სამხრეთ კავკასიის მთავარი ამბები. მიმოხილვა 26-30 ოქტომბერი, 2026

●  საკონსტიტუციო სასამართლოში ხუთი ოპოზიციური პარტიის არაკონსტიტუციურად ცნობის საქმის განხილვა გაგრძელდა. „კოალიცია ცვლილებისთვის“ წარმომადგენელმა ნიკა გვარამიამ განაცხადა, რომ სარჩელში მოცემული კრიტერიუმებით აკრძალვას პირველ რიგში თავად „ქართული ოცნება“ ექვემდებარება. „ძლიერი საქართველო – ლელოს“ წარმომადგენელმა თორნიკე ართქმელაძემ პლენუმს სარჩელის არდაკმაყოფილებისკენ მოუწოდა.

სხდომა 30 ოქტომბერს, 11:00 საათზე განახლდება: ახსნა-განმარტებას „ლელოდან“ გიორგი სიორიძე და „გახარია საქართველოსთვის“ წარმომადგენლები წარადგენენ. 9 ნოემბრიდან პროცესი კითხვა-პასუხის ეტაპზე გადავა.

●  პატიმრობაში მყოფი ოპოზიციონერი ელენე ხოშტარია რუსთავის ქალთა პენიტენციური დაწესებულებიდან თბილისში, თოდუას კლინიკაში, გეგმური შემოწმებისთვის ეტლით მიიყვანეს. კადრების გავრცელების შემდეგ „საერთაშორისო გამჭვირვალობა – საქართველომ“ და ევროპარლამენტარმა რასა იუკნევიჩიენემ მის ჯანმრთელობაზე პასუხისმგებლობა „ქართულ ოცნებას“ დააკისრეს, TI კი მის დაუყოვნებლივ გათავისუფლებას ითხოვს. ხოშტარიას თბილისის მერის კახა კალაძის საარჩევნო ბანერზე წარწერის გაკეთებისთვის 1 წლითა და 6 თვით თავისუფლების აღკვეთა აქვს მისჯილი.

●   სააპელაციო სასამართლომ „ასავალ-დასავალის“ ჟურნალისტს დიტო ჩუბინიძეს პატიმრობა 4 000-ლარიანი გირაოთი შეუცვალა და ის გათავისუფლდა. პროკურატურა მას სამშობლოს ღალატს, კერძოდ, საბოტაჟს ედავება და ამტკიცებს, რომ 2026 წლის თებერვლიდან სისტემატურად ავრცელებდა ცრუ და დეზინფორმაციულ ცნობებს. ჩუბინიძის თქმით, მას საპროცესო შეთანხმება არ გაუფორმებია.

●   „საერთაშორისო გამჭვირვალობა – საქართველოს“ მონაცემებით, 24 მოქმედი თანამდებობის პირი ერთდროულად 30 კერძო კომპანიის დირექტორია. სიაში არიან მუნიციპალიტეტების, საკრებულოებისა და სახელმწიფო უწყებების თანამდებობის პირები, მათ შორის მარტვილის მერი გიორგი ნაჭყებია. ანტიკორუფციული კანონი თანამდებობის პირს კომპანიის წილის ფლობის უფლებას აძლევს, მაგრამ დირექტორობას უკრძალავს. ორგანიზაცია დამრღვევების თანამდებობიდან გათავისუფლებას ითხოვს.

●   საქართველოში ძებნილმა ყოფილმა მთავარმა პროკურორმა ოთარ ფარცხალაძემ და მოსკოვში მცხოვრებმა ბიზნესმენმა მამუკა ფიფიამ რუსეთში საზოგადოებრივი ფონდი შექმნეს. ფიფიას განცხადებით, ფონდის მთავარი მიზანი რუსეთსა და საქართველოს შორის დიპლომატიური ურთიერთობების აღდგენის ხელშეწყობაა. რადიო თავისუფლების ცნობით, ფონდი მოსკოვში გამართულ მრგვალ მაგიდაზე გამოცხადდა, რომლის დოკუმენტიც რუსულ-ქართული უნივერსიტეტის შექმნას და ოკუპირებულ ტერიტორიაზე მდებარე ლომისის ეკლესიაში ღვთისმსახურების აღდგენას გვთავაზობს. ფარცხალაძე აშშ-ისა და დიდი ბრიტანეთის სანქციების ქვეშაა.

●   საქართველოს სამუშაო ვიზიტით აზერბაიჯანის პრემიერ-მინისტრი ალი ასადოვი ეწვია. ვიზიტის ფარგლებში იმართება ეკონომიკური თანამშრომლობის საქართველო-აზერბაიჯანის მთავრობათაშორისი კომისიის მე-11 სხდომა, რომელსაც ორი ქვეყნის პრემიერები თავმჯდომარეობენ. ვიცე-პრემიერ მარიამ კვრივიშვილის თქმით, განიხილება ენერგეტიკის, ტრანსპორტის, ინვესტიციებისა და ვაჭრობის საკითხები და რეგიონული პროექტები, განსაკუთრებით შუა დერეფნის კონტექსტში.

●  პრემიერ-მინისტრი ირაკლი კობახიძე საქართველოში აშშ-ის ელჩის მოვალეობის შემსრულებელს შეხვდა და დანიშვნა მიულოცა. მთავრობის ადმინისტრაციის ცნობით, კობახიძემ განაცხადა, რომ საქართველო მზად არის, აშშ-თან სტრატეგიული პარტნიორობა „სუფთა ფურცლიდან“ აღადგინოს.

●  ევროპის საბჭოს გენერალური მდივნის ალან ბერსეს თქმით, საქართველოში ოპოზიციური პარტიების აკრძალვასთან დაკავშირებული საკითხები შესაძლოა ადამიანის უფლებათა ევროპულ სასამართლოში აღმოჩნდეს. მისი თქმით, პარტიის დაშლა მტკიცე სამართლებრივ დასაბუთებას, აუცილებლობისა და პროპორციულობის დაცვას მოითხოვს. ბერსემ ეს 27 ოქტომბერს, სტრასბურგში, ევროპის საბჭოს ადგილობრივ და რეგიონულ ხელისუფალთა კონგრესის სხდომაზე განაცხადა.

●   შსს-მ შვიდი ადამიანი დააკავა, რომლებსაც ჯგუფური ძალადობის ორგანიზებას, ძარცვასა და გამოძალვას ედავება. ცენტრალური კრიმინალური პოლიციის დეპარტამენტის დირექტორის დავით კიკნაძის თქმით, ისინი სოციალურ ქსელებში ქალების სახელით ყალბ პროფილებს ქმნიდნენ, მამაკაცებს შეხვედრაზე იბარებდნენ, თავს ესხმოდნენ და ფულსა და ნივთებს ართმევდნენ, ცემის კადრებს კი ინტერნეტში ავრცელებდნენ. რადიო თავისუფლების ცნობით, ერთ-ერთი დაკავებული საკუთარ საქმიანობას „პედოფილებზე ნადირობას“ უწოდებს, შსს-ის ინფორმაციით კი უკვე 10-ზე მეტი დაზარალებული გამოიკითხა.

●  თბილისის საქალაქო სასამართლოში 2021 წელს მოკლული ნიკო კვარაცხელიას მკვლელობის ორგანიზების საქმის არსებითი განხილვა დაიწყო. ბრალდებულები არიან ძმები დავით და გურამ კაკულიები და ბესარიონ ჟვანია, რომელიც ძებნილია. პროკურატურის ვერსიით, მოტივი შურისძიება იყო, დაცვის მხარე კი ბრალდებას დაუსაბუთებლად მიიჩნევს. შემდეგი სხდომა 11 ნოემბერს გაიმართება.

ფოტოზე: ნიკო კვარაცხელია

● პრეზიდენტი ილჰამ ალიევი დღეს ანკარაში გამართულ თურქულ სახელმწიფოთა ორგანიზაციის სამიტში მონაწილეობას არ მიიღებს, მიუხედავად თურქეთის პრეზიდენტის პირადი მიწვევისა. შეხვედრაზე აზერბაიჯანს საგარეო საქმეთა მინისტრი ჯეიჰუნ ბაირამოვი წარმოადგენს.

ოფიციალური განმარტებით, გადაწყვეტილების მიზეზი პრეზიდენტის გადატვირთული სამუშაო გრაფიკია, თუმცა მან ყურადღება ორ ქვეყანას შორის ურთიერთობების გამწვავების ფონზე მიიპყრო. დაძაბულობის მიზეზი თურქეთში აზერბაიჯანის სკოლებში ჰიჯაბის ტარების ფაქტობრივი შეზღუდვის კრიტიკა გახდა. თუმცა ექსპერტები ერთ-ერთ მიზეზად აზერბაიჯანის ისრაელთან მჭიდრო თანამშრომლობასაც ასახელებენ.

ბაქომ თურქი პოლიტიკოსები და საზოგადო მოღვაწეები ქვეყნის შიდა საქმეებში ჩარევაში დაადანაშაულა, თურქეთის 31 მოქალაქეს ქვეყანაში შესვლა აუკრძალა, რამდენიმე სხვა პირის წინააღმდეგ კი სისხლის სამართლის საქმეები აღძრა.

● აზერბაიჯანისა და თურქეთის საგარეო საქმეთა მინისტრებმა, ჯეიჰუნ ბაირამოვმა და ჰაქან ფიდანმა, ანკარის სამიტის ფარგლებში პირისპირ შეხვედრა გამართეს. გავრცელებული ინფორმაციით, მხარეებმა ორმხრივი ურთიერთობების მდგომარეობა და განვითარების პერსპექტივები, ასევე რეგიონული და საერთაშორისო საკითხები განიხილეს.

იმავე დღეს ბაირამოვი თურქულ სახელმწიფოთა ორგანიზაციის საგარეო საქმეთა მინისტრთა საბჭოს სხდომაშიც მონაწილეობდა. მან ისაუბრა პოლიტიკური დიალოგის გაფართოებაზე, უსაფრთხოების სფეროში კოორდინაციაზე, ეკონომიკურ და სატრანსპორტო კავშირებსა და თავდაცვითი პროდუქციის ერთობლივ წარმოებაზე.

● სომხეთის პრემიერ-მინისტრმა ნიკოლ ფაშინიანმა განაცხადა, რომ აზერბაიჯანთან მშვიდობას ალტერნატივა არ აქვს და სურს, მშვიდობა 400 წლით იყოს გარანტირებული. მან ხაზი გაუსვა მშვიდობიანი ურთიერთობების ინსტიტუციურ დონეზე გაფორმების აუცილებლობას.

● აზერბაიჯანის საერთაშორისო ურთიერთობების ანალიზის ცენტრის წარმომადგენელმა ფარჰად მამედოვმა სომხეთის საგარეო საქმეთა მინისტრი არარატ მირზოიანი გააკრიტიკა. მირზოიანმა განაცხადა, რომ „ზოგჯერ აზერბაიჯანის ოფიციალური პირები ისეთ ფორმულირებებს იყენებენ, რომლებიც, რბილად რომ ვთქვათ, მშვიდობას ხელს არ უწყობს“.

მამედოვის თქმით, სომხეთს არ აქვს უფლება, აზერბაიჯანს უკარნახოს, რა და როგორ ისაუბროს კონფლიქტზე. მან ასევე სომხეთი კონფლიქტის ისტორიის ისე წარმოჩენის მცდელობაში დაადანაშაულა, თითქოს ის 2020 წლის მეორე ყარაბაღის ომის დროს დაიწყო და უგულებელყოფილია მანამდე არსებული 30-წლიანი პერიოდი, როდესაც, მისი შეფასებით, სომხეთს აზერბაიჯანის ტერიტორიები ოკუპირებული ჰქონდა.

● აზერბაიჯანმა გაეროში კვლავ დააყენა 1990-იანი წლების დასაწყისში, პირველი ყარაბაღის ომის დროს, უგზო-უკვლოდ დაკარგული ქვეყნის 4 000-ზე მეტი მოქალაქის ბედის საკითხი. აზერბაიჯანის წარმომადგენელმა საერთაშორისო თანამეგობრობას მათი ადგილსამყოფლის დადგენაში დახმარებისკენ მოუწოდა და სომხეთს კიდევ ერთხელ მოსთხოვა შესაძლო სამარხების ადგილმდებარეობის შესახებ ინფორმაციის მიწოდება, არქივების გახსნა და იმ მონაცემების გადაცემა, რომლებიც ძებნას დაეხმარებოდა.

● პრემიერ-მინისტრი ალი ასადოვი საქართველოში ეკონომიკური თანამშრომლობის სამთავრობათაშორისო კომისიის სხდომაში მონაწილეობის მისაღებად ჩამოვიდა. განსახილველ საკითხებს შორისაა ეკონომიკა, ვაჭრობა, ტრანსპორტი და ენერგეტიკა.

● აზერბაიჯანმა უკრაინას ენერგეტიკული ინფრასტრუქტურის აღსადგენად 1,47 მილიონ დოლარზე მეტი ღირებულების ჰუმანიტარული დახმარების მორიგი პარტია გადასცა. ტვირთში შედის ცხრა ძალოვანი ტრანსფორმატორი, 186 კილომეტრი ელექტროსადენი და გამანაწილებელი მოწყობილობები.

ეს აზერბაიჯანიდან უკრაინაში გაგზავნილი ჰუმანიტარული დახმარების უკვე 159-ე პარტიაა. წინა მიწოდებებიც მოიცავდა იმ მოწყობილობებს, რომლებიც უკრაინაში ელექტრომომარაგების აღსადგენად არის საჭირო. ელექტროენერგიის მიწოდება ქვეყანაში ენერგეტიკულ ობიექტებზე რუსეთის განუწყვეტელი დარტყმების შედეგად ირღვევა.

● Amnesty International-მა მკვლევრისა და აქტივისტის, ბაჰრუზ სამედოვის, დაუყოვნებლივ გათავისუფლება მოითხოვა. მას სახელმწიფო ღალატის ბრალდებით 15 წლით თავისუფლების აღკვეთა აქვს მისჯილი. გამოძიების ვერსიით, ის სომხეთის სპეცსამსახურებთან თანამშრომლობდა. სამედოვი ბრალდებას უარყოფს.

Amnesty International-ის ინფორმაციით, ის ორი თვის განმავლობაში სამარტოო საკანში ჰყავდათ მოთავსებული, ექიმის მიერ დანიშნულ მედიკამენტებს თვეზე მეტი ხნის განმავლობაში არ აძლევდნენ, ხოლო მხედველობის გაუარესების გამო სამედიცინო გამოკვლევის მოთხოვნებს არაერთხელ უპასუხოდ ტოვებდნენ.

● ყარაბაღის ქალაქ ხანკენდიში დსთ-ის ანტიმონოპოლიური პოლიტიკის სახელმწიფოთაშორისი საბჭოს სხდომა გაიმართა. შეხვედრა კონკურენციის საკითხებსა და ორგანიზაციის წევრი ქვეყნების ანტიმონოპოლიურ უწყებებს შორის თანამშრომლობას მიეძღვნა.

● ბაქოს კულტურათაშორისი დიალოგის ფორუმის მონაწილეებმა ყარაბაღის ქალაქები შუშა და აღდამი მოინახულეს. ვიზიტის მიზანი იყო ფორუმის მონაწილეებისთვის იმ მასშტაბური აღდგენითი პროგრამის შედეგების გაცნობა, რომელიც სომხეთის მიერ 30 წელზე მეტი ხნის ოკუპაციის შემდეგ გათავისუფლებულ ტერიტორიებზე ქალაქებისა და სოფლების აღდგენას ითვალისწინებს.

● ნატომ აზერბაიჯანის ორ საბრძოლო ვერტმფრენ Mi-17-1V-ზე Operational Capabilities Concept-ის პროგრამის ფარგლებში შესაბამისობის შეფასება დაასრულა. გავრცელებული ინფორმაციით, ნატოს შემფასებელმა ჯგუფმა მათ უმაღლესი შეფასება მიანიჭა.

● ტერორიზმის დაფინანსების, კრიმინალურ გაერთიანებაში მონაწილეობისა და რელიგიურ ნიადაგზე საზღვარგარეთ მოქმედ შეიარაღებულ დაჯგუფებებსა და კონფლიქტებში მონაწილეობის საქმეზე რვა პირს 8 წლითა და 6 თვითიდან 13 წლამდე პატიმრობა მიესაჯა. გამოძიების მტკიცებით, ოთხი მათგანი 2024 წელს ავღანეთის საზღვართან, პაკისტანის მთიან რაიონებში, საბრძოლო მომზადებას გადიოდა.

● შინაგან საქმეთა მინისტრმა ყველა დანაყოფს დაავალა, გააძლიერონ ინტერნეტის საშუალებით ნარკოტიკების გავრცელების წინააღმდეგ ბრძოლა. გავრცელებული ინფორმაციით, წლის პირველ ცხრა თვეში უკანონო ბრუნვიდან 6 ტონა და 443 კილოგრამი ნარკოტიკული ნივთიერება ამოიღეს – 1 ტონა და 780 კილოგრამით მეტი, ვიდრე გასული წლის ანალოგიურ პერიოდში.

● აზერბაიჯანმა ცხრა თვეში შვეიცარიაში ნავთობის ექსპორტი 3,6-ჯერ გაზარდა. შვეიცარიის წილი აზერბაიჯანის ნავთობის მთლიან ექსპორტში 1,72% იყო.

● ინტერესთა კონფლიქტის შესახებ კანონპროექტის ფარგლებში სახელმწიფო თანამდებობის პირებისთვის ახალი შეზღუდვების დაწესება განიხილება. ინიციატივა ითვალისწინებს მოხელეთა საქმიანობისა და შემოსავლების შეზღუდვას იმ შემთხვევებში, როდესაც მათმა პირადმა ან ოჯახურმა ინტერესებმა შესაძლოა სამსახურებრივი მოვალეობების შესრულებაზე გავლენა მოახდინოს.

მათ შორის, თანამდებობის პირებს შესაძლოა შეუზღუდონ უძრავი ქონების გაქირავებიდან დამატებითი შემოსავლის მიღებაც. ამის მიზეზი შეიძლება გახდეს შემთხვევა, როდესაც გაქირავებული ფართი ოფისად გამოიყენება იმ კომპანიის მიერ, რომელსაც სახელმწიფო უწყებებთან საქმიანი ურთიერთობები აქვს.

● აბშერონის რაიონის დასახლება ჯეირანბატანში სწავლის დროს რვა მოსწავლე შეუძლოდ გახდა და მათ სამედიცინო დახმარება აღმოუჩინეს. სურსათის უვნებლობის სააგენტომ გამოძიება დაიწყო. სავარაუდო მოწამვლის მიზეზი ჯერჯერობით დადგენილი არ არის.

● სახელმწიფო საინფორმაციო სააგენტო APA-ს ცნობით, აზერბაიჯანში ახალი ომბუდსმენის არჩევისთვის ემზადებიან.

● დღეს ბაქოში FIFA U-15-ის ისტორიაში პირველი მსოფლიო ჩემპიონატი და 15 წლამდე ფეხბურთელთა საფეხბურთო ფესტივალი სრულდება. გაიმართება ექვსი გადამწყვეტი მატჩი, რის შემდეგაც ოფიციალური დახურვის ცერემონია და გამარჯვებულთა დაჯილდოება შედგება.

ფინალისტებს ჯილდოებს პრეზიდენტი ილჰამ ალიევი გადასცემს. ტურნირი 24 ოქტომბერს დაიწყო და მასში 189 ეროვნული საფეხბურთო ასოციაციის 3 000-ზე მეტმა ახალგაზრდა ფეხბურთელმა და გუნდების წარმომადგენელმა მიიღო მონაწილეობა.

Over 180 teams and 900 matches ⚽

The FIFA U-15 World Cup & Festival all kicks off tomorrow in Baku 🙌🇦🇿 https://t.co/hWomeTLjGz

— FIFA (@FIFAcom) October 23, 2026

● 29 ოქტომბერს პარლამენტის სხდომაზე მომხდარი დეპუტატების ჩხუბი პარლამენტის ისტორიაში ყველაზე სკანდალურ ინციდენტად ფასდება. ამჯერად ოპოზიციისა და ხელისუფლების წარმომადგენლები ერთმანეთს არა მხოლოდ მუშტებით დაუპირისპირდნენ, არამედ ბოთლებსა და სკამსაც ესროდნენ. კიდევ უფრო დიდი გამოხმაურება მოჰყვა იმას, რომ პრემიერ-მინისტრმა თანაპარტიელებს მხარი დაუჭირა და ძალადობა მოიწონა.

„მივესალმები ფრაქცია „სამოქალაქო შეთანხმების“ დეპუტატების მოქმედებებს და მხარს ვუჭერ მათ. სკამით თუ სხვა რამით – ეს თანაზომიერი და სწორია“, – განაცხადა ნიკოლ ფაშინიანმა.

სოციალურ ქსელებში იხსენებენ, რომ სწორედ ამ პარლამენტმა რამდენიმე დღის წინ პირველი მოსმენით მიიღო ოჯახში ძალადობის წინააღმდეგ ბრძოლის შესახებ კანონპროექტი, რომლის ინიციატორიც ნიკოლ ფაშინიანის მეუღლე, ანა ჰაკობიანი იყო. ვრცლად აქ

● ადამიანის უფლებათა დამცველის აპარატმა განაცხადა, რომ მაღალი თანამდებობის პირების, მათ შორის დეპუტატების მხრიდან ძალადობის ნებისმიერი გამოვლინება ხელს უწყობს ძალადობის გამართლებას, რადგან საზოგადოება ამას უთანხმოების მოგვარების ნორმალურ ფორმად აღიქვამს. „პარლამენტში მომხდარი ინციდენტი სათანადო გამოძიების საგანი უნდა გახდეს“, – განაცხადა ომბუდსმენმა ანაიტ მანასიანმა.

● „როდესაც ვინმე ჩვენი დეპუტატის დარტყმას შეეცდება, პასუხს მიიღებს, თანაზომიერი იქნება ეს თუ არათანაზომიერი – მნიშვნელობა არ აქვს“, – განუცხადა ჟურნალისტებს მმართველი პარტიის წარმომადგენელმა, პარლამენტის ვიცე-სპიკერმა ვაჰაგნ ალექსანიანმა, რომელმაც სკამი ოპოზიციის მიმართულებით ისროლა. ალექსანიანმა თქვა, რომ ნახა სოციალურ ქსელებში გავრცელებული მემები, რომლებშიც სკამის სროლის მომენტია ასახული, და აღნიშნა, რომ მათ იუმორით უყურებს.

● საგარეო საქმეთა მინისტრის მოადგილე მნაცაკან საფარიანი ინდოეთში ვიზიტით იმყოფება. ის შეხვდა ინდოეთის მრეწველობის კონფედერაციის, ინვესტიციების ხელშეწყობის სააგენტო Invest India-სა და ფარმაცევტული პროდუქციის ექსპორტის ხელშეწყობის ინდოეთის საბჭოს Pharmexcil-ის წარმომადგენლებს. შეხვედრებზე განიხილეს ორმხრივი სავაჭრო-ეკონომიკური და საინვესტიციო თანამშრომლობა საინფორმაციო და მაღალტექნოლოგიურ სფეროებში, ჯანდაცვასა და ფარმაცევტიკაში, ინფრასტრუქტურისა და სატრანსპორტო კავშირების მიმართულებით.

● ნიკოლ ფაშინიანი ერევანში სლოვენიის საგარეო საქმეთა მინისტრ ტონე კაიზერს შეხვდა. შეხვედრაზე ხაზი გაესვა პოლიტიკური დიალოგის გააქტიურებისა და სხვადასხვა სფეროში თანამშრომლობის გაფართოების მნიშვნელობას. ასევე აღინიშნა მაღალი დონის ორმხრივი ვიზიტების ორგანიზების აუცილებლობა.

● ფინანსთა მინისტრი ვაჰე ჰოვანისიანი ერევანში საუდის არაბეთის დელეგაციას შეხვდა, რომელსაც პრინცი აბდულაზიზ ბინ ტალალ ალ საუდი ხელმძღვანელობდა. ის არაბეთის ყურის ქვეყნების განვითარების პროგრამის (AGFUND) და პრინც ტალალის სახელობის საერთაშორისო პრემიის კომიტეტის ხელმძღვანელია. შეხვედრაზე განათლების განვითარებისა და მცირე და საშუალო ბიზნესის მხარდაჭერის მიმართულებით თანამშრომლობა განიხილეს. გავრცელებული ინფორმაციით, განსაკუთრებული ყურადღება გამახვილდა გზავნილზე: „განვითარება ვერ დაელოდება მსოფლიოში მშვიდობის დამყარებას. თანამშრომლობისა და ადამიანებში ინვესტირების გზით შეგვიძლია მყარი მშვიდობის პირობები შევქმნათ“.

● ხელისუფლებამ ყარაბაღის საზოგადოებრივ ორგანიზაციებს უარი უთხრა, COP17-ის მწვანე ზონაში პავილიონის სახით ყოფილიყვნენ წარმოდგენილი. როგორც მთიანი ყარაბაღის ყოფილი არაღიარებული რესპუბლიკის ყოფილმა სახელმწიფო მინისტრმა და ყოფილმა ომბუდსმენმა არტაკ ბეგლარიანმა განაცხადა, მათთვის უარის მიზეზები არ განუმარტავთ. ბეგლარიანის თქმით, კონფერენციის ფარგლებში ორგანიზაციები გეგმავდნენ, წარმოედგინათ საკითხები, რომლებიც ყარაბაღელი სომხების უფლებების აღდგენასა და „აზერბაიჯანის მიერ ოკუპაციის დროს ყარაბაღის ბუნებრივი და კულტურული ლანდშაფტის წინააღმდეგ ჩადენილ გენოციდურ ქმედებებს“ ეხებოდა.

● დამტკიცდა იმ პროდუქციის ჩამონათვალი, რომელიც შესაბამისი საპილოტე პროგრამის ფარგლებში მარკირებას დაექვემდებარება. პროგრამა საკონდიტრო ნაწარმს, ნახევარფაბრიკატებსა და გაყინულ პროდუქტებს შეეხება. „აბსოლუტურად ყველაფერი სათანადო მარკირებით უნდა იყიდებოდეს“, – ასე განსაზღვრა ამოცანა პრემიერ-მინისტრმა მთავრობის სხდომაზე.

● საქართველო-სომხეთის საზღვარზე საქართველოში არადეკლარირებული ოქროს პარტიის უკანონოდ შემოტანის მცდელობა აღკვეთეს. საქართველოს ფინანსთა სამინისტროს ინფორმაციით, ოქროს ღირებულება დაახლოებით 225 ათასი დოლარია. სხვადასხვა ზომის ოქროს ზოდები წინდებსა და ფეხსაცმელში იყო დამალული.

● ერევანში, საკანალიზაციო მილების გაყვანის სამუშაოების დროს გათხრილ თხრილში მიწა ჩამოიშალა. ერთი ადამიანი დაიღუპა, მეორე კი საავადმყოფოში გადაიყვანეს.

●  4 ოქტომბრის საქმეზე მსჯავრდებულ მურთაზ ზოდელავას, ლაშა ბერიძეს, გური ჟვანიასა და ირაკლი ჩხვირკვიას საპროცესო შეთანხმება გაუფორმდათ. სააპელაციო სასამართლოში მოსამართლე მზია ლომთათიძის მიერ დამტკიცებული შეთანხმებით, ოთხივეს 3 წლითა და 1 თვით თავისუფლების აღკვეთა შეეფარდა, საიდანაც 1 წელი და 1 თვე რეალურად მოსახდელია, 2 წელი კი პირობითია. ზოდელავა და ბერიძე ციხეს 4 ნოემბერს დატოვებენ, ჩხვირკვია 6 ნოემბერს, ჟვანია კი 16 ნოემბერს.
პირველი ინსტანციით ზოდელავასა და ბერიძეს 7-7 წელი ჰქონდათ მისჯილი, ჩხვირკვიასა და ჟვანიას 5-5 წელი. საპროცესო შეთანხმება იმავე სხდომაზე კონსტანტინე კოკაიამ, კახაბერ მჟავანაძემ და დავით სტურუამაც ითხოვეს.

●  საკონსტიტუციო სასამართლოში ხუთი ოპოზიციური პარტიის არაკონსტიტუციურად ცნობის საქმეზე ახსნა-განმარტებები „კოალიცია ცვლილებისთვის“ წარმომადგენლებმა წარადგინეს. მაია კოპალეიშვილმა სასამართლოს სთხოვა, სარჩელი არ დააკმაყოფილოს და საპარლამენტო კომისიის დასკვნაში მოყვანილი ფაქტები გამოკვლევის გარეშე დადგენილად არ მიიჩნიოს. გიგა ლემონჯავას თქმით, „ქართული ოცნების“ სარჩელში რუსეთის საგარეო და უსაფრთხოების დოქტრინის ჩანაწერები მეორდება; სასამართლოს თავმჯდომარე რევაზ ნადარაიამ მისი სიტყვა არაეთიკურად შეაფასა და გამოსვლა შეაწყვეტინა.
განხილვა 29 ოქტომბერს, 11:00 საათზე გაგრძელდება. მოსალოდნელია, რომ ახსნა-განმარტებას ნიკა გვარამია წარადგენს.

●   პარლამენტმა დაჩქარებული წესით, მესამე მოსმენით მიიღო კანონპროექტი, რომლითაც სამორინეებს საერთაშორისო აზარტული ტურნირების მოწყობის უფლება ეძლევათ. მხარი 73 დეპუტატმა დაუჭირა, წინააღმდეგი 5 იყო. განხილვისას ტურნირის მონაწილეებში უცხოელთა მინიმალური წილი 70%-დან 80%-მდე გაიზარდა, ხოლო უნებართვო ტურნირისთვის 150 000 ლარიანი ჯარიმა კანონპროექტიდან ამოიღეს. 3 მილიონ ლარზე მეტი საპრიზო ფონდის ტურნირებიდან უცხოელების შემოსავალი არ დაიბეგრება.
კანონპროექტს სახალხო დამცველი ეწინააღმდეგებოდა. ვანისა და ბაღდათის მიტროპოლიტ ანტონის თქმით, საპატრიარქო საკითხზე 30 ოქტომბერს შეიკრიბება და პოზიციას გამოხატავს.

●  პარლამენტმა დაჩქარებული წესით, მესამე მოსმენით მიიღო ცვლილებები, რომლითაც სემეკი საყოფაცხოვრებო მომხმარებლებისთვის წყლისა და ბუნებრივი აირის ტარიფებს მოხმარებული მოცულობის მიხედვით დიფერენცირებულად დაადგენს. ცვლილებებს 75 დეპუტატმა დაუჭირა მხარი, 5 წინააღმდეგი იყო. წყალზე ეს უფლებამოსილება 2036 წლის 1 იანვრამდე იმოქმედებს, გაზზე კი 2038 წლის 1 იანვრამდე.

დეპუტატ შოთა ბერეკაშვილის თქმით, მიზანია, ვინც ნაკლებს მოიხმარს, ნაკლები გადაიხადოს. ოპოზიციონერი ლაშა ფარულავა ტარიფების ცვლილების შეჩერებას ითხოვს.

●  ეროვნული ბანკის საბჭოს წევრმა ნანა ყეინიშვილმა პარლამენტს თანამდებობის დატოვების თაობაზე განცხადებით მიმართა. პარლამენტის თავმჯდომარე შალვა პაპუაშვილის თქმით, რეგლამენტის მიხედვით ის თანამდებობას 29 დეკემბერს დატოვებს. პროკურატურა რადიო თავისუფლების ჟურნალისტური გამოძიების შემდეგ ყეინიშვილის შესაძლო უკანონო სამეწარმეო საქმიანობას იძიებს, თავად ის ბრალდებებს უარყოფს. ეროვნული ბანკის პრეზიდენტმა ნათია თურნავამ განაცხადა, რომ ბანკმა პროკურატურას დროულად მიმართა.

●  პატიმარ დავით ფეიქრიშვილის დედა ნინო აბრამიშვილი და ყოფილი მეუღლე ანო ანანიაშვილი პროკურატურაში დასაკითხად მივიდნენ. აბრამიშვილი ითხოვს, რომ გლდანის ციხეში შვილის ცემის საქმეზე ძალადობის მუხლით დაწყებული გამოძიება ჯგუფური ძალადობის მუხლით გადაკვალიფიცირდეს. ოჯახი ციხის ხელმძღვანელის, რამაზ ფირცხალავას, თანამდებობიდან გათავისუფლებას ითხოვს.

●  ადამიანის უფლებათა ევროპულმა სასამართლომ ნინო დათაშვილის წინასწარი პატიმრობისა და იძულებითი ფსიქიატრიული ექსპერტიზის საქმის განხილვა დაიწყო, იუწყება ორგანიზაცია „პარტნიორობა ადამიანის უფლებებისთვის“. დათაშვილს 2025 წლის ივნისში, თბილისის საქალაქო სასამართლოში აქტივისტების საქმის სხდომაზე დასწრების შემდეგ, მოხელეზე თავდასხმის ბრალი წაუყენეს და პატიმრობა შეუფარდეს. ბრალდების შუამდგომლობით მას სტაციონარული ფსიქიატრიული ექსპერტიზა დაენიშნა. საქმე ევროპული კონვენციის მე-5 და მე-8 მუხლებს ეხება.

●  პარლამენტმა მესამე მოსმენით მიიღო ცვლილებები, რომლითაც იძულებითი ფსიქიატრიული მკურნალობის საფუძვლების არსებობას ფსიქიატრიული დაწესებულების კომისია ორ თვეში ერთხელ გადახედავს, ექვს თვეში ერთხელ კი ამას სასამართლო შეამოწმებს. „ქართული ოცნების“ დეპუტატების თქმით, ცვლილებები საკონსტიტუციო სასამართლოს გადაწყვეტილებას მოჰყვა.

●  სამხრეთ აფრიკის ხელისუფლებამ დურბანში სულ მცირე ხუთი ბაობაბის ტრანსპორტირება შეაჩერა, რომლებიც Daily Maverick-ის ცნობით, საქართველოში ლანდშაფტური პროექტისთვის იყო განკუთვნილი. ქვეყნის გარემოს დაცვის უწყების განცხადებით, ხეების ამოღებისა და ექსპორტის მოქმედი ნებართვა არ არსებობდა და საქმეზე სისხლის სამართლის გამოძიება მიმდინარეობს. მყიდველის ვინაობა არ გასაჯაროებულა.

● ბაქოში მეშვიდე კლასის მოსწავლე გოგონა დაიღუპა – ის სკოლის მეოთხე სართულიდან ფანჯრიდან გადავარდა. ადგილობრივი მედიის ცნობით, გოგონას დედა სამი წლის წინ ავტოკატასტროფაში დაეღუპა, თავად კი ბაქოში დეიდასთან ცხოვრობდა. თანაკლასელების თქმით, გოგონა თვითმკვლელობაზე საუბრობდა. ეს ვერსია ოფიციალურად დადასტურებული არ არის. დაწყებულია გამოძიება.

● ადგილობრივი მედიის ინფორმაციით, ტელეკომპანია Real TV-ის გადამღებ ჯგუფს სკოლის შენობასთან ფიზიკურად გაუსწორდნენ. გავრცელებული ცნობით, კონფლიქტი სკოლის დაცვის თანამშრომლის მხრიდან პროვოკაციას მოჰყვა, რის შემდეგაც ჟურნალისტებს უცნობი პირები დაესხნენ თავს. ოპერატორმა სხეულის დაზიანებები მიიღო. ტელეკომპანიის პოლიციაში მიმართვის შემდეგ ეჭვმიტანილები დააკავეს. მიმდინარეობს გამოძიება.

● ნორვეგიის ჰელსინკის კომიტეტმა სამედიცინო და ჰუმანიტარული საფუძვლებით მოითხოვა, Meydan TV-ის მთავარი რედაქტორი აინურ ელგიუნეში პატიმრობიდან დაუყოვნებლივ გაათავისუფლონ. ორგანიზაციის განცხადებით, 51 წლის ჟურნალისტს არაერთი ოპერაცია აქვს გადატანილი და სპეციალიზებული სამედიცინო დახმარება ესაჭიროება. ადვოკატებისა და ოჯახის წევრების ინფორმაციით, ბოლო კვირებში მისი ჯანმრთელობის მდგომარეობა გაუარესდა და თირკმელთან დაკავშირებული სერიოზული პრობლემის გამო სასწრაფო ოპერაცია სჭირდება.

Meydan TV-ის საქმეზე 12 ჟურნალისტს ასამართლებენ. მათ ვალუტის კონტრაბანდასა და სხვა დანაშაულებს ედავებიან. ყველა მათგანი ბრალს უარყოფს და სისხლისსამართლებრივ დევნას ხელისუფლების მიმართ კრიტიკულ პუბლიკაციებს უკავშირებს.

● პრეზიდენტის ადმინისტრაციის ყოფილ ხელმძღვანელს, რამიზ მეჰტიევს, რომელსაც 14 წლით თავისუფლების აღკვეთა მიესაჯა, მეცნიერებათა ეროვნული აკადემიის წევრობა შეუწყვიტეს. მას სახელმწიფო ღალატსა და სხვა დანაშაულებში ედება ბრალი. [ვრცლად აქ]

● ბაქოში კულტურათაშორისი დიალოგის მეშვიდე მსოფლიო ფორუმი დასრულდა. დღეს მონაწილეები ყარაბაღში გაცნობითი ხასიათის ვიზიტით გაემგზავრებიან. დახურვის ცერემონიას დაესწრნენ ცივილიზაციათა ალიანსის საკითხებში გაეროს უმაღლესი წარმომადგენელი მიგელ ანხელ მორატინოსი და აზერბაიჯანის კულტურის მინისტრი ადილ ქერიმლი.

● აზერბაიჯანი შეუერთდა მექის კონვენციას, რომელიც ისლამური თანამშრომლობის ორგანიზაციის წევრი ქვეყნების სამართალდამცავ ორგანოებს შორის კორუფციასთან ბრძოლის სფეროში თანამშრომლობას ითვალისწინებს. კონვენციას ხელი ბაქოში, ორგანიზაციის წევრი ქვეყნების ანტიკორუფციული უწყებების ხელმძღვანელთა შეხვედრაზე მოეწერა. დოკუმენტს ტაჯიკეთმაც მოაწერა ხელი.

ფორუმში 46 ქვეყნისა და რვა საერთაშორისო ორგანიზაციის 250-ზე მეტი წარმომადგენელი მონაწილეობდა. კონვენცია ქმნის სამართლებრივ საფუძველს კორუფციული დანაშაულების გამოძიებისა და ეჭვმიტანილთა სისხლისსამართლებრივი დევნის პროცესში ინფორმაციისა და მტკიცებულებების გაცვლისთვის.

● შეხვედრის ფარგლებში აზერბაიჯანის გენერალურმა პროკურორმა მაროკოსა და ერაყის ანტიკორუფციულ უწყებებთან ორმხრივ თანამშრომლობის მემორანდუმებსაც მოაწერა ხელი.

● ბაქოში გამართულ შეხვედრაზე აზერბაიჯანსა და ნატოს შორის სამხედრო თანამშრომლობის განვითარება განიხილეს. შეხვედრაში მონაწილეობდნენ აზერბაიჯანის საჰაერო ძალების მეთაურის მოადგილე ზაურ რუსტამოვი და ნატოს ევროპაში გაერთიანებული ძალების შტაბის ბრიგადის გენერალი თეოდოროს სტეფუ.

შეხვედრა ნატოს Operational Capabilities Concept-ის პროგრამის ფარგლებში აზერბაიჯანის ორი Mi-17-1B ტიპის ვერტმფრენის ალიანსის მოთხოვნებთან შესაბამისობის შეფასების შემდეგ გაიმართა. პროგრამა, სხვა საკითხებთან ერთად, სამშვიდობო ოპერაციებში მონაწილე ძალების თავსებადობის გაუმჯობესებასაც ისახავს მიზნად.

● სომხეთის პარლამენტმა აშშ-სთან სტრატეგიული თანამშრომლობის ჩარჩო შეთანხმების რატიფიცირება მოახდინა სატრანზიტო პროექტის, „ტრამპის მარშრუტის“ (TRIPP) ფარგლებში. აზერბაიჯანისთვის პროექტი მნიშვნელოვანია, რადგან ის სომხეთის ტერიტორიის გავლით ქვეყანას ნახიჩევანის ავტონომიურ რესპუბლიკასთან სახმელეთო კავშირით უზრუნველყოფს.

● თურქეთში დააკავეს, შემდეგ კი გაათავისუფლეს გამოცემა Köklü Değişim Medya-ს თანამშრომელი მუჰამედ ემინ ილდირიმი. მისი განცხადებით, მას სოციალურ ქსელებში გამოქვეყნებული პოსტების გამო დევნიან. პოსტებში ის აკრიტიკებდა აზერბაიჯანის სკოლებში სასკოლო ფორმის ახალი წესებით დაწესებულ შეზღუდვებს, რომლებიც, ფაქტობრივად, სკოლებში ჰიჯაბის ტარებას კრძალავს.

ილდირიმი იმ 31 თურქეთის მოქალაქეს შორისაა, რომლებსაც აზერბაიჯანმა ქვეყანაში შესვლა აუკრძალა. ბაქოს განმარტებით, აკრძალვის მიზეზი მათი პუბლიკაციებია, რომლებიც აზერბაიჯანის სუვერენიტეტის, ეროვნული უსაფრთხოებისა და კონსტიტუციური წყობის წინააღმდეგ არის მიმართული. აქტივისტმა ფათიჰ ერშაჰინმა განაცხადა, რომ პოლიციაში დაკითხვაზე დაიბარეს. ისიც ამ სიაშია.

კონტექსტი. დაკავებები ორ ქვეყანას შორის ურთიერთობების გამწვავების ფონზე ხდება. თურქულ მედიასა და სოციალურ ქსელებში მკვეთრად აკრიტიკებენ არა მხოლოდ აზერბაიჯანის სკოლებში ჰიჯაბის ტარების აკრძალვას, არამედ აზერბაიჯანის თანამშრომლობას ისრაელთანაც. ბაქოში კი ოფიციალურ დონეზე და მედიაში საპასუხო მკაცრი განცხადებები გაკეთდა, რომ ქვეყნის საშინაო საქმეებში ჩარევა დაუშვებელია.

● პრეზიდენტმა ილჰამ ალიევმა ესპანეთს სამძიმარი გამოუცხადა სარკინიგზო კატასტროფის გამო, რომელსაც ათობით ადამიანი ემსხვერპლა.

● ბრატისლავასა და ბაქოს შორის Wizz Air-მა პირდაპირი ავიარეისი აამოქმედა. ფრენები კვირაში ორჯერ შესრულდება.

● პარლამენტმა აშშ-სთან სატრანზიტო პროექტის, „ტრამპის მარშრუტის“ (TRIPP) შესახებ ჩარჩო შეთანხმების რატიფიცირება მოახდინა. პროექტი სომხეთის ტერიტორიის გავლით აზერბაიჯანიდან მის ავტონომიურ რესპუბლიკა ნახიჩევანამდე გზის გახსნას ითვალისწინებს.

პროექტს მხარი მხოლოდ მმართველი ფრაქციის დეპუტატებმა დაუჭირეს. ორმა პრორუსულმა ოპოზიციურმა ფრაქციამ მის წინააღმდეგ მისცა ხმა. მათი განცხადებით, დოკუმენტში აშშ-ისა და აზერბაიჯანის ინტერესებია გათვალისწინებული, სომხეთის ინტერესები კი – არა.

„აშშ რეგიონში, კერძოდ, ირანთან საზღვრის გასწვრივ, უმნიშვნელოვანეს სტრატეგიულ მონაკვეთზე პირდაპირ ყოფნას უზრუნველყოფს. აზერბაიჯანი კი ნახიჩევანსა და ქვეყნის დანარჩენ ნაწილს შორის კავშირს ამყარებს – ეს მიზანი დიდი ხანია, როგორც აზერბაიჯანს, ისე თურქეთს აქვს“, – განაცხადა დეპუტატმა ანა გრიგორიანმა. ვრცლად აქ

● ვიცე-პრემიერმა მჰერ გრიგორიანმა განმარტა, რას მოიცავს TRIPP-ის პროექტი. მისი ინფორმაციით, საუბარია 5-6 ინფრასტრუქტურულ ობიექტზე, რომლებიც კონცესიის საფუძველზე მართვაში გადაეცემა. მომავალში მათ შორის გაზისა და ნავთობის მილსადენებიც იქნება, თუმცა ისინი სხვადასხვა ადგილას განთავსდება.

მინისტრის თქმით, TRIPP-ის ფარგლებში რკინიგზა იმ ძველ სარკინიგზო ხაზს გაჰყვება, რომელიც საბჭოთა პერიოდში სომხეთსა და აზერბაიჯანს აკავშირებდა. რკინიგზა ერთლიანდაგიანი იქნება.

გრიგორიანის განცხადებით, სომხეთის ტერიტორიაზე პროექტის მარშრუტის სიგრძე დაახლოებით 42 კილომეტრია და ამ მონაკვეთზე კერძო მიწის ნაკვეთები არ არის. მან ხაზი გაუსვა, რომ გზას რეგიონული მნიშვნელობა უნდა ჰქონდეს, წინააღმდეგ შემთხვევაში ის კონკურენტუნარიანი ვერ იქნება.

● საგარეო საქმეთა მინისტრმა არარატ მირზოიანმა ოპოზიციის ბრალდებების საპასუხოდ TRIPP-ის სატრანზიტო პროექტის შინაარსი განმარტა.

„სომხეთის ტერიტორიაზე გამავალ სარკინიგზო მონაკვეთს აქვს დასაწყისი და დასასრული, მოძრაობა მარჯვნივ და მარცხნივ, რადგან ის საიდანღაც უნდა მოდიოდეს და სადღაც მიდიოდეს“, – განაცხადა მინისტრმა.

● პრემიერ-მინისტრმა ნიკოლ ფაშინიანმა კიდევ ერთხელ განაცხადა, რომ არაერთხელ განუმარტავს როგორც ყველა საერთაშორისო პარტნიორს, ისე აზერბაიჯანს მოლაპარაკებების დროს, რომ სომხეთის ხელისუფლება ქვეყნის კონსტიტუციასთან დაკავშირებული საკითხების განხილვას მათთან არ აპირებს.

„იქმნება შთაბეჭდილება, რომ განცხადებები იმის შესახებ, თითქოს კონსტიტუციაში ცვლილებები აზერბაიჯანის მოთხოვნით ხორციელდება, სომხეთში სიტუაციის დესტაბილიზაციის მიზნით კეთდება. ეს მტკიცებები ოპოზიციის დღის წესრიგს აძლიერებს“, – განაცხადა ფაშინიანმა.

ახალი კონსტიტუციის მიღება მთავრობის პროგრამაშია შეტანილი და ხელისუფლება ამ გზას თანმიმდევრულად გაჰყვება.

„აზერბაიჯანს ვეუბნებით: კონსტიტუცია ჩვენი შიდა საქმეა და მის განხილვას მხოლოდ სომხეთის ხალხთან ვაპირებთ. უახლოეს მომავალში კონსტიტუციის ტექსტი გამოქვეყნდება და განხილვები დაიწყება“, – განაცხადა პრემიერმა.

● „სომხეთი იზოლირებული იქნება, სანამ მეზობლებთან – ირანთან, საქართველოსთან, აზერბაიჯანსა და თურქეთთან – ნორმალური ურთიერთობები არ ექნება“, – განაცხადა ნიკოლ ფაშინიანმა.

მისი თქმით, ოპოზიციას ისეთი სამშვიდობო შეთანხმების დადება სურს, რომლის შედეგადაც სომხეთი ყველაფერს მიიღებს, აზერბაიჯანი კი – არაფერს.

„რატომ აკეთებენ ამას? იმიტომ, რომ საკუთარ ფულს იცავენ. მათი ფული დაბლოკეს და უთხრეს, რომ სანამ სომხეთს იზოლირებულ მდგომარეობაში არ დააბრუნებენ, უსახლკაროები იქნებიან. სწორედ ამიტომ იცავენ საკუთარ თავს. საზოგადოებაში ბევრი აჰყვა მათ დღის წესრიგს.

უკვე ერთი წელია, აზერბაიჯანიდან სომხეთში მატარებლები მოძრაობს. თქვენ გინდათ, რომ ისინი გავაჩეროთ? ჩვენ აზერბაიჯანთან და თურქეთთან ურთიერთობების ნორმალიზების გზას ვადგავართ, რათა იზოლაცია დავძლიოთ. ჩვენს მოქმედებებში არაფერია საიდუმლო – ყველაფერი საჯაროდ ხდება“, – განაცხადა პრემიერმა.

● რუსეთის საგარეო საქმეთა სამინისტროს წარმომადგენელმა მარია ზახაროვამ „აგრესიული“ უწოდა პრემიერ-მინისტრ ნიკოლ ფაშინიანის რეაქციას ევრაზიული ეკონომიკური კავშირის (რომელსაც რუსეთი ხელმძღვანელობს) ანგარიშზე. ანგარიშში საუბარი იყო იმ მასშტაბურ დანაკარგებზე, რომლებიც სომხეთს კავშირიდან გარიცხვის შემთხვევაში ემუქრება.

ფაშინიანმა ანგარიშის შესახებ განაცხადა: „ჩვენს ისტორიაში პირველად ხდება, რომ მეტროპოლია კი არ გვიზიდავს თავისკენ, არამედ ირიბად გვეუბნება – გარიცხავთო“.

„მთელი ეს აგრესიული, ემოციური რიტორიკა რეალობას არ შეესაბამება და სომხეთის საზოგადოება შეცდომაში შეჰყავს“, – განაცხადა ზახაროვამ საპასუხოდ.

● საგარეო საქმეთა მინისტრმა არარატ მირზოიანმა ოპოზიციას მიმართა:

„გსურთ, ხელისუფლებას ჩამოგვაშოროთ? დიახ, გსურთ. თქვენ სამხედრო გადატრიალების მოწყობა სცადეთ, სასულიერო-ფეოდალური მოძრაობის ორგანიზება სცადეთ, თავდასხმის მოწყობა სცადეთ, ზოგიერთი კი ჩემს მოკვლას ცდილობდა. მაგრამ ხელისუფლებიდან ჩვენს ჩამოშორებას მხოლოდ ერთი გზით შეძლებთ – არჩევნებში გამარჯვებით“.

● მმართველი პარტიის წარმომადგენელმა და პარლამენტის ვიცე-სპიკერმა ვააგნ ალექსანიანმა აზერბაიჯანის პრეზიდენტის თანაშემწის, ჰიქმეთ ჰაჯიევის განცხადება შეაფასა. ჰაჯიევის თქმით, „სომხეთმა და სომხურმა საზოგადოებამ აზერბაიჯანელებს ბოდიში უნდა მოუხადონ“.

„კონფლიქტი სულ ახლახან დასრულდა, ჭრილობები ჯერ კიდევ ახალია. ჩვენი ამოცანაა, ასეთ განცხადებებს დიპლომატიურად ვუპასუხოთ ან საერთოდ არ ვუპასუხოთ – ესეც დიპლომატიის ნაწილია. არის განცხადებები, რომლებსაც ხშირად სამშვიდობო პროცესის ჩაშლის მცდელობად შეიძლება შევხედოთ. უნდა ვუპასუხოთ თუ არა ასეთივე პროცესის ჩამშლელი განცხადებებით? ეს ყველაზე ცუდი იქნება, რისი გაკეთებაც შეგვიძლია. საჭიროა მშვიდი და დიპლომატიური მუშაობა“, – განაცხადა ალექსანიანმა.

მან დასძინა, რომ „აზერბაიჯანელ კოლეგებს, თავის მხრივ, შეუძლიათ ციტირება გაუკეთონ სომხეთის ოპოზიციურად განწყობილი თანამდებობის პირების განცხადებებს“.

● სლოვენიის საგარეო საქმეთა მინისტრი ტონე კაიზერი სომხეთს ეწვია. საგარეო საქმეთა მინისტრ არარატ მირზოიანთან მოლაპარაკებებისას მხარეებმა პოლიტიკური დიალოგის გაფართოების შესახებ ურთიერთგაგების მემორანდუმს მოაწერეს ხელი. დღეს სომხეთ-სლოვენიის ბიზნესფორუმი გაიმართება.

● ევროკავშირთან სავიზო რეჟიმის ლიბერალიზაცია ამ ეტაპზე უფრო მეტად სომხეთზეა დამოკიდებული, – განაცხადა საგარეო საქმეთა მინისტრმა არარატ მირზოიანმა სლოვენიელ კოლეგა ტონე კაიზერთან ერთობლივ პრესკონფერენციაზე.

მისი თქმით, აქამდე პროცესი საკმაოდ სწრაფი ტემპით მიმდინარეობდა, შემდგომი პროგრესი კი საკანონმდებლო რეფორმებსა და ტექნიკურ პროცესებზეა დამოკიდებული.

● არარატ მირზოიანმა შეახსენა საზოგადოებას, რომ ევროპის საბჭოს საპარლამენტო ასამბლეის (PACE) ანგარიშის თანახმად, სომხეთში ივნისში ჩატარებული საპარლამენტო არჩევნები მაღალ ევროპულ სტანდარტებს შეესაბამებოდა. „ანგარიშში ნახსენები დარღვევები სამართალდამცავი ორგანოების რეაქციაა ამომრჩეველთა მოსყიდვის მცდელობებზე და მოხარულები ვართ, რომ სამართალდამცველები ამ მიმართულებით ზომებს იღებენ“, – განაცხადა მინისტრმა.

● პრემიერ-მინისტრი ნიკოლ ფაშინიანი საუდის არაბეთის პრინც აბდულაზიზ ბინ ტალალ ალ საუდის ხელმძღვანელობით ჩამოსულ დელეგაციას შეხვდა. ფაშინიანმა ხაზი გაუსვა ოთხშაბათს საღამოს ერევანში გამართული პრინც ტალალის სახელობის ადამიანური განვითარების საერთაშორისო პრემიის გადაცემის ცერემონიის მნიშვნელობას.

● ეროვნულმა ასამბლეამ პირველი მოსმენით დაამტკიცა პრემიერ-მინისტრის მეუღლის, ანა ჰაკობიანის, საკანონმდებლო ინიციატივა „ოჯახში და ყოფით ურთიერთობებში ძალადობის პრევენციისა და ოჯახში და ყოფით ურთიერთობებში ძალადობის მსხვერპლთა დაცვის შესახებ“, ასევე მასთან დაკავშირებულ კანონებში შესატანი ცვლილებები. ინიციატივას მხარი მმართველი პარტიის 62-მა დეპუტატმა დაუჭირა.

● ნიკოლ ფაშინიანმა ჩეხეთის პრემიერ-მინისტრ ანდრეი ბაბიშს დამოუკიდებლობის დღე მიულოცა და სომხეთში ვიზიტით მიიწვია.

● ერევანში საცხოვრებელი სახლის ნაწილი ჩამოინგრა. დაშავდა ხანდაზმული ცოლ-ქმარი, რომლებიც საავადმყოფოში გადაიყვანეს. ნგრევის მიზეზი ჯერჯერობით უცნობია.

● ყურძნის შესყიდვის პროცესი 99%-ით დასრულდა. შესყიდულია 201 ათასი ტონა ყურძენი, დარჩენილია დაახლოებით 1 500-2 000 ტონა. ამის შესახებ სომხეთის ეკონომიკის მინისტრმა გევორგ პაპოიანმა განაცხადა.

„სუფრის ყურძნის დაახლოებით ამდენივე რაოდენობაა დარჩენილი. საჯარო სივრცეში გამოთქმული საჩივრები, სულ მცირე, მე არ შემიმჩნევია“, – აღნიშნა მან. მინისტრის თქმით, დარჩენილი მოსავლის შესყიდვა მომდევნო 3-4 დღის განმავლობაში დასრულდება.

●  საკონსტიტუციო სასამართლოში ხუთი ოპოზიციური პარტიის არაკონსტიტუციურად ცნობის საქმეზე ახსნა-განმარტებები „ერთიანმა ნაციონალურმა მოძრაობამ“ წარადგინა. ანა წითლიძემ სარჩელს პოლიტიკური მანიპულაცია უწოდა, ლევან ბეჟაშვილის თქმით კი, სარჩელი შეიძლება 2008 წლის ომზე პასუხისმგებლობის საქართველოსთვის დაკისრებას დაემსახუროს.

სარჩელს 88 დეპუტატი აწერს ხელს. განხილვა 28 ოქტომბერს, 11:00 საათზე, „კოალიცია ცვლილებისთვის“ ახსნა-განმარტებებით გაგრძელდება.

●  პარლამენტმა დაჩქარებული წესით, პირველი მოსმენით მიიღო კანონპროექტი, რომლითაც სამორინეებს საერთაშორისო აზარტული ტურნირების მოწყობის უფლება მიეცემათ. მხარი 79 დეპუტატმა დაუჭირა, წინააღმდეგი 8 იყო. ტურნირის მონაწილეთა სულ მცირე 70% უცხოელი უნდა იყოს, ხოლო 3 მილიონ ლარზე მეტი საპრიზო ფონდის შემთხვევაში ორგანიზატორი სათამაშო ბიზნესის მოსაკრებლისგან თავისუფლდება.

სახალხო დამცველი პარლამენტს კანონპროექტის მიღებისგან თავის შეკავებისკენ მოუწოდებს, რადგან, მისი თქმით, საზოგადოებრივ ჯანმრთელობაზე გავლენა არ შეფასებულა. მეორე და მესამე მოსმენა 28 ოქტომბერს იგეგმება.

●  პარლამენტი დაჩქარებული წესით განიხილავს კანონპროექტს, რომლითაც სემეკს საყოფაცხოვრებო მომხმარებლებისთვის გაზისა და წყლის ტარიფების მოხმარებული მოცულობის მიხედვით დიფერენცირების უფლება მიეცემა. წყალზე ეს წესი 2036 წლის 1 იანვრამდე, გაზზე კი 2038 წლის 1 იანვრამდე იმოქმედებს. განმარტებით ბარათში მიზნად მოწყვლადი ჯგუფების სოციალური ინტერესების დაცვაა დასახელებული. ელექტროენერგიაზე მსგავსი საფეხურებრივი სისტემა 2003 წლიდან მოქმედებს.

●  თბილისის საქალაქო სასამართლოს მოსამართლემ ნინო ენუქიძემ აქტივისტი თორნიკე რაზმაძე წვრილმანი ხულიგნობისთვის 3 ათასი ლარით დააჯარიმა. შსს-ის ვერსიით, საქმე სოციალურ ქსელში დატოვებულ უხამს კომენტარს ეხება. კომენტარში რაზმაძე RT-ის ხელმძღვანელის, მარგარიტა სიმონიანის მისამართით უხამს სიტყვებს იყენებს.

●  იუსტიციის მინისტრის პაატა სალიას განცხადებით, გლდანის მე-8 პენიტენციური დაწესებულების დირექტორის თანამდებობიდან მოხსნის საკითხზე მსჯელობენ, თუმცა გადაწყვეტილება ჯერ მიღებული არ არის. პატიმარი დავით ფეიქრიშვილი ამბობს, რომ ამ დაწესებულებაში სავარაუდო კრიმინალურმა ავტორიტეტებმა სცემეს, პენიტენციურმა სამსახურმა ეს უარყო. მისი დედის, ნინო აბრამიშვილის, თქმით, პროკურატურის გამომძიებლებმა ფეიქრიშვილი ექვსი საათის განმავლობაში დაკითხეს. საქმეზე პროკურატურის რეკომენდაციის შემდეგ პენიტენციური სამსახურის უფროსმა გიორგი პატარიძემ თანამდებობა დატოვა.

●  ციხეებში ძალადობის გახშირებული ბრალდებები: Amnesty და საია დამოუკიდებელ გამოძიებას ითხოვენ.

Amnesty International და საია ერთობლივ განცხადებაში რამდენიმე საქმეს იხილავენ. პატიმარი გიორგი დავითაძე ამბობს, რომ რუსთავის №6 ციხეში თანამშრომლებმა მასზე სექსუალურად იძალადეს, მისი მხარდამჭერი პატიმრები კი ცემაზე საუბრობენ. პენიტენციური სამსახური ბრალდებებს უარყოფს, თუმცა დავით ფეიქრიშვილის ცემის საქმეზე პროკურატურის რეკომენდაციის შემდეგ სამსახურის ხელმძღვანელმა გიორგი პატარიძემ თანამდებობა დატოვა. ორგანიზაციების თქმით, „საქართველოს ხელისუფლებამ უნდა გაარღვიოს დაუსჯელობის ეს წრე“.

●  ევროკავშირის ოფისის განმარტებით, საქართველოსთვის გამოყოფილი 38 მილიონი ევრო ფერმერების, სოფლის მოსახლეობის, მცირე და საშუალო ბიზნესის, პროფესიული უნარების განვითარებისა და გენდერული ძალადობის მსხვერპლი ქალების მხარდაჭერას მოხმარდება. დახმარება ევროკავშირის წევრი ქვეყნების სააგენტოებისა და გაეროს ორგანიზაციების მეშვეობით განხორციელდება.

თანხა მთავრობას არ გადაეცემა. ეს არის ახალი პროექტების პაკეტი პროგრამით „ევროკავშირი შენთან“ (EUwithYou). ევროკავშირის ელჩმა პაველ ჰერჩინსკიმ ის პირველად 10 ოქტომბერს, კახეთში ევროპის დღის ღონისძიებაზე გამოაცხადა და თქვა, რომ პროექტების ხელმოწერას წლის ბოლომდე იმედოვნებენ, „მიუხედავად არსებული სირთულეებისა“. 16 ოქტომბრის განცხადებაში წარმომადგენლობამ ახსნა, რომ საქართველოში დემოკრატიული უკუსვლის გამო ევროკავშირი ქართულ ხელისუფლებას აღარ აფინანსებს, თუმცა მოსახლეობას დახმარებას უწევს კვლავ.

●  „მითების დეტექტორმა“ ხელისუფლების მხარდამჭერი ყალბი ანგარიშების ახალი ქსელი გამოავლინა.

წინა კვლევაში ორგანიზაციამ 434 ასეთი პროფილი აღმოაჩინა, ახლა კიდევ 445. მათი უმეტესობა 2026 წლის 25-26 აგვისტოს შეიქმნა, ფოტოების დიდი ნაწილი კი ხელოვნური ინტელექტითაა გენერირებული. ზოგიერთ ფოტოზე ეს შეუიარაღებელი თვალითაც ჩანს: ერთ-ერთი „მხარდამჭერი“ ჭიქას ექვსთითიანი ხელით იჭერს. „იმედისა“ და „რუსთავი 2-ის“ ფეისბუქგვერდებზე ეს ანგარიშები კოორდინირებულად იწონებდნენ კობახიძის, პაპუაშვილის, კალაძისა და ფილოსოფოს ზაზა შათირიშვილის პოსტებს, რომლებიც ოპოზიციის აკრძალვასა და დასავლეთის „ჩარევას“ ეხებოდა. ორგანიზაციის დასკვნით, ეს პრაქტიკა გრძელდება, მეთოდები კი იცვლება.

● „საერთაშორისო გამჭვირვალობა – საქართველოს“ ინფორმაციით, „ლილო მოლის“ 15 მეწილიდან 13 პოლიტიკური შემწირველია და პარტიებს ჯამში დაახლოებით 3.88 მილიონი ლარი შესწირეს, მათ შორის „ქართულ ოცნებას“ 2017-2026 წლებში 3.512 მილიონი ლარი. ორგანიზაციის მონაცემებით, მეწილეებთან დაკავშირებულმა კომპანიებმა სახელმწიფო შესყიდვებში 50 მილიონ ლარზე მეტი მოიგეს.

●  დადიანის ქუჩაზე, მე-10 საჯარო სკოლის მოსწავლეებმა და მშობლებმა გზა გადაკეტეს და სკოლის შენობის მშენებლობის დასრულებას ითხოვდნენ. მათთან ინფრასტრუქტურის მინისტრი რევაზ სოხაძე მივიდა და უთხრა, რომ პასუხისმგებლობას იღებს, სკოლაში სწავლა მომავალი წლის სექტემბერში დაიწყება, კონტრაქტორი კი მშენებლობას რამდენიმე დღეში განაახლებს.

●  თბილისში ძმის ქორწილზე წნორელი ახალგაზრდა მამაკაცი ცივი იარაღით მოკლეს. შსს-მ საქმე განზრახ მკვლელობის მუხლით აღძრა, რადიო თავისუფლების ინფორმაციით კი პოლიცია სავარაუდო მკვლელს, ქორწილის სტუმარს, ეძებს.

●  მთავრობა რუსთავი-თბილისის მარშრუტისთვის 70 ახალ ავტობუსს ყიდულობს. BPN-ის ინფორმაციით, ერთი ავტობუსის სავარაუდო ღირებულება 521.3 ათასი ლარია.

ფოტო: კრისტინა თუმანიანი

●  ბაქოში კულტურათაშორისი დიალოგის მეშვიდე მსოფლიო ფორუმი გაიხსნა. ღონისძიებაში 100-ზე მეტი ქვეყნიდან 2 ათასზე მეტი ადამიანი მონაწილეობს.

გახსნაზე პრეზიდენტმა ილჰამ ალიევმა 2020 წლის ყარაბაღის ომსა და სომხეთთან სამშვიდობო პროცესზე ისაუბრა. მისი განცხადებით, აზერბაიჯანმა ტერიტორიული მთლიანობა საკუთარი ძალებით აღადგინა და შემდეგ სომხეთს მშვიდობა შესთავაზა.
ალიევმა საერთაშორისო საზოგადოება ორმაგ სტანდარტებში დაადანაშაულა. მისი თქმით, გაეროს უშიშროების საბჭოს რეზოლუციები 30 წლის განმავლობაში შეუსრულებელი რჩებოდა, სომხეთის წინააღმდეგ კი სანქციები არ დაწესებულა. მან ასევე გააკრიტიკა სხვა ქვეყნების მცდელობები, ბაქოს საკუთარი გადაწყვეტილებები უკარნახონ, და აზერბაიჯანის ენერგეტიკულ და სატრანზიტო მნიშვნელობას გაუსვა ხაზი.

●  აზერბაიჯანის პრეზიდენტის თანაშემწემ ჰიქმეთ ჰაჯიევმა განაცხადა, რომ სომხეთმა და სომხურმა საზოგადოებამ აზერბაიჯანელ ხალხს ბოდიში უნდა მოუხადონ. მისი თქმით, ასობით ათასი აზერბაიჯანელი ათწლეულების განმავლობაში საკუთარ საცხოვრებელ ადგილებში დაბრუნებას ვერ ახერხებდა.

ჰაჯიევის განცხადებით, აზერბაიჯანი შურისძიებას არ აპირებს, თუმცა ისტორიული პასუხისმგებლობის აღიარებას მყარი მშვიდობის აუცილებელ პირობად მიიჩნევს.

●  ბაქოს ფორუმის ფარგლებში საგარეო საქმეთა მინისტრი ჯეიჰუნ ბაირამოვი გაეროს ტურიზმის ორგანიზაციისა (UN Tourism) და ისლამური სამყაროს განათლების, მეცნიერებისა და კულტურის ორგანიზაციის (ICESCO) ხელმძღვანელებს შეხვდა.
მხარეებმა ტურიზმის განვითარება, ახალი ტურისტული მიმართულებების შექმნა და კულტურული თუ რელიგიური ძეგლების აღდგენა განიხილეს. განსაკუთრებული ყურადღება დაეთმო 2020 წლის ომის შედეგად აზერბაიჯანის კონტროლქვეშ დაბრუნებულ ტერიტორიებსა და ბაქოში ICESCO-ს რეგიონული ოფისის საქმიანობას.

●  აზერბაიჯანმა, ირანმა, ყაზახეთმა, რუსეთმა და თურქმენეთმა კასპიის ზღვის დონის შემცირების პრობლემა ერთობლივად უნდა გადაჭრან. ამის შესახებ ფორუმზე საერთაშორისო თურქული აკადემიის პრეზიდენტმა შაჰინ მუსტაფაევმა განაცხადა.
მისი თქმით, ზღვის დაშრობა საფრთხეს უქმნის ბიომრავალფეროვნებასა და სანაპირო დასახლებების მოსახლეობას. პრობლემის მოსაგვარებლად აუცილებელია სამეცნიერო მონაცემების გაცვლა და ხუთი ქვეყნის პოლიტიკის კოორდინაცია.

●  აზერბაიჯანის პრეზიდენტის ადმინისტრაციის ყოფილ ხელმძღვანელს, რამიზ მეჰდიევს, 14 წლით თავისუფლების აღკვეთა პირობით მიუსაჯეს. სასამართლომ მისი ასაკისა და ჯანმრთელობის მდგომარეობის გათვალისწინებით სასჯელის რეალური მოხდა არ დააკისრა. ამასთან, მეჰდიევს ქონება ჩამოერთმევა სახელმწიფოს სასარგებლოდ და სახელმწიფო ჯილდოებიც გაუუქმდება.
მეჰდიევი პრეზიდენტის ადმინისტრაციას 1995-2019 წლებში ხელმძღვანელობდა და ქვეყნის ერთ-ერთ ყველაზე გავლენიან პოლიტიკურ ფიგურად ითვლებოდა.

ის დამნაშავედ ცნეს სახელმწიფო ღალატში, ხელისუფლების ძალადობრივი გზით ხელში ჩაგდების მცდელობასა და უკანონო შემოსავლების ლეგალიზაციაში. გავრცელებული ინფორმაციით, საქმეში ქრთამის აღების ბრალდებაც ფიგურირებდა.
გამოძიების ვერსიით, მეჰდიევი უცხო ქვეყნების სპეცსამსახურების დახმარებით ხელისუფლების ხელში ჩაგდებას გეგმავდა. ოფიციალურად კონკრეტული ქვეყანა არ დასახელებულა, თუმცა საქმის შესახებ ადგილობრივ მედიაში გავრცელებულ ცნობებში რუსეთი ფიგურირებდა.

●  პატიმრობაში მყოფი Meydan TV-ის ჟურნალისტი ნურლან ლიბრე, იგივე გაჰრამანლი, აცხადებს, რომ იზოლატორში ფიზიკური ძალადობის მსხვერპლი გახდა.

მისი თქმით, საკნის ჩხრეკისას ჩამოართვეს ჩანაწერები, რომლებიც მოწმეების დაკითხვისთვის ჰქონდა მომზადებული. შემდეგ იზოლატორის უფროსის კაბინეტში ფიზიკურად გაუსწორდნენ და სამი დღით სადამსჯელო საკანში გადაიყვანეს.
ჟურნალისტი ამტკიცებს, რომ სასჯელი აზერბაიჯანის სკოლებში ჰიჯაბის შეზღუდვის შესახებ მის პუბლიკაციებს უკავშირდება. ადვოკატებმა დაცვის უფლების დარღვევაზე განაცხადეს. სასამართლო სხდომა, რომელზეც მოწმეები უნდა დაეკითხათ, გადაიდო.
Meydan TV-ის საქმეზე 12 ჟურნალისტს ასამართლებენ. მათ ვალუტის კონტრაბანდასა და სხვა დანაშაულებს ედავებიან. ყველა მათგანი ბრალს უარყოფს და დევნას ხელისუფლების კრიტიკულ გაშუქებას უკავშირებს.

●  აზერბაიჯანის პენიტენციური სამსახურის უფროსი და იუსტიციის მინისტრის მოადგილე მირსალეჰ სეიდოვი თანამდებობიდან გაათავისუფლეს. გადაწყვეტილების მიზეზი ოფიციალურად არ დასახელებულა.

რადიო თავისუფლების აზერბაიჯანული სამსახურის ინფორმაციით, მისი ხელმძღვანელობის პერიოდში არაერთი საჩივარი გავრცელდა პატიმართა წამების, არასათანადო მოპყრობის, სამედიცინო დახმარების ნაკლებობისა და პატიმრობის მძიმე პირობების შესახებ. განსაკუთრებით ხშირად ამ პრობლემებზე პოლიტპატიმრები საუბრობდნენ. პენიტენციური სამსახური ბრალდებებს უარყოფდა.

● ბრიუსელში აზერბაიჯანისა და ევროკავშირის ანალიტიკური ცენტრების პირველი ფორუმი გაიმართა. ღონისძიება აზერბაიჯანის საერთაშორისო ურთიერთობების ანალიზის ცენტრმა (AIR Center) და ბელგიის საერთაშორისო ურთიერთობების სამეფო ინსტიტუტმა Egmont-მა მოაწყვეს.

მონაწილეებმა რეგიონული უსაფრთხოება, ენერგეტიკული თანამშრომლობა და სატრანზიტო მარშრუტები განიხილეს, მათ შორის „ტრამპის მარშრუტი“ (TRIPP) და შუა დერეფანი. რუსეთის უკრაინაში ომის ფონზე განსაკუთრებული ყურადღება დაეთმო კასპიის ზღვის გავლით ევროპისა და ცენტრალური აზიის დამაკავშირებელი გზების მნიშვნელობას.

●  Egmont-ის ხელმძღვანელმა ბარტ ოვრიმ განაცხადა, რომ ევროკავშირმა აზერბაიჯანთან ურთიერთობები კონკრეტული ეკონომიკური პროექტებით უნდა გააძლიეროს. მისი თქმით, ევროპარლამენტსა და ბაქოს შორის არსებული უთანხმოებების მიუხედავად, დიალოგის გაგრძელება მხარეებს ერთმანეთის პოზიციების უკეთ გაგებაში დაეხმარება.

AIR Center-ის ხელმძღვანელმა ფარიდ შაფიევმა კი ევროკავშირსა და აზერბაიჯანს შორის ახალი შეთანხმების გაფორმების აუცილებლობაზე ისაუბრა. მისი თქმით, დოკუმენტმა ენერგეტიკის, ტრანსპორტისა და ომისშემდგომი აღდგენის სფეროებში თანამშრომლობა უნდა გააღრმაოს.

შაფიევმა სომხეთთან სამშვიდობო ხელშეკრულების პირობად კვლავ სომხეთის კონსტიტუციის შეცვლა დაასახელა. მისი მტკიცებით, კონსტიტუცია აზერბაიჯანის მიმართ ტერიტორიულ პრეტენზიებს შეიცავს. მან აღნიშნა, რომ ბაქოსა და ერევანს პირდაპირი მოლაპარაკება შუამავლების გარეშეც შეუძლიათ.

●  თურქეთის ნაციონალისტური მოძრაობის პარტიის ლიდერმა დევლეთ ბაჰჩელიმ განაცხადა, რომ თურქეთისა და აზერბაიჯანის ძმობა ღრმა ისტორიულ კავშირებს ეფუძნება, ხოლო თურქული სახელმწიფოების ერთიანობა თანასწორობასა და ურთიერთპატივისცემაზე უნდა აშენდეს.

განცხადება ორ ქვეყანას შორის ურთიერთობების დაძაბვის ფონზე გაკეთდა. თურქეთში აზერბაიჯანის სკოლებში ჰიჯაბის ტარების ფაქტობრივი აკრძალვა და ბაქოს თანამშრომლობა ისრაელთან გააკრიტიკეს. აზერბაიჯანის ხელისუფლებამ ეს განცხადებები შიდა საქმეებში ჩარევის მცდელობად შეაფასა.

●  ანკარაში გაიმართა საერთაშორისო სიმპოზიუმი „ყარსიდან ნახიჩევანამდე: თურქეთისა და აზერბაიჯანის დიპლომატია და თურქული სამყაროს მომავალი“.
ღონისძიებაში თურქეთის, აზერბაიჯანის, ყაზახეთის, ყირგიზეთისა და უზბეკეთის წარმომადგენლები მონაწილეობდნენ. მათ დეზინფორმაციასთან ბრძოლა, მედიის თანამშრომლობა და რეგიონული სატრანსპორტო მარშრუტების განვითარება განიხილეს.

●  აზერბაიჯანის ენერგეტიკის მინისტრმა ფარვიზ შაჰბაზოვმა მოსკოვში ცალ-ცალკე შეხვედრები გამართა რუსეთის ენერგეტიკის მინისტრთან და ირანის ნავთობის მინისტრის მოვალეობის შემსრულებელთან. მხარეებმა ორმხრივი ენერგეტიკული თანამშრომლობის განვითარება განიხილეს.

●  ალჟირმა აზერბაიჯანული ნავთობისა და გაზის კომპანიები ქვეყანაში შვიდ საბადოზე გეოლოგიური დაზვერვის საერთაშორისო ტენდერში მონაწილეობის მისაღებად მიიწვია.

მოსკოვში გამართულ შეხვედრაზე განიხილეს აზერბაიჯანის სახელმწიფო ნავთობკომპანია SOCAR-ისა და ალჟირის Sonatrach-ის შესაძლო თანამშრომლობა საბადოების ათვისების, ჭაბურღილების მომსახურების, ნედლეულის ტრანსპორტირების, ნავთობგადამუშავებისა და ნავთობქიმიის სფეროებში. ნოემბერში ბაქოში ორი ქვეყნის ერთობლივი სამუშაო ჯგუფის პირველი შეხვედრა იგეგმება.

●  აზერბაიჯანის ეკონომიკის სამინისტრომ და ესპანურმა IE University-მ ეკონომიკური ობსერვატორიის შექმნის შესახებ შეთანხმება გააფორმეს. ახალი სტრუქტურა ეკონომიკურ ტენდენციებს შეისწავლის, აზერბაიჯანის კონკურენტუნარიანობის გაზრდის შესაძლებლობებს შეაფასებს და ეკონომიკური პოლიტიკისთვის რეკომენდაციებს მოამზადებს.

●  ბაქოში ისლამური თანამშრომლობის ორგანიზაციის წევრი ქვეყნების სამართალდამცავი უწყებების ხელმძღვანელთა მესამე შეხვედრა მიმდინარეობს. მასში 48 ქვეყნიდან 250-ზე მეტი წარმომადგენელი მონაწილეობს.
აზერბაიჯანის გენერალურმა პროკურატურამ მაროკოსა და ერაყთან თანამშრომლობის მემორანდუმები გააფორმა. დოკუმენტები კორუფციული დანაშაულების პრევენციისა და გამოძიების მეთოდების შესახებ ინფორმაციის გაცვლას ითვალისწინებს.

●  აზერბაიჯანმა გაეროს გენერალური მდივნის თანამდებობაზე არაბთა გაერთიანებული საამიროების სახელმწიფო მინისტრის, ლანა ზაქი ნუსეიბეს, კანდიდატურას მხარი დაუჭირა.

●  აზერბაიჯანის კიბერუსაფრთხოების ეროვნულმა სააგენტომ WhatsApp-ის ანგარიშების გატეხვის შემთხვევების გახშირების შესახებ გააფრთხილა მოქალაქეები.

უწყების ინფორმაციით, თაღლითებს მიმოწერაზე წვდომის მოპოვება დაკავშირებული მოწყობილობების საშუალებით შეუძლიათ. სააგენტო მომხმარებლებს ურჩევს, შეამოწმონ WhatsApp-ის განყოფილება „დაკავშირებული მოწყობილობები“, გათიშონ უცნობი მოწყობილობები, ჩართონ ორფაქტორიანი დაცვა და არავის გაუზიარონ SMS-კოდები ან PIN-კოდი. ასევე საჭიროა საეჭვო ბმულებისა და ყალბი ტექნიკური მხარდაჭერის შეტყობინებებისგან თავის დაცვა.

● ნიდერლანდების საგარეო საქმეთა მინისტრის, ტომ ბერენდსენის ხელმძღვანელობით დელეგაცია ერევანს ეწვია. გაიმართა შეხვედრა სომხეთის პრემიერ-მინისტრ ნიკოლ ფაშინიანთან. მხარეებმა ორ ქვეყანას შორის სტრატეგიული პარტნიორობისა და სომხეთ-ევროკავშირის ურთიერთობების შემდგომი განვითარების მნიშვნელობაზე ისაუბრეს. ბერენდესენმა განაცხადა, რომ ნიდერლანდები მიესალმება სომხეთის მთავრობის ამბიციურ დემოკრატიული რეფორმების დღის წესრიგს და მზად არის, მათ განხორციელებაში მხარდაჭერა გააგრძელოს.

● ნიდერლანდები სომხეთსა და აზერბაიჯანს პირველი და მეორე ყარაბაღის ომების დროს (1990-იანი წლების დასაწყისსა და 2020 წელს) უგზო-უკვლოდ დაკარგულთა ძებნაში ფინანსურ დახმარებას გაუწევს. ამის შესახებ ნიდერლანდების საგარეო საქმეთა მინისტრმა ტომ ბერენდესენმა ერევანში გამართულ პრესკონფერენციაზე განაცხადა. მინისტრის თქმით, ნიდერლანდები მიესალმება ორ ქვეყანას შორის ურთიერთობების ნორმალიზებისკენ გადადგმულ ნაბიჯებს და ძალიან მნიშვნელოვანია, რომ ეს პროცესი სამშვიდობო დოკუმენტის ხელმოწერით დასრულდეს.

● საზოგადოებასა და მედიაში აქტიურად განიხილავენ საგარეო საქმეთა მინისტრის განცხადებას, რომ სატრანზიტო პროექტი TRIPP, რომელიც აზერბაიჯანს სომხეთის ტერიტორიის გავლით მის ავტონომიურ რესპუბლიკასთან, ნახიჩევანთან დააკავშირებს, შესაძლოა, ორ ქვეყანას შორის სამშვიდობო შეთანხმების ხელმოწერამდეც ამოქმედდეს. „სად არის მშვიდობის გარანტია?“ – კითხულობს პრორუსი ოპოზიციონერი დეპუტატი ნარეკ კარაპეტიანი.

ეროვნული ასამბლეის სპიკერმა რუბენ რუბინიანმა განაცხადა, რომ დადებითად მიიჩნევს TRIPP-ის პროექტის განხორციელებას, მიუხედავად იმისა, მოეწერება თუ არა ხელი სამშვიდობო შეთანხმებას.

„ასევე ძალიან კარგია, რომ სომხეთსა და აზერბაიჯანს შორის საზღვრის დემარკაციისა და დელიმიტაციის პროცესი სამშვიდობო შეთანხმების ხელმოწერაზე არ არის დამოკიდებული. ამას მარტივი ახსნა აქვს: ამჟამად პრობლემა სამშვიდობო შეთანხმების ხელმოწერაა. აზერბაიჯანი აყენებს მოთხოვნას, რომლის საფუძველზეც შეთანხმების ხელმოწერაზე უარს ამბობს“, – განმარტა რუბინიანმა.

კონტექსტი. აზერბაიჯანის მტკიცებით, სომხეთის კონსტიტუცია აზერბაიჯანის ტერიტორიის მიმართ პრეტენზიებს შეიცავს. სამშვიდობო შეთანხმების ხელმოწერის პირობად ბაქო ამ ჩანაწერების აღმოფხვრას მოითხოვს.

● პრორუსული ოპოზიციური ბლოკის „სომხეთის“ საპარლამენტო ფრაქცია სომხეთსა და აშშ-ს შორის TRIPP-ის პროექტთან დაკავშირებული სტრატეგიული თანამშრომლობის შეთანხმების რატიფიცირების წინააღმდეგ მისცემს ხმას. ფრაქციის თავმჯდომარემ ანა გრიგორიანმა განაცხადა: „ქაღალდზე ეს ორმხრივი შეთანხმებაა, თუმცა მასში აზერბაიჯანის ინტერესები უფრო პირდაპირ არის ასახული, ვიდრე სომხეთის ინტერესები“.

● ანტიკორუფციული კომიტეტის მიერ დაწყებული სისხლის სამართლის საქმის ფარგლებში ერევნის სახელმწიფო უნივერსიტეტის ოთხი თანამშრომელი დააკავეს. გავრცელებული ინფორმაციით, იურიდიული ფაკულტეტის საკონსტიტუციო სამართლის კათედრის გამგეს ქრთამის აღებას ედავებიან. ისტორიის ფაკულტეტის სომხეთის ისტორიის კათედრის გამგეს კი ქრთამის აღებაში დახმარებას. კომიტეტს დამატებითი ინფორმაცია ჯერ არ გაუვრცელებია.

● სომხეთში ესპანეთის დედოფალი სოფია ჩავიდა. ვიზიტი 29 ოქტომბრამდე გაგრძელდება. დედოფალი დაესწრება ადამიანური განვითარების სფეროში პრინც ტალალის სახელობის საერთაშორისო პრემიის გადაცემის ცერემონიას, მოინახულებს სომხეთის ისტორიულ-კულტურულ ღირსშესანიშნაობებს და მონაწილეობას მიიღებს სომხეთ-ესპანეთის კულტურული და მეგობრული კავშირებისადმი მიძღვნილ ღონისძიებებში.

● სომხეთში საუდის არაბეთის პრინცი აბდულაზიზ ბინ ტალალ ალ საუდი ჩავიდა. ადგილობრივი მედია აღნიშნავს, რომ ორ ქვეყანას დიდი ხნის განმავლობაში დიპლომატიური ურთიერთობები არ ჰქონია. დიპლომატიური ურთიერთობები მხოლოდ 2023 წლის ნოემბერში დამყარდა.

● იტალიაში სომხეთის, აზერბაიჯანისა და საქართველოს ელჩებმა მონაწილეობა მიიღეს დისკუსიაში „კავკასია გზაჯვარედინზე: მშვიდობა, დერეფნები და თანამშრომლობის ახალი ერა“. ღონისძიება დიპლომატიის ფესტივალის, Festival della Diplomazia-ს ფარგლებში გაიმართა. განხილვის მთავარი თემები იყო რეგიონში მშვიდობის განმტკიცება, რეგიონის ქვეყნებს შორის თანამშრომლობის გაფართოება და ცენტრალური აზიისა და სამხრეთ კავკასიის ევროპასთან დამაკავშირებელი სატრანსპორტო მარშრუტების განვითარება.

● სომხეთში 1999 წლის 27 ოქტომბერს პარლამენტში მომხდარი თავდასხმისა და დახოცილი ადამიანების ხსოვნას პატივი მიაგეს. იმ დღეს ხუთი შეიარაღებული პირი პარლამენტის სხდომათა დარბაზში შეიჭრა და ახლო მანძილიდან მოკლა პრემიერ-მინისტრი ვაზგენ სარქისიანი, პარლამენტის თავმჯდომარე კარენ დემირჭიანი და ვიცე-სპიკერები იური ბახშიანი და რუბენ მიროიანი. თავდასხმას კიდევ ოთხი ადამიანი ემსხვერპლა.

2019 წლის დეკემბერში ცნობილი გახდა, რომ გამოძიება განახლდა. თითქმის შვიდი წლის შემდეგ გენერალურმა პროკურატურამ განაცხადა, რომ ათზე მეტი დამატებითი დაკითხვა ჩატარდა და ინფორმაციის მისაღებად შესაბამის უწყებებს მიმართეს.

უვადო პატიმრობა მიესაჯათ ჯგუფის მეთაურს, ნაირი უნანიანს, მის ძმას, კარენ უნანიანს, მათ ბიძას, ვრამ გალსტიანს, ასევე დერენიკ ბეჟანიანს, ედიკ გრიგორიანსა და აშოტ კნიაზიანს. ჰამლეტ სტეფანიანს 14 წლით თავისუფლების აღკვეთა მიესაჯა.

თუმცა, ამდენი წლის შემდეგაც პასუხგაუცემელია კითხვები: ვინ იდგა ამ დანაშაულის უკან და რატომ ან რა მიზნით ჩაიდინეს ის.

● დაკავებულია პატიმარი, რომელიც წინა დღეს სასამართლოს შენობიდან გაიქცა. დაახლოებით ერთდღიანი ძებნის შემდეგ ის ჯრვეჟის დასახლებაში, ერთ-ერთ სახლში აღმოაჩინეს და დააკავეს.

ფოტო: სომხეთში ეკოპატრულის თანამშრომლებმა დაზიანებული ლელიანის კატა აღმოაჩინეს. დათვალიერებისას გაირკვა, რომ ცხოველს თათი მოტეხილი აქვს და მუწუკის არეშიც დაზიანება აღენიშნება. იგეგმება ოპერაციის ჩატარება. წინასწარი შეფასებით, დაზიანებები შესაძლოა ავტომობილის დაჯახების შედეგად მიეღო.

●  26 ოქტომბერს საკონსტიტუციო სასამართლომ „ქართული ოცნების“ 88 დეპუტატის სარჩელის არსებითი განხილვა დაიწყო. სარჩელი ხუთი ოპოზიციური პარტიის აკრძალვას ითხოვს. განხილვის დასაწყისში სასამართლომ უარი თქვა ბიძინა ივანიშვილისა და „ოცნების“ სხვა ლიდერების მოწმედ დაკითხვაზე. ენმ-ს წარმომადგენელმა ზაზა ბიბილაშვილმა თქვა, რომ სარჩელი მხოლოდ პარლამენტის საგამოძიებო კომისიის დასკვნას ეყრდნობა: „მელამ თავისი კუდი მოწმედ მოიყვანა“. სასამართლომ გადაწყვეტილება 2027 წლის 24 ივნისამდე უნდა მიიღოს.

●  სპეციალური პენიტენციური სამსახურის გენერალურმა დირექტორმა გიორგი პატარიძემ თანამდებობა დატოვა, მას შემდეგ, რაც პროკურატურამ იუსტიციის სამინისტროს მისი უფლებამოსილების შეჩერების რეკომენდაციით მიმართა. სამსახურის ახალ უფროსად რამაზ თათარაშვილი დაინიშნა.

ეს პატიმარ დავით ფეიქრიშვილის საქმის ფონზე მოხდა: ფეიქრიშვილის ადვოკატის და ოჯახის თქმით, ის გლდანის N8 დაწესებულებაში ე.წ. კრიმინალურმა ავტორიტეტებმა სცემეს. პენიტენციური სამსახური კი ამ ბრალდებას უარყოფდა. გამოძიება იუსტიციის სამინისტროს გენერალურ ინსპექციას პროკურატურამ გადაიბარა.

●  „გახარია საქართველოსთვის“ საპარლამენტო მანდატებს დატოვებს, თუ საკონსტიტუციო სასამართლო პარტიას აკრძალავს. ამის შესახებ პარტიის დეპუტატმა შალვა კერესელიძემ პარლამენტში გამართულ ბრიფინგზე განაცხადა. პარტიამ არჩევნებში 12 მანდატი მოიპოვა, ამჟამად პარლამენტში მისი 11 დეპუტატი მუშაობს.

●  პარლამენტის თავმჯდომარე შალვა პაპუაშვილმა ევროკომისიას საქართველოს მიმართ საბჭოთა მეთოდების გამოყენებაში დასდო ბრალი. განცხადება ევროკომისიის გაფართოების ყოველწლიურ ანგარიშს ეხმიანებოდა, რომელიც 4 ნოემბერს გამოქვეყნდება. 2024 წლის საპარლამენტო არჩევნების წლისთავზე პაპუაშვილმა ისიც თქვა, რომ 26 ოქტომბერი „არის დღე, როცა ევროკავშირმა მოატყუა ქართველი ხალხი“.

●  სახელმწიფო აუდიტის სამსახურმა პროკურატურას სახელმწიფო შპს „აქტივების მართვისა და განვითარების კომპანიის“ 2023-2024 წლების აუდიტის ანგარიში გაუგზავნა. აუდიტის მიხედვით, ამ პერიოდში კომპანიამ თანამშრომლების წახალისებაზე 1.58 მილიონ ლარზე მეტი დახარჯა, დირექტორის მრჩევლებს კი, რომელთა საქმიანობის მტკიცებულებები არ წარმოდგენილა, 913 ათას ლარზე მეტი გადაუხადა. ეკონომიკის მინისტრის მოადგილის ნინო ენუქიძის თქმით, სამინისტრო კომპანიის ლიკვიდაციას, შერწყმას ან რეორგანიზაციას განიხილავს.

●  კონკურენციისა და მომხმარებლის დაცვის სააგენტოს თავმჯდომარე ირაკლი ლექვინაძე ამბობს, რომ საწვავის ფასები საქართველოში ადეკვატურია და ბაზარზე მოკვლევის დაწყების საფუძველი ჯერ არ არსებობს. მისი თქმით, ბოლო თვეებში საწვავის ყველა სახეობა მნიშვნელოვნად გაძვირდა, რაც საერთაშორისო ბაზრის ტენდენციას მიჰყვება.

●  მთავრობამ პარლამენტს კანონპროექტი წარუდგინა, რომლითაც მინისტრის პირველ მოადგილეს ან მოადგილეს პრემიერ-მინისტრის სპეციალური წარმომადგენლის ფუნქცია შეიძლება დაეკისროს, დამატებითი ანაზღაურების გარეშე. პროექტი დაჩქარებული წესით განიხილება. ცოტა ხნის წინ საგარეო საქმეთა მინისტრის პირველი მოადგილე გიორგი ზურაბაშვილი რუსეთთან ურთიერთობის საკითხებში პრემიერის სპეციალურ წარმომადგენლად დაინიშნა.

ფოტო: ვიდეოკადრი. ნაციონალური მოძრაობის წარმომადგენელი, ზაზა ბიბილაშვილი სასამართლოს მიმართავს

●  აზერბაიჯანსა და ირანს შორის დაპირისპირება გამწვავდა აზერბაიჯანის სკოლებში ჰიჯაბის ტარების ფაქტობრივი აკრძალვის გამო. ირანში გამოთქვეს მზადყოფნა, აზერბაიჯანელი გოგონები ირანის უნივერსიტეტებში მიიღონ. აზერბაიჯანის განათლების სამინისტრომ ეს განცხადება ქვეყნის საგანმანათლებლო პოლიტიკაში ჩარევად შეაფასა.

ბაქომ საპასუხოდ ირანში მცხოვრები ეთნიკური აზერბაიჯანელების განათლების საკითხი წამოჭრა. სამინისტროს განცხადებით, ირანში დაახლოებით 40 მილიონი ეთნიკური აზერბაიჯანელი ცხოვრობს, თუმცა ქვეყანაში არ არსებობს სკოლები და უნივერსიტეტები, სადაც სწავლება აზერბაიჯანულ ენაზე მიმდინარეობს.

●  აზერბაიჯანის 55 არასამთავრობო ორგანიზაციამ ირანის პრეზიდენტ მასუდ ფეზეშქიანს ღია წერილით მიმართა და ირანში მცხოვრები აზერბაიჯანელებისთვის მშობლიურ ენაზე განათლების მიღების შესაძლებლობა მოითხოვა. ორგანიზაციები სკოლებში აზერბაიჯანული ენის სწავლების დანერგვას, აზერბაიჯანულენოვანი სასწავლო დაწესებულებების გახსნასა და შესაბამისი სახელმძღვანელოების მომზადებას ითხოვენ. წერილის ავტორები საკითხს ისტორიული სამართლიანობის აღდგენას უკავშირებენ.

●  სტამბოლში დააკავეს თურქული ჟურნალის Köklü Değişim-ის წარმომადგენელი მუჰამედ ემინ ილდირიმი, რომელსაც აზერბაიჯანში შესვლა უკვე აკრძალული ჰქონდა. ის თურქეთის იმ 31 მოქალაქეს შორისაა, რომლებიც ბაქომ აზერბაიჯანის სუვერენიტეტის წინააღმდეგ განცხადებების გავრცელებასა და რელიგიური სიძულვილის გაღვივებაში დაადანაშაულა.
ილდირიმი აზერბაიჯანის სკოლებში ჰიჯაბის შეზღუდვის წინააღმდეგ პროტესტს უჭერდა მხარს. თურქეთში მისი დაკავების მიზეზი და გამოძიების დეტალები ჯერჯერობით უცნობია.

●  თურქეთის პრეზიდენტ რეჯეფ თაიფ ერდოღანის მრჩეველმა ოქთაი სარალმა თანამდებობა დატოვა. მანამდე მან საჯაროდ გააკრიტიკა აზერბაიჯანის სკოლებში ჰიჯაბის ტარების შეზღუდვა, რასაც ბაქოს მწვავე რეაქცია მოჰყვა.
რადიო თავისუფლების აზერბაიჯანული სამსახურის ინფორმაციით, სარალის გადადგომა ბაქოს მოთხოვნას უკავშირდება და მიზნად ორ ქვეყანას შორის დაძაბულობის შემცირებას ისახავს. ამ ცნობას დამოუკიდებელი დადასტურება არ აქვს.

● კავკასიის მუსლიმთა სამმართველოს თავმჯდომარემ ალაჰშუქურ ფაშაზადემ ვატიკანში გამართულ შეხვედრაზე Vatican News სომხური მხარის სასარგებლოდ დეზინფორმაციის გავრცელებაში დაადანაშაულა. მისი თქმით, გამოცემა ბოლო პერიოდში სომხურ წყაროებზე დაყრდნობით ცალმხრივ და მცდარ ინფორმაციას აქვეყნებდა.
კარდინალმა ჯორჯ ჯეიკობ კუვაკადმა განაცხადა, რომ საკითხს წმინდა საყდრის შესაბამის სტრუქტურებს გადასცემს. კონკრეტულად რომელი პუბლიკაციები გააპროტესტა ფაშაზადემ, არ დასახელებულა.

●  ვატიკანმა და კავკასიის მუსლიმთა სამმართველომ რელიგიათაშორისი დიალოგის შესახებ ურთიერთგაგების მემორანდუმს მოაწერეს ხელი. ეს ვატიკანსა და სამმართველოს შორის პირველი მსგავსი შეთანხმებაა. მის განსახორციელებლად მუდმივი ერთობლივი კომიტეტი შეიქმნება. მხარეებმა ასევე განიხილეს ბაქოში კათოლიკური ტაძრის მშენებლობა, რომლის დასრულებაც 2027 წელს იგეგმება, და აზერბაიჯანში ვატიკანის სამოციქულო ნუნციატურის გახსნა.

●  ბაქოში, რესტორანში მომხდარი მკვლელობის საქმეზე 11 ადამიანი დააკავეს. ინციდენტი 23 ოქტომბრის ღამეს მოხდა. დანით მიყენებული ჭრილობებით 43 წლის ადგილობრივი მცხოვრები დაიღუპა. შინაგან საქმეთა სამინისტროს ინფორმაციით, დაკავებულთაგან შვიდი წარსულში ნასამართლევია.

გამოძიება ჯგუფს დანაშაულებრივი გაერთიანების საქმიანობას უკავშირებს. სამართალდამცავების ვერსიით, მისი წევრები მუქარით ფულს სძალავდნენ მოქალაქეებს და დაუმორჩილებლობის შემთხვევაში ცეცხლსასროლ ან ცივ იარაღს იყენებდნენ. დაკავებულთა შორისაა აზერბაიჯანის პარლამენტის დეპუტატის ვაჟი აჰმედ ალიზადე.

●  სომხეთმა აზერბაიჯანს გადასცა იაშარ ალი ოღლი გასიმოვი, რომელმაც საზღვარი შემთხვევით გადაკვეთა. სომხეთის ეროვნული უსაფრთხოების სამსახურის ინფორმაციით, მამაკაცი 19 ოქტომბერს, დაახლოებით 17:50 საათზე, სომხეთის ტერიტორიაზე აღმოაჩინეს. უწყების ცნობით, ის გზას ასცდა.

●  აზერბაიჯანის პრეზიდენტის თანაშემწემ ჰიქმეთ ჰაჯიევმა განაცხადა, რომ სომხეთთან სამშვიდობო შეთანხმებამ მოსახლეობას რეალური სარგებელი უნდა მოუტანოს და მხოლოდ ქაღალდზე არ უნდა დარჩეს. ბაქოს კულტურული და მედიადიალოგის პლატფორმის სპეციალურ სესიაზე მან მთავარ ამოცანებად ხალხებს შორის ნდობის აღდგენა და შერიგება დაასახელა.
ჰაჯიევმა ბალკანეთის მაგალითი მოიყვანა, სადაც კონფლიქტების დასრულებიდან ათწლეულების შემდეგაც უნდობლობა რჩება. მისი თქმით, წარსულის აღიარება აუცილებელია, თუმცა ის მშვიდობისკენ მოძრაობას არ უნდა აფერხებდეს.

●  ჰიქმეთ ჰაჯიევის განცხადებით, ხელოვნური ინტელექტი და სოციალური ქსელები დეზინფორმაციის გავრცელებას აძლიერებს და ინფორმაციის გადამოწმებას ართულებს. მან დეზინფორმაცია სახელმწიფოების შიდა საქმეებში ჰიბრიდული ჩარევის ინსტრუმენტად შეაფასა და აღნიშნა, რომ საერთაშორისო მედიაში ინფორმაციის დამახინჯებამ შესაძლოა სამხრეთ კავკასიაში სამშვიდობო პროცესს ავნოს. მისი თქმით, აზერბაიჯანმა დეზინფორმაციასთან ბრძოლის საკუთარი სისტემა შექმნა.

ნიდერლანდების საგარეო საქმეთა მინისტრი ტომ ბერენდსენი ბაქოში ვიზიტით იმყოფება. ის პრეზიდენტ ილჰამ ალიევსა და საგარეო საქმეთა მინისტრ ჯეიჰუნ ბაირამოვს შეხვდა.

მხარეებმა ევროკავშირ-აზერბაიჯანის ურთიერთობები, ვაჭრობა, ინვესტიციები და ენერგეტიკის, ტრანსპორტისა და სოფლის მეურნეობის სფეროებში თანამშრომლობა განიხილეს. შეთანხმდნენ 2026-2028 წლების ორმხრივი ურთიერთობების განვითარების საგზაო რუკის მომზადებაზე. ბერენდსენმა აზერბაიჯანი მნიშვნელოვან რეგიონულ პარტნიორად დაასახელა და სომხეთთან ურთიერთობების მოწესრიგებაში მისი როლი დადებითად შეაფასა.

●  ავსტრია აზერბაიჯანში საკუთარი კომპანიების საქმიანობის გაფართოებას გეგმავს, მათ შორის სარკინიგზო ინფრასტრუქტურისა და ტექნოლოგიების სფეროებში. ამის შესახებ ავსტრიის ელჩმა ეტიენ ბერხტოლდმა ბაქოში განაცხადა. მისი თქმით, ავსტრიამ აზერბაიჯანული გაზის შესყიდვა წელს დაიწყო. აზერბაიჯანის საგარეო საქმეთა სამინისტროში აღნიშნავენ, რომ ავსტრიის სამრეწველო გამოცდილება და მაღალი ტექნოლოგიები აზერბაიჯანის სატრანსპორტო შესაძლებლობებს შეიძლება დაუკავშირდეს.

●  აზერბაიჯანში ამერიკის სავაჭრო პალატამ (AmCham) და სადაზღვევო კომპანიების ეროვნულმა ასოციაციამ თანამშრომლობის ხუთი მიმართულება განსაზღვრეს. მათ შორისაა სადაზღვევო კანონმდებლობის გაუმჯობესება, კომპანიებისთვის ტრენინგების ჩატარება, აგრარული და სამედიცინო დაზღვევის განვითარება და ბიზნესის საჭიროებების შესწავლა სადაზღვევო დაფარვისა და ანაზღაურების საკითხებში.

●   აზერბაიჯანში NATO-ს სტანდარტებთან შესაბამისობის შესაფასებელი მეორე დონის წვრთნები (NEL-2) დაიწყო. მასში ორი აზერბაიჯანული Mi-17-1V ვერტმფრენი მონაწილეობს. წვრთნები NATO-ს ოპერატიული შესაძლებლობების კონცეფციის ფარგლებში ტარდება და ვერტმფრენების შესაძლებლობების შემოწმებასა და სერტიფიცირებას ისახავს მიზნად.

●   აზერბაიჯანი აფრიკის ქვეყნების მოქალაქეებისთვის სავიზო პროცედურების გამარტივებასა და კონტინენტის სახელმწიფოებთან თანამშრომლობის გაფართოებას გეგმავს. ამის შესახებ პრეზიდენტის თანაშემწემ ჰიქმეთ ჰაჯიევმა ბაქოს კულტურული და მედიადიალოგის პლატფორმის სპეციალურ სესიაზე განაცხადა.

●   ილჰამ ალიევი ბაქოში გაეროს მსოფლიო ტურიზმის ორგანიზაციის გენერალურ მდივან შაიხა ალ-ნუვაისს შეხვდა. მხარეებმა ტურიზმის სფეროში თანამშრომლობა და აზერბაიჯანის რეგიონებში თანამედროვე ტურისტული ინფრასტრუქტურის განვითარება განიხილეს.

●   ბაქოში, კულტურათაშორისი დიალოგის მეშვიდე მსოფლიო ფორუმის ფარგლებში, აზერბაიჯანის საგარეო საქმეთა მინისტრის მოადგილე ელნურ მამედოვი UNESCO-ს გენერალური დირექტორის მოადგილე ასა რეგნერს შეხვდა. შეხვედრაზე აზერბაიჯანსა და UNESCO-ს შორის თანამშრომლობის განვითარებაზე ისაუბრეს.

●  აზერბაიჯანის პრესის საბჭომ ჟურნალისტთა ეთიკური ქცევის კოდექსის განახლებული ვერსია გამოაქვეყნა. ცვლილებები, პირველ რიგში, ხელოვნური ინტელექტის გამოყენებას ეხება. რედაქციებმა AI-ის დახმარებით მომზადებულ მასალებზე ადამიანური კონტროლი უნდა უზრუნველყონ და საავტორო უფლებები დაიცვან.
გამკაცრდა პერსონალური მონაცემების დაცვის წესებიც. პირადი ცხოვრების შესახებ ინფორმაციის გამოქვეყნება ადამიანის თანხმობის გარეშე დაუშვებელია, თუ მასალა საზოგადოებრივ ინტერესს არ ემსახურება.

●  ტაშკენტში გაიმართა საერთაშორისო სამეცნიერო კონფერენცია „უზბეკეთი და აზერბაიჯანი: საერთო ისტორიული მემკვიდრეობა, ისლამური ცივილიზაცია და თანამედროვე სამეცნიერო თანამშრომლობა“. მხარეებმა უნივერსიტეტებს, მუზეუმებსა და კვლევით ცენტრებში თანამშრომლობის გაფართოების გეგმები განიხილეს.

●  სომხეთში ადგილობრივი თვითმმართველობის არჩევნები ათი რეგიონის 21 თემში გაიმართა. სულ 517 საარჩევნო უბანი გაიხსნა. 19 თემში არჩევნები პროპორციული სისტემით ჩატარდა, ხოლო ორ თემში, ფიოლეტოვოსა და შამირამში, მაჟორიტარული სისტემით.

●   სომხეთის შინაგან საქმეთა სამინისტრომ არჩევნების დროს სავარაუდო სამართალდარღვევების შესახებ 35 შეტყობინება მიიღო. ყველა შემთხვევა მოწმდება. დღის განმავლობაში მედიაში ვრცელდებოდა ვიდეოები და ცნობები კენჭისყრის ფარულობის დარღვევის, ამომრჩევლებზე უკანონო კონტროლისა და საარჩევნო აგიტაციის შესახებ. დაფიქსირდა შემთხვევებიც, როდესაც ამომრჩევლები კაბინაში ბიულეტენებს ფოტოებს უღებდნენ.

●   არჩევნებზე ყველაზე მაღალი აქტივობა ვაიოცძორის რეგიონის ეღეგნაძორის თემში დაფიქსირდა – 62,56%. 21 თემიდან 11-ში მონაწილეობა ამომრჩეველთა ნახევარზე ნაკლებმა მიიღო. ყველაზე დაბალი აქტივობა ლორის რეგიონის ფიოლეტოვოს თემში იყო – 25,39%.

●   ქალაქ მარტუნის დაახლოებით 20 ათასმა მცხოვრებმა ადგილობრივ არჩევნებში ხმის მიცემა ვერ შეძლო. მიზეზი ახალი კანონია, რომელიც არჩევნებში მონაწილეობას უზღუდავს მოქალაქეებს, რომლებიც განსაზღვრული პერიოდის განმავლობაში ქვეყანაში არ იმყოფებოდნენ.

პრორუსული ოპოზიციური პარტია „სომხეთის“ საპარლამენტო ფრაქციის დეპუტატმა გეღამ მანუკიანმა კანონი დისკრიმინაციულად შეაფასა. მისი თქმით, პრობლემა განსაკუთრებით მწვავეა მარტუნიში, საიდანაც ბევრი მცხოვრები სამუშაოდ საზღვარგარეთ მიდის.

●   თურქეთში დასრულდა ტენდერი სომხეთის საზღვართან მდებარე ანის ისტორიული ხიდის აღდგენაზე. ინფორმაცია თურქეთის ტრანსპორტისა და ინფრასტრუქტურის სამინისტრომ გაავრცელა.

ხიდი X საუკუნეში, დიდი აბრეშუმის გზაზე, მდინარე ახურიანზე აშენდა და მნიშვნელოვანი სავაჭრო გადასასვლელი იყო. 2026 წლის 4 მაისს ერევანში სომხეთისა და თურქეთის წარმომადგენლები მის ერთობლივ აღდგენაზე შეთანხმდნენ. პროექტი ორ ქვეყანას შორის ურთიერთობების ნორმალიზების სიმბოლურ ნაბიჯად განიხილება.

●  სომხეთის პრემიერ-მინისტრმა ნიკოლ ფაშინიანმა დაგმო საფრანგეთის ქალაქებში, ტრაპსა და ლა-ვერიერში, მომხდარი ტერაქტი და საფრანგეთს რასიზმისა და სიძულვილის წინააღმდეგ ბრძოლაში სოლიდარობა გამოუცხადა.

●  სომეხმა ტანმოვარჯიშემ არტურ დავითიანმა როტერდამში გამართულ მსოფლიო ჩემპიონატზე ოქროს მედალი მოიპოვა. საყრდენ ხტომაში ორი ცდის ჯამში მან 14,850 ქულა დააგროვა და კარიერაში მეორედ გახდა მსოფლიო ჩემპიონი. დავითიანი ოლიმპიური თამაშების ვერცხლისა და ბრინჯაოს მედლების მფლობელი, ასევე ევროპისა და მსოფლიოს ჩემპიონია.

●  13 წლის სომეხმა მომღერალმა ნარემ (Naré) მალტაში გამართულ საბავშვო ევროვიზია 2026-ზე გაიმარჯვა. სიმღერით „BOO!“ მან 202 ქულა მოიპოვა.
ნიკოლ ფაშინიანმა Instagram-ზე ნარეს გამოსვლის ვიდეო გამოაქვეყნა და დაწერა: „სომხეთმა საბავშვო ევროვიზიაზე გაიმარჯვა. ბრავო, ნარე!“
ნარე ეკონომიკის ყოფილი მინისტრის, ვაჰან ქერობიანის, ქალიშვილია. ქერობიანი 2024 წლის თებერვალში, ფაშინიანის ხელისუფლების პირობებში, დააკავეს. მას სამინისტროს შესყიდვების ტენდერთან დაკავშირებულ უფლებამოსილების ბოროტად გამოყენებაში ედება ბრალი.

●  ნიკოლ ფაშინიანი და მისი მეუღლე ანა აკოპიანი სომხეთის ეროვნულ გალერეაში ოჯახში ძალადობის წინააღმდეგ მოძრაობის, „მეტს აღარ მოვითმენთ“, სპეციალური გამოფენის გახსნას დაესწრნენ.

მოძრაობას ანა აკოპიანი ხელმძღვანელობს, რომელიც ფონდის „ჩემი ნაბიჯი“ დირექტორია. გამოფენაზე წარმოდგენილია ოჯახში ძალადობასთან ბრძოლის საერთაშორისო გამოცდილება და ინიციატივები ავსტრალიიდან, ახალი ზელანდიიდან, იტალიიდან, ჩილედან, ფინეთიდან და სხვა ქვეყნებიდან.

●   25 ოქტომბერს თბილისში გაიმართა საპროტესტო აქცია ლოზუნგით „საქართველო ივანიშვილის გარეშე“. აქცია ოპოზიციური პარტიების ალიანსის მიერ იყო ორგანიზებული. მსვლელობა სახელმწიფო უნივერსიტეტის პირველ კორპუსიდან დაიწყო, რის შემდეგაც მომიტინგეები რუსთაველის გამზირისკენ გაემართნენ. ორგანიზატორების თქმით, აქციით იწყება საპროტესტო კამპანია, რომელიც 28 ნოემბერს თბილისში მასობრივი დემონსტრაციით უნდა დასრულდეს. „კოალიცია ცვლილებისთვის“ ერთ-ერთმა ლიდერმა ნიკა გვარამიამ ეს თარიღი იმ დღედ მოიხსენია, როცა, მისი თქმით, კობახიძემ საქართველოს ევროპა წაართვა. (2024 წლის 28 ნოემბერს პრემიერმა კობახიძემ გააკეთა განცხადება, რომ საქართველო დროებით აჩერებს ევროინტეგრაციის პროცესს).

●   საკონსტიტუციო სასამართლოს პლენუმი პარტიების აკრძალვის საქმეზე მსჯელობას 26 ოქტომბერს, 14:00 საათზე განაახლებს.

●   24 ოქტომბერს გავრცელებული ინფორმაციით, თბილისში ორი არასრულწლოვანი დააკავეს, რომლებიც, გამოძიების ვერსიით, ერთ-ერთ სკოლაში თავდასხმას გეგმავდნენ. პროკურატურის თქმით, ისინი სკოლის წინ ყალბი ასაფეთქებელი მოწყობილობის დამონტაჟებას და შიგნით მყოფთათვის იარაღით დაზიანების მიყენებას აპირებდნენ; ჩხრეკისას ამოიღეს სასტარტო პისტოლეტი, ტყვიები, წიწაკის სპრეი და დანა. ბრალი ჯგუფური ძალადობის ორგანიზების მომზადებისთვის წარუდგინეს, ერთ-ერთს წინასწარი პატიმრობა უკვე შეეფარდა.

●  „ასავალ-დასავალის“ ჟურნალისტს, დიტო ჩუბინიძეს წინასწარი პატიმრობა შეუფარდა. პროკურატურა მას სამშობლოს ღალატს, კერძოდ, საბოტაჟს ედავება და ამტკიცებს, რომ 2026 წლის თებერვლიდან ის მედიითა და სოციალური ქსელებით სისტემატურად ავრცელებდა ცრუ და დეზინფორმაციულ ცნობებს. ჩუბინიძე ბრალს არ აღიარებს, მისი ადვოკატის განცხადებით, ის მხოლოდ ჟურნალისტურ საქმიანობას ეწეოდა.

●  ციხეში მყოფი კრიმინალური ავტორიტეტების, ძმები ფეიქრიშვილების დედამ, ნინო აბრამიშვილმა, 25 ოქტომბერს განაცხადა, რომ მისი წყაროს ცნობით, მისი შვილის, გიორგი ფეიქრიშვილის საკანში ვატო ყიფიანი შევიდა. (ყიფიანი ძმებ ფეიქრიშვილებთან დაპირისპირებაში მყოფი კრიმინალური ავტორიტეტია). სპეციალურმა პენიტენციურმა სამსახურმა ეს უარყო: გიორგი საკანში მარტოა და 24-საათიანი ვიდეომეთვალყურეობის ქვეშ იმყოფება. სახალხო დამცველის რწმუნებულმა გიორგი ფეიქრიშვილი იმავე დღეს მოინახულა. ომბუდსმენის აპარატის ცნობით, ბრალდებულს უსაფრთხოებასთან დაკავშირებით ამ ეტაპზე პრეტენზია არ აქვს.
რამდენიმე დღით ადრე, გიორგი ფეიქეიშვილის ძმას, დავით ფეიქრიშვილს, ციხეში სასტიკად გაუსწორდნენ – ის საავადმყოფოში მოხვდა მრავლობითი დაბეჟილობებით და მოტეხილობებით. პენიტენციური სამსახური ძალადობის ამ ფაქტს უარყოფს.

●  თბილისის სააპელაციო სასამართლომ 23 ოქტომბერს დაამტკიცა საპროცესო შეთანხმება ეკონომიკის მინისტრის ყოფილ მოადგილე რომეო მიქაუტაძესთან, რომელსაც სამსახურებრივი უფლებამოსილების ბოროტად გამოყენება და გადამეტება, სამეწარმეო საქმიანობაში უკანონო მონაწილეობა და განსაკუთრებით დიდი ოდენობით უკანონო შემოსავლის ლეგალიზაცია ედებოდა ბრალად. მიქაუტაძემ დანაშაული აღიარა, სასჯელად 3 წლით თავისუფლების აღკვეთა და 2 წლით პირობითი მსჯავრი, ასევე 1 მილიონი ლარის ჯარიმა განესაზღვრა. სახელმწიფოს გადაეცემა მისი ქონება, მათ შორის ბინა მადრიდში და შპს „ნახიდური ჰესის“ 15%-იანი წილი.

●  „საერთაშორისო გამჭვირვალობა – საქართველომ“ 23 ოქტომბერს გამოაქვეყნა კვლევა, რომლის მიხედვითაც სამცხე-ჯავახეთში წყალმომარაგების სამი ტენდერი, ჯამში 121.3 მილიონი ლარის ღირებულების, კონკურენციის გარეშე მოიგეს კომპანიებმა, რომელთა ხელმძღვანელები ან მფლობელები „ქართულ ოცნებას“ თანხებს სწირავდნენ. ტენდერები საქართველოს გაერთიანებულმა წყალმომარაგების კომპანიამ გამოაცხადა. ორგანიზაციის ცნობით, ორი მათგანი მოიგო შპს „გზამ“, რომელიც ადრე „ქართული ოცნების“ დეპუტატ გიორგი ჭყონიას ეკუთვნოდა.

●  პრემიერი ირაკლი კობახიძე 23 ოქტომბერს, უნგრეთის პრემიერ-მინისტრ პეტერ მადიარის მიწვევით, ბუდაპეშტში 1956 წლის რევოლუციის 70 წლისთავისადმი მიძღვნილ ღონისძიებებს დაესწრო. მადიარი პრემიერი ვიქტორ ორბანის 16-წლიანი მმართველობის შემდეგ გახდა. კობახიძე ბუდაპეშტში 2026 წლის მარტშიც, უნგრეთის საპარლამენტო არჩევნების წინ იმყოფებოდა და მაშინ ორბანს დაუჭირა მხარი.

●  ბათუმში 23 ოქტომბერს საქართველოსა და ცენტრალური აზიის ქვეყნების საგარეო საქმეთა მინისტრების პირველი ერთობლივი შეხვედრა გაიმართა, საგარეო საქმეთა მინისტრ მაკა ბოჭორიშვილის ინიციატივით. შეხვედრას თურქმენეთის, ყაზახეთის, ყირგიზეთის, ტაჯიკეთისა და უზბეკეთის მინისტრები დაესწრნენ. მხარეებმა „შუა დერეფნის“ პოტენციალი, ვაჭრობა, ტრანსპორტი და ტურიზმი განიხილეს და ამ ფორმატში თანამშრომლობის გაგრძელების მზაობა გამოთქვეს.

●  23 ოქტომბერს გამოქვეყნებული მონაცემებით, რომლებიც ბანკებმა ეროვნულ ბანკს წარუდგინეს, 2026 წლის 9 თვეში საბანკო სექტორის წმინდა მოგება 2.9 მილიარდ ლარამდე გაიზარდა, რაც შარშანდელ ამავე პერიოდზე 480 მილიონი ლარით, ანუ 20%-ით მეტია. 19 ბანკიდან 15 მოგებაზეა, ოთხი ზარალზე. ყველაზე დიდი მოგება „საქართველოს ბანკმა“ (1.445 მილიარდი ლარი) და „თიბისიმ“ (1.063 მილიარდი ლარი) მიიღეს.

●  როსსელხოზნადზორის 23 ოქტომბრის განცხადებით, ნოემბრიდან ორი ქართული რძის გადამამუშავებელი საწარმო რუსეთის ბაზარზე შესვლას შეძლებს. სამსახური ასევე მზადაა, თევზისა და ზღვის პროდუქტების ექვსი ქართული მწარმოებელი შეამოწმოს.

●  სურსათის ეროვნულმა სააგენტომ 24 ოქტომბერს განაცხადა, რომ ოთხ სუნელ-სანელებელში აკრძალული სუდანის ჯგუფის აზო-საღებავები აღმოაჩინა: შპს „Beyza Gida San Tic“ წითელ წიწაკაში, შპს „იგოეთისა“ და შპს „ნთკ 2016“ სვანურ მარილში და შპს „დაბის“ ფარშის საკმაზში. ამ პროდუქტების რეალიზაცია აიკრძალა და მიმდინარეობს მათი ბაზრიდან ამოღება. სააგენტო მომხმარებლებს მოუწოდებს, შეძენილი პროდუქტი არ გამოიყენონ.

● აზერბაიჯანის პარლამენტის დეპუტატის ვაჟს, აჰმედ ალიზადეს, ოთხთვიანი წინასწარი პატიმრობა შეუფარდეს. საქმე ბაქოს ერთ-ერთ კაფეში მომხდარ მასობრივ ჩხუბს უკავშირდება, რომლის დროსაც ერთი ადამიანი დანით მიყენებული ჭრილობებით დაიღუპა, რამდენიმე კი დაშავდა. ალიზადეს დანაშაულებრივი გაერთიანების შექმნასა და ნარკოტიკების უკანონო ბრუნვას, მათ შორის დიდი ოდენობით, ედავებიან.

საქმე თავდაპირველად ხათაის რაიონულ სასამართლოს უნდა განეხილა, თუმცა მოსამართლეებმა თვითაცილება განაცხადეს, რადგან ბრალდებულის ძმა, ორხან ალიზადე, ამავე სასამართლოში მოსამართლედ მუშაობს. საქმე ნიზამის რაიონულ სასამართლოს გადაეცა, რომელმაც ალიზადეს პატიმრობა შეუფარდა.

● საქართველოში დაკავებული აზერბაიჯანის მოქალაქე იბად ჰუსეინოვი აზერბაიჯანის საელჩოს დახმარებით გაათავისუფლეს და სამშობლოში დაბრუნდა. აეროპორტში მან ჟურნალისტებს განუცხადა, რომ დაკავების მიზეზი არ აუხსნეს, მიუხედავად იმისა, რომ ამის გარკვევას ცდილობდა. ჰუსეინოვმა აზერბაიჯანელ დიპლომატებს დახმარებისთვის მადლობა გადაუხადა.

● აზერბაიჯანის პარლამენტმა საფრანგეთი და ევროპული ინსტიტუტები ადამიანის უფლებების საკითხში ორმაგ სტანდარტებში დაადანაშაულა. დეპუტატებმა გაეროს საფრანგეთში მიმდინარე საპროტესტო აქციების დროს პოლიციის ძალადობის გამოსაძიებლად დამოუკიდებელი კომისიის შექმნისკენ მოუწოდეს.

აზერბაიჯანელი დეპუტატების მტკიცებით, დემონსტრაციების დაშლისას არასრულწლოვნებიც დაშავდნენ, ათასობით ადამიანი დააკავეს, მხოლოდ 17 ოქტომბერს კი დაახლოებით 2 400 პირი. პარლამენტის განცხადებაში ნათქვამია, რომ ევროკავშირი და ევროპის საბჭო აზერბაიჯანში ადამიანის უფლებების დარღვევებს აქტიურად აკრიტიკებენ, საფრანგეთის მიმართ კი იმავე პრინციპულობას არ იჩენენ.

ბაქოსა და პარიზს შორის ურთიერთობები დიდი ხანია დაძაბულია. აზერბაიჯანი საფრანგეთს სომხეთისთვის იარაღის მიწოდებისა და ყარაბაღიდან წასული სომხების უფლებებზე ყურადღების გამახვილების გამო აკრიტიკებს. ბაქოს განცხადებით, პარიზი სათანადოდ არ რეაგირებს აზერბაიჯანელ უგზო-უკვლოდ დაკარგულთა და კულტურული მემკვიდრეობის განადგურების საკითხებზე.
თავის მხრივ, საფრანგეთი აზერბაიჯანთან დაკავშირებულ სტრუქტურებს საფრანგეთის ზღვისიქითა ტერიტორიების დამოუკიდებლობის მოძრაობების მხარდაჭერასა და პოლიციის მოქმედებების შესახებ დეზინფორმაციის გავრცელებაში ადანაშაულებს. ბაქო ბრალდებებს უარყოფს.

● ბაქოში, Baku Crystal Hall-ში, 15 წლამდე ფეხბურთელთა პირველი მსოფლიო ჩემპიონატისა და ფესტივალის, FIFA U-15-ის, გახსნის ცერემონია გაიმართა. ღონისძიებაში 189 ქვეყნის გუნდები მონაწილეობენ. ბაქოში 3 ათასზე მეტი ახალგაზრდა ფეხბურთელი და გუნდების წარმომადგენელი ჩავიდა.

ცერემონია FIFA-ს პრეზიდენტმა ჯანი ინფანტინომ გახსნა. მას აზერბაიჯანის პრეზიდენტი ილჰამ ალიევი და პირველი ლედი მეჰრიბან ალიევაც ესწრებოდნენ. ტურნირი 30 ოქტომბრამდე გაგრძელდება.

● ბაქოში ახალი კალედონიისა და საფრანგეთის პოლინეზიის ახალგაზრდა ფეხბურთელების მხარდასაჭერი აქცია გაიმართა. გულშემატკივრები სპორტსმენთა საცხოვრებელ კომპლექსთან შეიკრიბნენ და FIFA U-15-ის მონაწილეებს მატჩების წინ მიესალმნენ. აქციის მონაწილეებმა წყნარი ოკეანის რეგიონის ხალხების მიმართ სოლიდარობა გამოხატეს და ეროვნული იდენტობის, კულტურისა და ტრადიციების შენარჩუნების მნიშვნელობაზე ისაუბრეს.

● აზერბაიჯანელმა ბერძნულ-რომაული სტილით მოჭიდავეებმა, ელდანიზ აზიზლიმ და სანან სულეიმანოვმა, ყაზახეთის დედაქალაქ ასტანაში გამართულ მსოფლიო ჩემპიონატზე ოქროს მედლები მოიპოვეს. აზიზლი მსოფლიო ჩემპიონი მეხუთედ გახდა, სულეიმანოვისთვის კი ეს პირველი მსოფლიო ჩემპიონის ტიტულია.

● აზერბაიჯანის ოპერისა და ბალეტის თეატრმა 98-წლიანი პაუზის შემდეგ ჯაკომო პუჩინის ოპერა „ტურანდოტის“ ახალი დადგმა წარმოადგინა. ორკესტრს იტალიელი დირიჟორი ბეატრიჩე ვენეცი ხელმძღვანელობდა. კალაფის პარტია აზერბაიჯანის სახალხო არტისტმა იუსიფ ეივაზოვმა შეასრულა, ტურანდოტის როლი კი იტალიელმა სოპრანომ კარმენ ჯანატაზიომ.
ეივაზოვმა პრემიერას ისტორიული მოვლენა უწოდა. მიუხედავად იმისა, რომ კალაფის პარტია მისი რეპერტუარის ერთ-ერთი ყველაზე ცნობილი ნაწილია, აზერბაიჯანში ის პირველად შეასრულა.

● სომხეთში ადგილობრივი თვითმმართველობის არჩევნები ათი რეგიონის 21 თემში გაიმართა. სულ 517 საარჩევნო უბანი გაიხსნა. 19 თემში არჩევნები პროპორციული სისტემით ჩატარდა, ხოლო ორ თემში, ფიოლეტოვოსა და შამირამში, მაჟორიტარული სისტემით.

●  სომხეთის შინაგან საქმეთა სამინისტრომ არჩევნების დროს სავარაუდო სამართალდარღვევების შესახებ 35 შეტყობინება მიიღო. ყველა შემთხვევა მოწმდება. დღის განმავლობაში მედიაში ვრცელდებოდა ვიდეოები და ცნობები კენჭისყრის ფარულობის დარღვევის, ამომრჩევლებზე უკანონო კონტროლისა და საარჩევნო აგიტაციის შესახებ. დაფიქსირდა შემთხვევებიც, როდესაც ამომრჩევლები კაბინაში ბიულეტენებს ფოტოებს უღებდნენ.

● არჩევნებზე ყველაზე მაღალი აქტივობა ვაიოცძორის რეგიონის ეღეგნაძორის თემში დაფიქსირდა – 62,56%. 21 თემიდან 11-ში მონაწილეობა ამომრჩეველთა ნახევარზე ნაკლებმა მიიღო. ყველაზე დაბალი აქტივობა ლორის რეგიონის ფიოლეტოვოს თემში იყო – 25,39%.

● ქალაქ მარტუნის დაახლოებით 20 ათასმა მცხოვრებმა ადგილობრივ არჩევნებში ხმის მიცემა ვერ შეძლო. მიზეზი ახალი კანონია, რომელიც არჩევნებში მონაწილეობას უზღუდავს მოქალაქეებს, რომლებიც განსაზღვრული პერიოდის განმავლობაში ქვეყანაში არ იმყოფებოდნენ.

პრორუსული ოპოზიციური პარტია „სომხეთის“ საპარლამენტო ფრაქციის დეპუტატმა გეღამ მანუკიანმა კანონი დისკრიმინაციულად შეაფასა. მისი თქმით, პრობლემა განსაკუთრებით მწვავეა მარტუნიში, საიდანაც ბევრი მცხოვრები სამუშაოდ საზღვარგარეთ მიდის.

● თურქეთში დასრულდა ტენდერი სომხეთის საზღვართან მდებარე ანის ისტორიული ხიდის აღდგენაზე. ინფორმაცია თურქეთის ტრანსპორტისა და ინფრასტრუქტურის სამინისტრომ გაავრცელა.

ხიდი X საუკუნეში, დიდი აბრეშუმის გზაზე, მდინარე ახურიანზე აშენდა და მნიშვნელოვანი სავაჭრო გადასასვლელი იყო. 2026 წლის 4 მაისს ერევანში სომხეთისა და თურქეთის წარმომადგენლები მის ერთობლივ აღდგენაზე შეთანხმდნენ. პროექტი ორ ქვეყანას შორის ურთიერთობების ნორმალიზების სიმბოლურ ნაბიჯად განიხილება.

● სომხეთის პრემიერ-მინისტრმა ნიკოლ ფაშინიანმა დაგმო საფრანგეთის ქალაქებში, ტრაპსა და ლა-ვერიერში, მომხდარი ტერაქტი და საფრანგეთს რასიზმისა და სიძულვილის წინააღმდეგ ბრძოლაში სოლიდარობა გამოუცხადა.

● სომეხმა ტანმოვარჯიშემ არტურ დავითიანმა როტერდამში გამართულ მსოფლიო ჩემპიონატზე ოქროს მედალი მოიპოვა. საყრდენ ხტომაში ორი ცდის ჯამში მან 14,850 ქულა დააგროვა და კარიერაში მეორედ გახდა მსოფლიო ჩემპიონი. დავითიანი ოლიმპიური თამაშების ვერცხლისა და ბრინჯაოს მედლების მფლობელი, ასევე ევროპისა და მსოფლიოს ჩემპიონია.

● 13 წლის სომეხმა მომღერალმა ნარემ (Naré) მალტაში გამართულ საბავშვო ევროვიზია 2026-ზე გაიმარჯვა. სიმღერით „BOO!“ მან 202 ქულა მოიპოვა.

ნიკოლ ფაშინიანმა Instagram-ზე ნარეს გამოსვლის ვიდეო გამოაქვეყნა და დაწერა: *„სომხეთმა საბავშვო ევროვიზიაზე გაიმარჯვა. ბრავო, ნარე!“*

ნარე ეკონომიკის ყოფილი მინისტრის, ვაჰან ქერობიანის, ქალიშვილია. ქერობიანი 2024 წლის თებერვალში, ფაშინიანის ხელისუფლების პირობებში, დააკავეს. მას სამინისტროს შესყიდვების ტენდერთან დაკავშირებულ უფლებამოსილების ბოროტად გამოყენებაში ედება ბრალი.

● ნიკოლ ფაშინიანი და მისი მეუღლე ანა აკოპიანი სომხეთის ეროვნულ გალერეაში ოჯახში ძალადობის წინააღმდეგ მოძრაობის, „მეტს აღარ მოვითმენთ“, სპეციალური გამოფენის გახსნას დაესწრნენ.

მოძრაობას ანა აკოპიანი ხელმძღვანელობს, რომელიც ფონდის „ჩემი ნაბიჯი“ დირექტორია. გამოფენაზე წარმოდგენილია ოჯახში ძალადობასთან ბრძოლის საერთაშორისო გამოცდილება და ინიციატივები ავსტრალიიდან, ახალი ზელანდიიდან, იტალიიდან, ჩილედან, ფინეთიდან და სხვა ქვეყნებიდან.

სამხრეთ კავკასიის მთავარი ამბები.მიმოხილვა 19-24 ოქტომბერი, 2026