კორონავირუსი: იტალია ევროპასა და სხვა კონტინენტებზე დაავადების კერა ხდება. განახლება
26 თებერვალი
BBC წერს, რომ იტალიიდან, სადაც კორონავირუსით 300 ადამიანი დაავადდა და 11 გარდაიცვალა, დაავადება ევროპის სხვა ქვეყნებში გადავიდა – ავსტრიაში, ხორვატიასა და შვეიცარიაში, სადაც პირველი შემთხვევები დაფიქსირდა.
კორონავირუსი პირველად აღმოაჩინეს აფრიკაში – ალჟირში და ლათინურ ამერიკაში – ბრაზილიაში. დაავადებული ბრაზილიელი ცოტა ხნის წინ დაბრუნდა სამშობლოში იტალიიდან.
ამის მიუხედავად, საფრანგეთის, იტალიის, გერმანიის ჯანდაცვის მინისტრებისა და ევროკომისიის წარმომადგენლების შეხვედრაზე მიიღეს გადაწყვეტილება, რომ არ დაკეტონ იტალიასთან საზღვრები.
ამ შეხვედრაზე, გერმანიის ჯანდაცვის მინისტრმა განაცხადა, რომ იტალიის მეზობლები სიტუაციას „ძალიან, ძალიან სერიოზულად აღიქვამენ“ და ის „შეიძლება მანამდე გაუარესდეს, სანამ გაუმჯობესებას დაიწყებს“.
დიდ ბრიტანეთში სკოლის მოსწავლეებს, რომლებიც არდადეგებზე იტალიაში იმყოფებოდნენ, აკრძალული აქვთ გაკვეთილებზე დასწრება. თუმცა, ავიამიმოსვლა ორ ქვეყანას შორის არ შეწყვეტილა.
ირანი
ირანში, ოფიციალური ინფორმაციით, 100-მდე ადამიანია ინფიცირებული, მაგრამ არის დიდი შიში, რომ მათი რიცხვი გაცილებით მაღალია. კერძოდ, ამის შესახებ განცხადება ადგილობრივმა პარლამენტარმა ქალაქ ყუმიდან, აჰმად ამირაბადი-ფარჰანმა გააკეთა. მან ხელისუფლება ქვეყანაში ვირუსის გავრცელების შესახებ სიცრუის გავრცელებაში დაადანაშაულა.
საპასუხოდ, ირანის ჯანდაცვის მინისტრის მოადგილე ჰარირჩიმ განაცხადა, რომ გარდაცვალების დადასტურებული შემთხვევა 12-ია და თქვა, რომ თანამდებობიდან გადადგება, თუკი ვინმე დაადასტურებს, რომ ეს ციფრები არასწორია. ეს სულ რაღაც ორი დღის წინ მოხდა – 26 თებერვალს კი თავად ჰარირჩი მოათავსეს საავადმყოფოში, მას კორონავირუსი აღმოუჩინეს.
• როგორ გადაარჩინეს მოხალისეებმა ჩინეთში, ეპიდემიის ზონაში მიტოვებული ათასობით შინაური ცხოველი
1100-ზე მეტი ადამიანი დაინფიცირდა სამხრეთ კორეაში, სადაც 11 ადამიანი გარდაიცვალა. ამ ქვეყანაში, ჩინეთის ფარგლებს გარეთ, ყველაზე მეტი ინფიცირებულია.
კორონავირუსის სტატისტიკა 26 თებერვლის მონაცემებით
26 თებერვლის მონაცემებით, მსოფლიოში კორონავირუსით დაავადების 81 128 შემთხვევაა დადასტურებული. მათი აბსოლუტური უმრავლესობა კვლავინდებურად ჩინეთსა და უბეის პროვინციაზე მოდის. ამ დროისთვის, ვირუსით გარდაიცვალა 2 765 ადამიანი, გამოჯანმრთელდა – 30 257. მსოფლიოში ვირუსის გავრცელებას შეგიძლიათ თვალი ადევნოთ ამ ონლაინრუკაზე.
25 თებერვალი
BBC-ის ცნობით, ჯანდაცვის მსოფლიო ორგანიზაციამ განაცხადა, რომ მსოფლიო კორონავირუსის პანდემიისთვის უნდა მოემზადოს.
პანდემია არის ვითარება, როდესაც მსოფლიოს სხვადასხვა წერტილში, ადამიანს ადამიანისგან ვირუსი ადვილად გადაეცემა. ჯერჯერობით ეს არ მომხდარა, მაგრამ „ქვეყნები მზად უნდა იყვნენ“.
ჩინეთის გარდა – სადაც ვირუსი წარმოიშვა – ახლა დაავადება დაფიქსირებულია მსოფლიოს კიდევ 30 ქვეყანაში.
ეკონომისტების გათვლებით, კორონავირუსის გამო, 2020 წელს, მსოფლიო ეკონომიკამ, შესაძლოა, დაახლოებით, 1 ტრილიონი დოლარი დაკარგოს.
კორონავირუსის სტატისტიკა 25 თებერვლის მონაცემებით
25 თებერვლის მონაცემებით, მსოფლიოში კორონავირუსით დაავადების 80 289 შემთხვევაა დადასტურებული. მათი აბსოლუტური უმრავლესობა ჩინეთში, უბეის პროვინციაზე მოდის. დღეისათვის, ვირუსით 2 704 ადამიანი გარდაიცვალა, გამოჯანმრთელდა – 27 840 ადამიანი. მსოფლიოში დაავადების გავრცელებას შეგიძლიათ თვალი ამ ონლაინ-რუკაზე ადევნოთ.
ვირუსით, შესაძლოა, დედამიწის მოსახლეობის 40-დან 70 პროცენტამდე დაავადდეს
The Atlantic იმ დასკვნების შესახებ წერს, რომლამდეც ჰარვარდის უნივერსიტეტის ეპიდემოლოგი, მარკ ლიპსიტჩი (Marc Lipsitch) მივიდა.
ერთი მხრივ, დასკვნები შემაშფოთებელია: ვირუსით, შესაძლოა, დედამიწის მოსახლეობის 40-დან 70 პროცენტამდე დაავადდეს.
მეორე მხრივ – პანიკის საფუძველი არ არსებობს, აცხადებს პროფესორი. კორონავირუსი ასე მარტივად იმიტომ ვრცელდება, რომ ის ნაკლებად აგრესიულია, ვიდრე გასულ წლებში აღმოჩენილი „ღორისა“ და „ფრინველის“ გრიპი, ასევე ატიპიური პნევმონია.
დაავადება უფრო მსუბუქი ფორმით მიმდინარეობს, ზოგჯერ სიმპტომების გარეშეც კი – ამიტომ მისი მატარებლის გამოვლენა უფრო რთული იქნება.
24 თებერვალი
ირანის მთავრობის ოფიციალურმა წარმომადგენელმა, ალი რაბეიმ ასევე განაცხადა, რომ ხელისუფლება არავითარ შემთხვევაში არ დამალავს ვირუსით გარდაცვალებისა და დაავადების სტატისტიკის შესახებ ინფორმაციას.
თუმცა, ამირაბადი-ფარჰანმა უარი განაცხადა საკუთარი ბრალდებების უკან წაღებაზე.
„მინისტრის მოადგილეს მე 40 გარდაცვლილის კონკრეტული სახელი მივეცი. ახლა მის გადადგომას ველოდებით“, – ციტირებს მის სიტყვებს სააგენტო „ილნა“.
ორი ოფიციალური პირის ეს დაპირისპირება და ასეთ მოკლე დროში, დაავადებულთა რიცხვის ანომალიური ზრდა დიდ დებატებსა და ეჭვებს იწვევს სოციალურ ქსელებში, რომ სინამდვილეში, ხელისუფლება ვერ უმკლავდება ეპიდემიას და რეალურ მონაცემებს მალავს.
დღეისათვის, ხელისუფლებამ დახურა სკოლები და უნივერსიტეტები ქალაქ ყუმში, რათა შეაჩეროს ვირუსის გავრცელება.
აზიის გარეთ იტალიაში ყველაზე რთული ვითარებაა
ამავდროულად, ეპიდემია ახალ ქვეყნებსა და რეგიონებს მოიცავს. აზიის გარეთ ყველაზე რთული ვითარება იტალიაშია.
ლომბარდიის რეგიონში, უკვე დადასტურებულია დაავადების 219 და გარდაცვალების 7 შემთხვევა. ამასთან, გარდაცვალების პირველი ფაქტის შესახებ, აქ სამი დღის წინ, 21 თებერვალს გავრცელდა ინფორმაცია.
ევროკომისიამ 24 თებერვალს განაცხადა, რომ ჯერჯერობით არ განიხილავს ევროკავშირის შენგენის ზონაში საზღვრების ჩაკეტვის საკითხის, იტალიაში კორონავირუსის აფეთქების საპასუხოდ. თუმცა, თავად იტალიასა და მეზობელ ქვეყნებში შემოღებულია გადაადგილებაზე შეზღუდვა, რომელიც უკვე 70 ათას ადამიანს შეეხო.
სამხრეთ კორეაში, სამედიცინო საფრთხის მეორე დონეა გამოცხადებული. ხანშიშესულ და ქრონიკულად დაავადებულ ადამიანებს რეკომენდაციას აძლევენ, უარი თქვან მოგზაურობაზე.
დაავადების პირველი შემთხვევები დაფიქსირდა ქუვეითში, ბაჰრეინსა და ერაყში.
კორონავირუსის სტატისტიკა 24 თებერვლის მონაცემებით
24 თებერვლის მონაცემებით, მსოფლიოში, კორონავირუსით დაავადების 79 553 შემთხვევაა დადასტურებული. მათი აბსოლუტური უმრავლესობა, კვლავინდებურად ჩინეთსა და უბეის პროვინციაზე მოდის.
ამ დროისთვის, ვირუსით გარდაიცვალა 2 628 ადამიანი, გამოჯანმრთელდა – 25 231.
ეპიდემიის ეკონომიკური შედეგები
ეპიდემიის შედეგები ნელ-ნელა მსოფლიო ეკონომიკაზეც აისახება. ზარალდება ყველა კომპანია, რომელიც დამოკიდებულია ჩინეთიდან მიწოდებაზე.
შედეგად, იწყება საბირჟო ინდექსის შემცირება – ინვესტორებს სახსრები გამოაქვთ რეალური სექტორიდან და მათ აბანდებენ, პირველ რიგში, ოქროში, რომლის ფასმაც შვიდი წლის განმავლობაში, სარეკორდო ნიშნულს მიაღწია.
წარმოების შემცირების გამო, სასაქონლო ფასები ეცემა, პირველ რიგში, ნავთობზე.
