"ვერთიანდებით საქართველოსთვის" - გიორგი გახარიამ პარტია დააფუძნა
დღეს “ექსპო ჯორჯიაში” საქართველოს ყოფილი პრემიერ-მინისტრის, გიორგი გახარიას პარტიის პრეზენტაცია გაიმართა. პარტიას “საქართველოსთვის” ჰქვია.
გიორგი გახარიამ დამსწრე საზოგადოებას გუნდის წევრები წარუდგინა და მათ მთავარ ამოცანად ნეპოტიზმთან და კორუფციასთან ბრძოლა დაასახელა. ასევე, გახარიას თქმით, მისი პარტია მონაწილეობას მიიღებს ადგილობრივ თვითმმართველობის არჩევნებში.
გახარიას გუნდში არიან პრეზიდენტ გიორგი მარგველაშვილის ადმინისტრაციის ყოფილი ხელმძღვანელი გიორგი აბაშიშვილი, საერთაშორისო ურთიერთობის სპეციალისტი გიორგი გოგუაძე, ნატოში საქართველოს ყოფილი ელჩი ლევან დოლიძე, შს მინისტრობის დროს მისი მოადგილე ნათია მეზვრიშვილი, ბიზნესმენი ალექსანდრე მოწერელია და სხვები.
ღონისძიებას სტუმრის სტატუსით ესწრებოდნენ ძმები არველაძეები და საკონსტიტუციო სასამართლოს ყოფილი თავმჯდომარე [2016-2020] ზაზა თავაძე.
![გიორგი გახარიას "სთორი" ინსტაგრამზე, რომელიც 28 მაისს გამოქვეყნდა](https://jam-news.net/app/uploads/2021/05/192235518_1902062636635287_6967623950473329456_n.jpeg)
_____________________________________
● IRI: პატრიარქის შემდეგ, ქვეყანაში ყველაზე რეიტინგული ადამიანი ექსპრემიერი გიორგი გახარიაა
● მესამე ძალა თუ ივანიშვილის სატელიტი? ვინ როგორ აფასებს გახარიას პოლიტიკაში დარჩენას
● რას ნიშნავს გახარიას გადადგომა და ღარიბაშვილის დაბრუნება? გია ნოდიას თვალსაზრისი
____________________________________
გიორგი გახარიას პარტიის პრეზენტაციის პარალელურად აქცია გამართეს სამოქალაქო აქტივისტებმა.
“არ შეგარჩენთ 20 ივნისს” – ეწერა მათ ბანერზე. სწორედ გიორგი გახარია იყო საქართველოს შს მინისტრი იმ დროს, როცა 20 ივნისის ღამეს, სპეცრაზმმა ანტისაოკუპაციო აქცია სასტიკად დაარბია.
“გავრილოვის ღამე საქართველოს ისტორიაში ერთ-ერთი ყველაზე მძიმე ღამეა და ამის შემოქმედი არის გიორგი გახარია. ის ყოველთვის იყო ბიძინა ივანიშვილის დაკვეთის შემსრულებელი და არავის სჯერა, რომ ის თითქოს ოპოზიციაში გადავიდა. რა თქმა უნდა, ის დაიცავს კრემლის ინტერესებს საქართველოში”, – თქვა ერთ-ერთმა აქტივისტმა.
დაპირისპირება მოხდა სამართალდამცველებსა და აქტივისტებს შორის “ექსპო ჯორჯიას” ერთ-ერთ პავილიონთან, სადაც პარტიის ყრილობა იმართებოდა.
![გიორგი გახარიას პარტიის პრეზენტაცია. პოლიციას ერთ-ერთი აქტივისტი ტერიტორიიდან გაჰყავს.](https://jam-news.net/app/uploads/2021/05/192629493_10159549570657360_1654718600886064806_n-1024x536.jpeg)
![](https://jam-news.net/app/uploads/2021/05/192269779_4610954265600266_3770709392971296101_n-1024x768.jpeg)
რა თქვა ექსპრემიერმა
გიორგი გახარიამ დაასახელა ის მიზეზები, რატომაც თანამდებობა დატოვა. მისი თქმით, ის რომ გადადგდა, ჩაითვალა, რომ ოპონენტებთან ბრძოლა ხალხის პრობლემებზე მნიშვნელოვანია:
“გადავდექი იმიტომ, რომ პარტია დაშორდა ჩვენი რიგითი მოქალაქეების რეალურ პრობლემებს მარტივი მიზეზის გამო – რატომღაც ჩაითვალა, რომ პოლიტიკურ ოპონენტებთან ბრძოლა ბევრად უფრო მნიშვნელოვანი თემაა, ვიდრე ჩვენი რიგითი მოქალაქეების ყოველდღიურ პრობლემებზე ზრუნვა.
გადავდექი იმიტომ, რომ 8-წლიანი მმართველობის შემდეგ მმართველი პარტია თავის ყველაზე დიდ მიღწევებს ადარებდა 10-15 წლის წინანდელ რეალობას და ამით განვითარების პერსპექტივას უკლავდა ჩვენს ქვეყანას.
და გადავდექი იმიტომ, რომ ერთ კონკრეტულ მომენტში, ჩემთვის სრულიად გასაგებად და აშკარად, პოლიტიკურმა პარტიამ მისი პარტიული ინტერესები დააყენა სახელმწიფო ინტერესებზე მაღლა. ეს იყო რეალური მიზეზი იმ ნაბიჯის, რომელიც მე გადავდგი”.
მან ასევე ისაუბრა კორუფციასა და ნეპოტიზმზე და აღნიშნა, რომ კორუფციასთან და ნეპოტიზმთან ბრძოლა უაღრესად მნიშვნელოვანი გამოწვევაა.
“ჩვენ უნდა გვესმოდეს, რომ კორუფციასთან და ნეპოტიზმთან ბრძოლა, ეს არის უაღრესად მნიშვნელოვანი გამოწვევა დღეს სახელმწიფოსთვის. აქ ჩვენ არ მივუთითებთ კონკრეტულ მაგალითებზე, მიუხედავად იმისა, რომ ამის შესაძლებლობაც შეიძლება გვქონდეს. ჩვენ კარგად უნდა გვესმოდეს, რომ ჩვენნაირი ღარიბი, გარდამავალი ეკონომიკის ამოცანაა ყოველდღიური ბრძოლა კორუფციასთან და ნეპოტიზმთან. ჩვენ ვერ წარმოგვიდგენია, რამხელა რისკებში შედის ქვეყანა, რომელსაც აქვს სუსტი ინსტიტუტები, სადაც არსებობს ნეპოტიზმის და კორუფციის რისკი”, – თქვა გიორგი გახარიამ.
გიორგი გახარიამ ახალი პოლიტიკური მოძრაობის პრეზენტაციაზე დადო საჯარო პირობა, რომ ნებისმიერ საკითხზე არსებულ კითხვებს გასცემს პასუხს:
“მინდა დაგპირდეთ და დაგარწმუნოთ, რომ არ მეშინია არაფერზე საუბრის, რაც გამიკეთებია და რაშიც მონაწილეობა მიმიღია და როგორც აქამდე გამიცია ნებისმიერ კითხვაზე პასუხი”, – ამბობს გახარია, – “ასე გავაგრძელებთ იმიტომ, რომ ჩვენი ყველა ნაბიჯის ძირითადი განმსაზღვრელი არგუმენტი და ფაქტორი იყო ფასეულობები, ქვეყნის და სახელმწიფოს მსახურება”.
_______________________________
●მესამე ძალა თუ ივანიშვილის სატელიტი? ვინ როგორ აფასებს გახარიას პოლიტიკაში დარჩენას
● მორიგი პოლიტიკური სკანდალი საქართველოში: ფარული ჩანაწერი ივანიშვილის შვილის და პრემიერის მონაწილეობით
_______________________________
გიორგი გახარიამ პრემიერ-მინისტრის თანამდებობა 18 თებერვალს დატოვა.
როგორც გახარიამ მაშინ განმარტა, მისი გადადგომის ერთ-ერთი მთავარი მიზეზი ნიკა მელიას მიმართ გამოტანილი სასამართლოს გადაწყვეტილებაა. მისი თქმით, მას გაუმართლებლად მიაჩნია ნიკა მელიას დაპატიმრება იმ პირობებში, როდესაც არსებობს პოლიტიკური ესკალაციის საფრთხე.
გახარიას თქმითვე, გადადგომის მიზეზია ისიც, რომ აღნიშნულთან დაკავშირებით გუნდთან შეთანხმებას ვერ მიაღწია.
14 აპრილს მმართველი პარტია “ქართული ოცნება” კიდევ ექვსმა დეპუტატმა დატოვა. მათ ექსპრემიერ გიორგი გახარიასთან ერთად ახალი პარტიის შექმნაა დააანონსეს. მათივე თქმით, დეპუტატები გიორგი გახარიას გუნდის წევრები არიან და გადაწყვეტილება მასთან ერთად მიიღეს.
ოცნება დატოვეს მეათე მოწვევის პარლამენტის დეპუტატებმა: გიორგი ხოჯევანიშვილმა, მიხეილ დაუშვილმა, ბექა ლილუაშვილმა, ანა ბუჩუკურმა, ალექსანდრე მოწერელიამ და შალვა კერესელიძემ.
მაშინ პარლამენტის თავმჯდომარემ, არჩილ თალაკვაძემ განაცხადა, რომ დიდი ალბათობით, გიორგი გახარიას გუნდი ვადამდელი არჩევნების მოთხოვნას შეუერთდება, რადგან “ისინი პრაქტიკულად გადავიდნენ ოპოზიციაში.”