რუსმა სამხედრო მოსამსახურემ, რომელმაც სომხური ოჯახი ამოხოცა, შესაძლოა, სასჯელი რუსეთში მოიხადოს

რუსეთის სამხედრო ბაზის სამხედრო მოსამსახურე ვალერი პერმიაკოვი, რომელსაც სომხეთის ქალაქ გიუმრიში, ავეტისიანების ოჯახის ამოხოცვის გამო, სამუდამო პატიმრობა მიესაჯა, შესაძლოა, რუსეთში გადაიყვანონ. სომხეთის მასობრივ საინფორმაციო საშუალებებს ამის შესახებ მსჯავრდებულის ადვოკატმა ედუარდ აგაჯანიანმა აცნობა. „წმინდა თეორიულად, ვალერი პერმიაკოვი, შესაძლოა, რუსეთში გადაიყვანონ“, – განაცხადა აგაჯანიანმა.

ახლა პერმიაკოვი სასჯელს იხდის სომხეთში განლაგებულ რუსეთის 102-ე სამხედრო ბაზაზე, სადაც ის დანაშაულის ჩადენის მომენტში მსახურობდა. ადვოკატმა აღნიშნა, რომ პერმიაკოვისთვის გამოტანილი სასჯელი უკვე ძალაში შევიდა, ეს კი იმას ნიშნავს, რომ სომხეთის იუსტიციის სამინისტრო გადაწყვეტს, თუ სად მოიხდის ის სასჯელს. „ვალერი პერმიაკოვი რუსეთის და სომხეთის სასამართლოებმა დამნაშავედ ცნეს, ამიტომ ახლა სომხეთის იუსტიციის სამინისტრო ვ.პერმიაკოვის სასჯელის ორგანიზების საკითხს განიხილავს“, – აცნობეს სომურ მედიასაშუალებებს რესპუბლიკის იუსტიციის სამინისტროში.

ჯარისკაცმა ავეტისიანების ექვსკაციანი ოჯახი 2015 წელს ამოხოცა. პერმიაკოვი სამხედრო ბაზიდან გაიქცა, ავეტისიანების სახლში შეაღწია და ოჯახის ხუთი წევრი გასროლით მოკლა, ხოლო ოჯახის მეექვსე წევრს, 6 თვის სერიოჟა ავეტისიანს პერმიაკოვმა მკერდში შვიდჯერ ჩაარტყა დანა. ბავშვი საავადმყოფოში გადაიყვანეს, სადაც ის შვიდ დღეში გარდაიცვალა.

ვალერი პერმიაკოვმა მისთვის წაყენებული ბრალი აღიარა.