ტრამპმა გაიმარჯვა, ამერიკამ გაურკვეველ მომავალში შეაბიჯა
დონალდ ტრამპმა საპრეზიდენტო არჩევნებში გამარჯვებით დაამსხვრია ყველა მოლოდინი და მსოფლიოს აჩვენა პოლიტიკური ელიტების წინააღმდეგ აგრესიულად განწყობილი ამერიკელი ამომრჩეველი. მან ამით მსოფლიო ახალ უცნობ პოლიტიკურ მოგზაურობაში შეიყვანა. ამის შესახებ გარდიანი წერს.
რესპუბლიკელების კანდიდატმა დონალდ ტრამპმა მიაღწია ყველაზე წარმოუდგენელ პოლიტიკურ გამარჯვებას თანამედროვე ამერიკის ისტორიაში. და ეს ყველაფერი მიუხედავად იმ სკანდალებისა, რომლებიც ნებისმიერ სხვა კანდიდატს უბრალოდ გაანადგურებდნენ. დაუჯერებელია, მაგრამ მისთვის ხელი არ შეუშლია არც მის პოლიტიკურ გამოუცდელობას, ასევე ექსტრემალურ განცხადებებს, რასისტულ გამონათქვამებსა და სექსისტურ ქცევებს, რომლებსაც აკრიტიკებდნენ არა მხოლოდ დემოკრატები, არამედ რესპუბლიკელებიც.
თავდაპირველად მან მოულოდნელი გამარჯვება მოიპოვა ფლორიდაში, ჩრდილოეთ კაროლინასა და ოჰაიოში, ხოლო შემდეგედ ინდუსტრიულმა ე.წ. Rust Belt შტატებმა მისი ტრიუმფი საბოლოოდ გააფორმეს.
ვისკონსინსა და მიჩიგანში არჩევნებადე არც თუ დიდი ხნის წინ საკმაოდ ბევრი სამუშაო ადგილი შემცირდა, რაც მძიმე დარტყმა იყო ამ შტატებისთვის. ეს ის შტატებია, სადაც ჰილარი კლინტონმა ჯერ კიდევ დემორკატების შიდა პარტიულ პრაიმერისზე თავის კონკურენტთან – ბერნი სანდერსთან წააგო. ტრამპმა ორივე შტატში მოუგო კლინტონს.
დაახლოებით 2:30 წუთზე Asociated Press-მა ვისკონსინში ტრამპის გამარჯვების შემთხვევაში, მის მიერ მთელი პროცესის მოგება ივარაუდა. საბოლოოდ ასეც მოხდა – ვისკონსინის შედეგებით ტრამპმა გადალახა ზღვარი და კოლეგიის 270-ზე მეტი ხმა მიიღო. ანუ იმდენი, რამდენიც პრეზიდენტობისთვის სჭირდებოდა.
ამის შემდგომ, ცოტა ხანში ტრამპს ჰილარი კლინტონმა დაურეკა და დამარცხება აღიარა.
ტრამპმა ცოტა ხნით დატოვა თავის რეზიდენცია – “ტრამპ თაუერი” და “ჰილტონ მიდთაუნში” მივიდა, სადაც უკვე როგორც არჩეულმა პრეზიდენტმა ისე დაიკავა სცენა. ტრამპი ამტკიცებდა, რომ ის ყველასთან ერთნაირად სამართლიანი იქნება.
“ბოდიში, რომ გალოდინეთ, ძალიან რთული დღეა, ძალიან რთული”, – ტრამპმა საუბარი მხარდამჭერების შეძახილების ფონზე დაიწყო, რომლებიც სკანდირებდნენ: “USA! USA!”.
“მე ახლახან ზარი მივიღე გენერალური მდივნისგან. ჰილარი კლინტონმა ჩვენ მოგვილოცა – ჩვენი გამარჯვება მოგვილოცა და მე მივულოცე მას ძალიან რთული ბრძოლა საარჩევნო კამპანიისას”.
“ახლა დადგა დრო, რომ ჩვენ ამერიკელებმა ჭრილობები მოვიშუშით და ყველანაირი განხეთქილებები დავივიწყოთ. ახლა დროა ერთად, როგორც ერთიანმა ხალხმა ისე დავიწყოთ მუშაობა… მე გპირდებით ჩვენი ქვეყნის ყველა მოქალაქეს, რომ მე ვიქნები ყველა ამერიკელის პრეზიდენტი”, – დაამატა ტრამპმა.
გამარჯვებული რესპუბლიკელის გამოსვლამდე ცოტა ხნით ადრე, თავზარდაცემული დემოკრატი მხარდამჭერების წინაშე კლინტონის კამპანიის ხელმძღვანელი, ჯონ პოდესტა გამოჩნდა. მან თქვა, რომ ჯერჯერობით არანაირი განცხადება არ იქნება. “ყველა უნდა წავიდეს სახლში, გამოიძინეთ და ხვალ ჩვენ უფრო მეტი სათქმელი გვექნება”, – მიმართა მან მხარდამჭერებს.
“ეს იყო გრძელი ღამე და ხანგრძლივი წინასაარჩევნო კამპანია. ხომ შეგვიძლია ცოტაც მოვიცადოთ? ხმების დათვლა გრძელდება, ყველა ხმა ითვლება, რამდენიმე შტატია დარჩენილი და დღეს ღამით ჩვენ სხვა არაფრის თქმას არ ვაპირებთ”, – აღნიშნა პოდესტამ.
როგორც ტრამპის შტაბში ამბობენ, კლინტონმა ტრამპს ზუსტად ამ დროს დაურეკა. ტრამპმა მას უთხრა: “თქვენ ბრწყინვალე კამპანია ჩაატარეთ. მე მადლობელი ვარ ამ ზარისთვის და დიდ პატივს გცემთ”.
ტრამპმა ასევე ისაუბრა ბარაკ ობამასთან, რომელმაც დაურეკა მას და არჩევნებში გამარჯვება მიულოცა. ობამამ დაპატიჟა ტრამპი თეთრ სახლში. ეს ვიზიტი ხუთშაბათს უნდა შედგეს.
“ეს ისტორიული ღამეა, – თქვა არჩეულმა ვიცე-პრეზიდენტმა მაიკლ პენსიმ, მას შემდეგ რაც ის ტრამპმა წარადგინა – ამერიკელმა ხალხმა აირჩია თავისი ახალი ჩემპიონი”.
რესპუბლიკელები ამ დროს უკვე ზეიმობდნენ. მათ მოიპოვეს ასევე უმრავლესობა წარმომადგენლობით პალატასა და სენატშიც და, სავარაუდოდ, უზენაეს სასამართლოში რესპუბლიკელების მეხუთე კანდიდატს დანიშნავენ. ფაქტობრივად, ეს ნიშნავს იმას, რომ პრეზიდენტის მუშაობაზე კონტროლი მინიმუმამდე იქნება დაყვანილი.
შედეგების გამოცხადების პროცესს ეს ორი ძალიან განსხვავებული კანდიდატი ტელევიზორს ერთმანეთისგან 2 წუთის სავალზე უყურებდა: კლინტონის გუნდი – სასტუმრო “პენსილვანიაში” მანჰეტენის შუაგულში და რესპუბლიკელები – “ტრამპ თაუერში”.
თუმცა, განწყობა ტრამპის ბანაკში გაცილებით ადრე შეიცვალა, როდესაც გამოჩნდა ძლიერი მხარდაჭერა ფლორიდაში, კლინტონის მხარდამჭერებმა კი დარჩენილ შანსებზე დაიწყეს ფიქრი.
ათასობით ადამიანი იყო შეკრებილი მანჰეტენზე და ტელევიზორს შესცქეროდა.
კლინტონის შტაბში ერთ ქალს ხელები პირზე ჰქონდა აფარებული, თითქოს არ სჯეროდა, რომ ტრამპმა ჩრდილოეთ კაროლინაშიც გაიმარჯვა. განწყობა თანდათან დაეცა შედეგების თანმიმდევრულად გამოცხადებასთან ერთად: ოჰაიო, ფლორიდა, ჩრდილოეთ კაროლინა – ტრამპმა ყველა მოიგო. ქალმა ცრემლი მოიწმინდა თვალებიდან.
კაცმა, სახელად თეო თქვა, რომ შედეგები “საშიში და შემაშფოთებელია”. “ვერც ვიფიქრებდით, რომ ამდენი ზიზღი იყო ამ ქვეყანაში”.
პოდესტას განცხადების შემდეგ ფერად ტანსაცმელში გამოწყობილმა დემორკატების მხარდამჭერებმა, დაღლილ ბავშვებთან ერთად, თვალებიდან ცრემლების წმენდით დატოვეს შენობა. თანამშრომლები ერთმანეთს ეხვეოდნენ და ცრემლს წმენდდნენ თვალებიდან. ისინი მზად იყვნენ ამისთვის – მაგრამ რეალურად არავის სჯეროდა.
სუზი შენონი კალიფორნიიდან ჩავიდა თავის 8-წლის ქალიშვილ გრეისისთან ერთად, რათა ეთქვა, რომ ის ჯევიტის ცენტრში იყო, როდესაც ჰილარი კლინტონი პრეზიდენტად აირჩიეს. მათ ცენტრი ოთხშაბათ დილამდე რამდენიმე საათით ადრე დატოვეს.
ამ დროს ტრამპის მხარდამჭერების რაოდენობა გაიზარდა. მათი შეძახილები სულ უფრო და უფრო ხმამაღლა ისმოდა, როდესაც ეკრანზე ფლორიდის და ოჰაიოს შედეგები ჩნდებოდა.
როდესაც ეკრანზე კლინტონს უჩვენებდნენ, ტრამპის მხარდამჭერები ყვიროდნენ “დაიჭირეთ ეს ქალი!”.
რუსეთის პრეზიდენტმა ვლადიმირ პუტინმა მისალოცი ბარათი გაუგზავნა ტრამპს. გერმანიის კანცლერმა ანგელა მერკელმა ტრამპს არ მიულოცა, თუმცა განაცხადა, რომ აშშ-სთან მჭიდრო თანამშრომლობას ელის, ვინაიდან გერმანიას და ამერიკას საერთო ღირებულებები აერთიანებს, ისეთი, როგორიცაა “ადამიანების თანასწორობა მიუხედავად მათი კანის ფერისა, რელიგიისა, სექსუალური ორიენტაციისა და პოლიტიკური შეხედულებებისა”.
გამოქვეყნებულია: 09.11.2016
