სომეხმა მევენახეებმა გზა გადაკეტეს და შესასყიდი ფასის გაზრდას ითხოვენ
სომხეთმა და საქართველომ რკინიგზის საშუალებით მარცვლეულის გადატანის 52%-ით გაიაფებაზე მოილაპარაკეს. ტრანზიტის ფასის დაკლება ძალაში 1 სექტემბრიდან შევიდა. ამის შესახებ სომხეთის ტრანსპორტის, კავშირგაბმულობისა და საინფორმაციო ტექნოლოგიების მინისტრმა აშოტ აკოპიანმა განაცხადა.
ეს სომხეთისთვის ძალიან მნიშვნელოვანია, რადგან 15 სექტემბრიდან საქართველოში ავტოსაგზაო საშუალებით ხორბლისა და ჭვავის ფქვილის შეტანა და გატანა იკრძალება. და ეს გადაწყვეტილება ყველა ქვეყანაზე გავრცელდება. ამასთან დაკავშირებით სომხეთში ბევრი შიშობდა, რომ ეს პურის გაძვირებას გამოიწვევდა. ქვეყნებს შორის ახალი მოლაპარაკებით კი ეს პრობლემა უნდა გადაიჭრას.
აშოტ აკოპიანმა განაცხადა, რომ ეს დიდი ფასდაკლება ტვირთის სომეხ გადამზიდველებს მარცვლეულის თითოეულ ტონაზე 24 დოლარის დაზოგვის საშუალებას მისცემს:
„გარდა ამისა, ჩვენ საქართველოსთან ვაგრძელებთ მოლაპარაკებებს მათი კანონდებლობის იმ მუხლების დასაკონკრეტებლად, რომლებიც ცალკეულ შემთხვევებში ავტოტრანსპორტის გამოყენების დაშვებას ეხება. გვსურს დავაკონკრეტოთ, თუ კერძოდ რა შემთხვევებს გულისხმობენ, და როგორ შეიძლება, რომ ეს სომხეთზე გავრცელდეს“.
