TV პირველის ჟურნალისტს თავს დაესხნენ. ქარტია საგამოძიებოს დროულად გამოძიებისკენ მოუწოდებს
TV პირველის ჟურნალისტს თავს დაესხნენ
TV პირველის ინფორმაციით, მათ ჟურნალისტს, ნატო გოგელიას თავს დაესხა ძალადობრივი აქციის მონაწილე, რომელმაც პარლამენტთან ევროკავშირის დროშა ჩამოგლიჯა. ტელევიზიის ცნობით, გოგელია ინტერვიუს ჩასაწერად მამუკა ანდღულაძესთან მივიდა – ანდღულაძემ ჟურნალისტს დაუმტვრია ტელეფონი და მას ფიზიკური შეურაცხყოფა მიაყენა. ჟურნალისტური ეთიკის ქარტია საგამოძიებო უწყებებს მოუწოდებს, დროულად გამოიძიონ TV პირველის ჟურნალისტზე ძალადობის შემთხვევა.
როგორც ქარტიის განცხადებაშია აღნიშნული, ბოლო პერიოდში ჟურნალისტებზე გახშირებული თავდასხმების გამომწვევი ფაქტორები მედიის წარმომადგენლების მიმართ ჩადენილი დანაშაულების გაჭიანურებული და გამოუძიებელი საქმეებია.
გოგელიასთვის პროფესიულ საქმიანობაში უკანონოდ ხელის შეშლის საქმეზე სპეციალურმა საგამოძიებო სამსახურმა გამოძიება დაიწყო. გამოძიება საქართველოს სისხლის სამართლის კოდექსის 154-ე მუხლის პირველი ნაწილით მიმდინარეობს. საგამოძიებოში აცხადებენ, რომ სწრაფი და ობიექტური გამოძიების უზრუნველსაყოფად, ყველა საჭირო საგამოძიებო და საპროცესო მოქმედებას ატარებენ.
აღსანიშნავია, რომ ძალადობრივი აქციიდან კადრების არსებობის მიუხედავად, შსს დროშის ჩამოგლეჯაში მონაწილე პირების იდენტიფიცირებას ამ დრომდე ვერ ახერხებს. თბილისის საპატრულო პოლიციის უფროსის მოადგილემ, გოგა მემანიშვილმა განაცხადა, რომ “შესაბამისი რეაგირება” მაშინ იქნება, როცა ამ პირის იდენტიფიცირებას მოახდენენ.
“საქმის წარმოება დაიწყო აღნიშნულ ფაქტთან დაკავშირებით, იდენტიფიცირება როდესაც მოხდება იმ პირის, ვინც ჩამოხსნა, შესაბამისი რეაგირება მოჰყვება”, – განაცხადა მემანიშვილმა TV პირველთან.
თუმცა, ძალადობრივი აქციიდან გავრცელებულ კადრებში დროშის ჩამოხევაში მონაწილე ყველა პირის იდენტიფიცირება შესაძლებელია – მათ შორის იყო პრორუსული “ალტ ინფოს” ერთ-ერთი ლიდერი ზურაბ მახარაძე, რომელმაც აქციაზე სიტყვით გამოსვლის დროს თქვა, რომ დროშა თავად ჩამოხია.
● ვითხოვთ უსაფრთხო მედიაგარემოს – მედიისა და საზოგადოების მიმართვა მთავრობას
● “არასწორ მხარეს დგახარ” – თბილისში ჟურნალისტ ვახო სანაიას ფიზიკურად გაუსწორდნენ
● “ფორმულას” თანამშრომლებს თავს დაესხნენ და მანქანა დაუზიანეს
14 აპრილს ძალადობრივმა, პრორუსულმა და ჰომოფობიურმა მცირე ჯგუფებმა პარლამენტის წინ ევროკავშირის დროშა კვლავ ჩამოგლიჯეს, დახიეს და ცეცხლი წაუკიდეს. ამ ფაქტზე პოლიციას რეაქცია არ ჰქონია, აქციის მონაწილეებთან მხოლოდ ერთი პოლიციელი იდგა, იმ სვეტთან კი სადაც დროშა ფრიალებდა, ხუთამდე პოლიციელი მოგვიანებით მივიდა. აქციის ერთ-ერთი ორგანიზატორი პუტინისტური “ალტ ინფო” იყო, რომლის წევრებიც ასევე მონაწილეობდნენ 5 ივლისის დარბევაში.
ძალადობრივმა ჯგუფებმა მსვლელობა, როგორც თავად ამბობენ, ზაჰესიდან დაიწყეს. ისინი აგრესიულ და მუქარის შემცველ განცხადებებს აკეთებდნენ, რუსთაველის გამზირზე კი ქვები დაუშინეს აივანს, სადაც უკრაინის დროშა იყო გადმოფენილი.
პრორუსულმა დაჯგუფებებმა ევროკავშირის დროშა წარსულშიც ჩამოგლიჯეს. 2021 წლის 5 ივლისის მეორე დღეს, მათ პარლამენტის წინ აღმართული დროშა ჩამოხსნეს, 7 ივლისს კი დროშა მაშინდელმა სპიკერმა, კახა კუჭავამ აღმართა. ამის შემდეგ პარლამენტმა მიიღო კანონი, რომლითაც ევროკავშირის დროშის შებღალვა დასჯადი გახდა.
ახალი კანონის მიხედვით, პარტნიორი ქვეყნებისა და ორგანიზაციების დროშების დაზიანებისთვის მოქალაქე 1000 ლარით დაჯარიმდება. ამავე ქმედების განმეორებით ჩადენა გამოიწვევს ფიზიკური პირის დაჯარიმებას 2000 ლარით ან ფიზიკური პირის ადმინისტრაციულ პატიმრობას 15 დღემდე ვადით.
