სომხეთი ირანსა და ევრაზიის კავშირის ქვეყნებს შორის ტრანზიტული ქვეყანა გახდება
ევრაზიის ეკონომიკურმა კავშირმა და ირანმა ხელი მოაწერეს თავისუფალი ვაჭრობის ზონის შექმნის შესახებ ხელშეკრულებას. ევრაზიის ეკონომიკურ კავშირსა და ირანს შორის მოლაპარაკებები სომხეთის ინიციატივით დაიწყო. ოფიციალურ ერევანს ორგანიზაციის წევრ ქვეყნებთან სახმელეთო საზღვარი არ გააჩნია და ხელისუფლების თქმით, ირანთან თანამშრომლობა სომხეთის ეკონომიკის განვითარებისთვის დიდ შესაძლებლობებს შექმნის.
პრემიერ-მინისტრმა ნიკოლ პაშინიანმა განაცხადა, რომ ეს დოკუმენტი სომხეთის ინტერესებს სრულიად შეესაბამება.
ექსპერტები აღნიშნავენ, რომ სომხეთი ირანისა და ევრაზიის კავშირის სხვა ქვეყნებისთვის, კერძოდ რუსეთისთვის, სატრანზიტო ტერიტორიად იქცევა. ასევე სომხეთისთვის გაიხსნება ირანის ბაზარი, და სომეხი მეწარმეები თავისუფლად შეძლებენ იქ თავიანთი საქონლის გატანას.
ირანისტი არმან ვარდანიანის თქმით, რამდენიმე ასეული დასახელების საქონელზე საბაჟო გადასახადები გაუქმდება:
„ირანი, ადგილობრივი წარმოების დაცვის მიზნით, აქამდე პროტექციონიზმის ეკონომიკურ პოლიტიკას ატარებდა: იმპორტირებულ საქონელზე დაწესებული იყო მაღალი საბაჟო გადასახადები, რის შედეგადაც სომხური საქონელი ირანის ბაზარზე ვერ შეჰქონდათ, და ის კონკურენციას ვერ უძლებდა“.
ექსპერტმა განმარტა, რომ საბაჟო გადასახადების გამო, სომხური საქონელი ირანულ ბაზარზე ძვირად ფასობდა, ხოლო საბაჟო გადასახადის გაუქმების შემდეგ გაიაფდება და უფრო კონკურენტუნარიანი გახდება.
ჯერჯერობით უცნობია, თუ რამდენი სახეობის საქონელს შეიტანენ ირანში საბაჟო გადასახადის გარეშე, და რა საქონელი იქნება ეს. როდესაც შეთანხმება გასაჯაროვდება, საქონლის შესახებ უფრო კონკრეტულად შევძლებთ ლაპარაკს“, – თქვა არმან ვარდანიანმა.
