უკრაინის საგარეო საქმეთა სამინისტროს სპიკერი, ოლეგ ნიკოლენკო წერს, რომ საქართველოს ხელისუფლება მტერს არ ეძებს იქ, სადაც საჭიროა. ნიკოლენკოს განცხადებას საქართველოში უკრაინის საელჩო ავრცელებს.
უკრაინის საგარეო უწყების განცხადება პრემიერ ღარიბაშვილის გუშინდელ ინტერვიუს მოჰყვა. ღარიბაშვილმა თქვა, რომ ვოლოდიმირ ზელენსკის სურს, “აქაც რაღაც მოხდეს”. ასევე, პრემიერმა კლიჩკო, ფეიგინი და დავით არახამია “ლუზერებად” მოიხსენია.
“თქვენ ახსენეთ ზელენსკის მიმართვა – ახლა ომში მყოფი ადამიანი როცა იცლის და აქ საქართველოში რამდენიმე ათასი ადამიანის გამართულ დესტრუქციულ აქციას ეხმაურება, ეს უკვე პირდაპირი მტკიცებულებაა, რომ ეს ადამიანი ჩართულია, მოტივირებულია, რომ აქაც რაღაც მოხდეს, შეიცვალოს.
გამოვიდა კლიჩკო, გამოვიდა ფეიგინი, ვიღაც გაუგებარი ადამიანები გამოვიდნენ, კიდევ სხვებიც, უკრაინის პოლიტიკოსები, არახამია და ვიღაც ხელმოცარული ლუზერები, რომლებიც ამბობენ, რომ საჭიროა ცვლილება და საჭიროა რაღაც სცენარები, გადატრიალება და… ეს არის სხვა ქვეყნის შიდა პოლიტიკაში პირდაპირი ჩარევა. არ მინდა ახლა, ადამიანი ომშია და მინდა ყველას წარმატება ვუსურვო, ამ ომის დროულად დასრულება და სიმშვიდე. და ქვეყნის გაერთიანება მინდა ვუსურვო, მაგრამ თქვენ მიხედეთ თქვენს თავს და მიხედეთ თქვენ ქვეყანას – ეს მინდა ვუთხრა ყველას.” – განაცხადა ღარიბაშვილმა.
ნიკოლენკოს თქმით, ბოლო რამდენიმე დღის განმავლობაში საქართველოს პრემიერ-მინისტრმა და პარლამენტის ხელმძღვანელობამ უკრაინის მიმართ რიგი არამეგობრული განცხადება გააკეთეს.
როგორც საგარეო უწყების სპიკერი განმარტავს, საქართველოს ხელისუფლება თითქმის სიტყვასიტყვით იმეორებდა რუსული პროპაგანდის თეზისს. ასევე, ნიკოლენკოს თქმით, საქართველოს ხელისუფლების წარმომადგენლებმა უკრაინა დაადანაშაულეს საქართველოში სახელმწიფო გადატრიალების მომზადებაში, რუსეთთან ომში ჩათრევაში და სამოქალაქო ომის გასაჩაღებლად ძალების გაგზავნაში:
“ჩვენ კატეგორიულად უარვყოფთ მსგავს ინსინუაციებს, რომლებსაც არაფერი აქვს საერთო რეალობასთან. იქ არ ეძებს მტერს საქართველოს ხელისუფლება, სადაც საჭიროა.
ჩვენ დარწმუნებულები ვართ, რომ ქართველი პოლიტიკოსების განცხადებები ვერ შეარყევს უკრაინელი და ქართველი ხალხების მჭიდრო მეგობრულ ურთიერთობებს. ჩვენ დიდად ვაფასებთ ქართველების მხარდაჭერას იმ დროს, როდესაც უკრაინელები დამოუკიდებლობისთვის იბრძვიან. თავის მხრივ, უკრაინა იყო და დარჩება ქართველი ხალხის მეგობრად, რომელსაც ვუსურვებთ, რომ არ შეაჩეროს ევროპული მომავლის განვითარება”. – ვკითხულობთ განცხადებაში.
17 თებერვალს ოცნების სატელიტმა “ხალხის ძალამ” პარლამენტში განსახილველად ორი კანონპროექტი დაარეგისტრირა – „უცხოური გავლენის გამჭვირვალობის შესახებ“ კანონპროექტი და მეორე – „უცხოელი აგენტების რეგისტრაციის შესახებ“.
როგორც ამას პროცედურები ითვალისწინებს, ორივე კანონპროექტი ვენეციის კომისიაშია გადაგზავნილი.
ამ ორიდან ერთი – „უცხოური გავლენის გამჭვირვალობის შესახებ“ კანონპროექტი 7 მარტს პარლამენტმა 76 ხმით 13-ის წინააღმდეგ პირველი მოსმენით მიიღო.
კანონის ინიციირებას თბილისში, რუსთაველის გამზირზე საპროტესტო აქციები მოჰყვა. კანონპროექტის მიღების შემდეგ კი პროტესტი მრავალათასიან მიტინგებში გადაიზარდა, რომელიც ხელისუფლებამ ძალის გამოყენებით დაშალა. მომიტინგეებს დაუშინეს წყლის ჭავლსა და ცრემლმდენ გაზი.
ამ კანონპროექტს როგორც საქართველოში, ისე მის ფარგლებს გარეთ ყველა, მთავრობის გარდა, რუსულ კანონს უწოდებს და ამბობს, რომ მისი მიღება ქვეყნისთვის დიდი ბარიერია ევროკავშირისკენ მიმავალ გზაზე.
საბოლოოდ, უმრავლესობამ „რუსული კანონი“ მეორე მოსმენით ჩააგდო. „ხალხის ძალის“ მიერ ინიციირებული კანონის პროექტი კენჭისყრაზე განხილვის გარეშე დააყენეს. მის წინააღმდეგ ხმა 35 დეპუტატმა მისცა, მხარი 1-მა დაუჭირა.
რუსული კანონპროექტის ერთ-ერთი ავტორი დიმიტრი ხუნდაძე ამბობს, რომ ამ კანონის არმიღებით საზოგადოებამ “ხელიდან შანსი გაუშვა”. “ქართულმა ოცნებამ” “უცხოური გავლენის გამჭვირვალობის შესახებ” რუსული კანონპროექტის გაწვევის შესახებ 9 მარტს, დილას განაცხადა.
