ლობისტურ კომპანია Hill and Knowlton Strategies-ს 1 660 469 აშშ დოლარი გადაუხადა.
● სს „საქართველოს ნავთობისა და გაზის კორპორაციამ“ ლობისტურ საქმიანობასა და იურიდიულ მომსახურებაში ჯამში 6 261 755 აშშ დოლარი გადაიხადა. თანხის რა ნაწილი დაიხარჯა უშუალოდ ლობისტურ საქმიანობაზე, ცნობილი არ არის.
ამავე პერიოდში პოლიტიკურმა პარტიებმა ლობისტური მომსახურებისთვის ჯამში ნახევარ მილიონ აშშ დოლარზე მეტი გადაიხადეს.
- საქართველოში პოლიტიკა ბრუნდება. ისტორიული საარჩევნო შეთანხმება შეიძლება ჩაიშალოს
- ყვარლის ედემმა “ოცნებისთვის” 65 000 ლარის შეწირვიდან რამდენიმე დღეში 277 300-ლარიანი კონტრაქტი მიიღო
აშშ-ში ლობისტურ მომსახურებას საქართველოს პოლიტიკური პარტიებიდან მხოლოდ „ერთიანი ნაციონალური მოძრაობა“ და „ქართული ოცნება“ იღებს.
● 2016 წლის საპარლამენტო არჩევნებამდე, „ქართულმა ოცნებამ“ ლობისტური მომსახურების გასაწევად დაიქირავა კომპანია – Impact Management Group, რომელსაც 320 000 აშშ დოლარი გადაუხადა.
● 2020 წელს, საპარლამენტო არჩევნების მოახლოებასთან ერთად, „ქართულმა ოცნებამ“ კიდევ ორი ხელშეკრულება გააფორმა Hogan Lovells US LLP-სთან და DCI Group AZ, L.L.C.-სთან. „ქართულმა ოცნებამ“ ორივე კომპანიას ჯამში ერთ მილიონ აშშ დოლარზე მეტი უნდა გადაუხადოს. ამ დროისთვის „ქართულ ოცნებას“ ორივე კომპანიისთვის 141 666 აშშ დოლარი აქვს გადახდილი.
● „ქართული ოცნების“ მიერ ლობისტურ კომპანიებთან დადებული ხელშეკრულებები 2012, 2016 და 2020 წლებით თარიღდება, რაც წინასაარჩევნო პერიოდს ემთხვევა.
● 2015-2020 წლებში „ერთიანმა ნაციონალურმა მოძრაობამ“ 2 ლობისტურ კომპანიასთან გააფორმა ხელშეკრულება. ბოლოს გაფორმებული ხელშეკრულების თანახმად, „ერთიანი ნაციონალური მოძრაობა“ საკონსულტაციო მომსახურებისთვის 250 000 აშშ დოლარს იხდის.
„აშშ-ს კანონმდებლობა საშუალებას გვაძლევს მივიღოთ ზემოაღნიშნული ინფორმაცია. აშშ-ში მოქმედი ლობისტური კომპანიების მიერ გაფორმებული ხელშეკრულებების პირობები და მათ საფუძველზე მიღებული თანხები საჯაროა – ინფორმაცია ატვირთულია აშშ-ს იუსტიციის სამინისტროს მონაცემთა ელექტრონულ ბაზაში. სამწუხაროდ, საქართველოში ამ ინფორმაციის ხელმისაწვდომობა უზრუნველყოფილი არ არის“, – ნათქვამია IDFI-ის განცხადებაში.
