ჟურნალისტები აფრიკულ ქვეყანაში რუსი დაქირავებული მეომრების შესახებ გამოძიებას ატარებდნენ" />

ცნობილი რუსი ჟურნალისტი ორჰან ჯემალი ორ კოლეგასთან ერთად ცენტრალური აფრიკის რესპუბლიკაში მოკლეს

ჟურნალისტები აფრიკულ ქვეყანაში რუსი დაქირავებული მეომრების შესახებ გამოძიებას ატარებდნენ

ჟურნალისტი ორჰან ჯემალი, ოპერატორი კირილ რადჩენკო და რეჟისორი ალექსანდრ რასტორგუევი ცენტრალური აფრიკის რესპუბლიკაში დაიღუპნენ, — იუწყება „ნოვაია გაზეტა“. ფრანგმა ჟურნალისტებმა, რომლებიც შემთხვევის ადგილზე იმყოფებოდნენ, „ნოვაია გაზეტას“ დაღუპულთა სხეულების ფოტოები გაუგზავნეს: ერთ-ერთი მათგანი „ნოვაია გაზეტას“ ყოფილი სპეცკორესპონდენტი ორჰან ჯემალია.

„ეს ალექსანდრ რასტორგუევის და მიხაილ ხოდორკოვსკის გამოძიებათა მართვის ცენტრის ერთობლივი პროექტი იყო, – ჰყვება ჟურნალისტი როდიონ ჩეპელი, – ჟურნალისტები ცენტრალური აფრიკის რესპუბლიკაში მას შემდეგ გაემგზავრნენ, რაც მოვიდა ცნობა, რომ იქ პერიოდულად სამხედრო ფორმიან რუსი ეროვნების ადამიანებს ხედავენ. ჟურნალისტებისთვის ეს საინტერესო იყო. ისინი პროფესიის საუკეთესო წარმომადგენლები იყვნენ, ძალიან გაბედული ბიჭები. ისინი რამდენიმე დღის წინ იქ გაემგზავრნენ, და რესპუბლიკაში 3-4 დღე დაჰყვეს. ჟურნალისტები დედაქალაქ ბანგიდან დასავლეთისკენ ქალაქ ბამაბარის მიმართულებით მიიწევდნენ. ერთ-ერთ ბლოკ-პოსტზე ისინი დაბლოკეს. გაეროსა და საერთაშორისო დამკვირვებლების მონაცემების თანახმად, ქვეყანაში სამოქალაქო ომი მიმდინარეობს. თითოეული გზა ერთმანეთისგან მოშორებით არსებული ბლოკ-პოსტების ჯაჭვს წარმოადგენს. ერთ-ერთ მათგანთან ისინი გააჩერეს, ხოლო შემდეგ რა მოხდა, ჩემთვის უცნობია“.

როგორც რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ „ნოვაია გაზეტას“ უამბო, რუსი დიპლომატები გვამების ამოსაცნობად გაემგზავრნენ. საგარეო საქმეთა სამინისტროში ირწმუნებიან, რომ დაღუპულების ოჯახებს რუსი მოქალაქეების გვამების სამშობლოში რეპატრიაციაში დაეხმარებიან.

ფრანგული სააგენტოს AFP-ის წყაროების მონაცემებით, რუსეთის მოქალაქეები ბლოკპოსტზე უცნობმა შეიარაღებულმა პირებმა დახოცეს. AFP-ის ცნობით, მათი სხეულები ქალაქ სიბუტიდან 23 კილომეტრის დაშორებით იპოვეს. დაღუპულთა გვამები გაეროს მისიის ბაზაზე გადაასვენეს.

ჟურნალისტები მიხაილ ხოდორკოვსკის გამოძიებათა მართვის ცენტრთან ერთად ცენტრალური აფრიკის რესპუბლიკაში ერთობლივი ფილმის გადასაღებად გაფრინდნენ.

„ჩვენ ერთად ვაკეთებდით პროექტს ცენტრალური აფრიკის რესპუბლიკის შესახებ. გუშინწინ საღამოს ისინი უკანასკნელად დაგვიკავშირდნენ. მართლა ძალიან მიჭირს ლაპარაკი, ისინი ჩემი მეგობრები იყვნენ“, – უთხრა „ბი-ბი-სის“ გამოძიებების ცენტრალური სამმართველოს მთავარმა რედაქტორმა ანდრეი კონიახინმა.

ორჰან ჯემალი, რეჟისორი ალექსანდრ რასტორგუევი და ოპერატორი კირილ რადჩენკო გაიტაცა „დაახლოებით ათმა „ტურბანიანმა“ მამაკაცმა, რომლებიც მხოლოდ არაბულად ლაპარაკობდნენ“. ამის შესახებ Associated Press ცენტრალური აფრიკის ქალაქ სიბუტა მარსელენა იოიოს ხელისუფლების წარმომადგენელზე დაყრდნობით იუწყება.

მისი თქმით, რუსები ადგილზე არ მოუკლავთ, მძღოლი თავდასხმის შემდეგ გადარჩა და 31 ივლისს დილით ხელისუფლებას თავდასხმის ამბავი მოუთხრო. ჩინოვნიკმა დასძინა, რომ სპეცსამსახურების თანამშრომლები რუსებს აფრთხილებდნენ, რომ გამგზავრება არ ღირდა, „რადგან უკვე სიბნელე იყო“.


ასევე წაიკითხეთ