ირაკლი კობახიძე – საქართველოს პრემიერმინისტრად პარლამენტმა 2024 წლის 8 თებერვალს დაამტკიცა.
კობახიძე განათლებით იურისტია – კონსტიტუციური სამართლის სპეციალისტი. 2005 წლიდან კითხულობს ლექციებს თბილისის სახელმწიფო უნივერსიტეტში, არის სრული პროფესორი. 2006 წელს დიუსელდორფის უნივერსიტეტში, გერმანიაში მიენიჭა სამართლის დოქტორის აკადემიური ხარისხი. ის ქართულ პოლიტიკაში აქტიურად 2014-2015 წლებიდან არის ჩართული.
კობახიძე 2015 წელს მმართველი პარტიის, „ქართლი ოცნების“ აღმასრულებელ მდივნად დაინიშნა. 2016 წლის საპარლამენტო არჩევნებში კობახიძე უკვე “ქართული ოცნების” საარჩევნო სიის მესამე ნომერი იყო. „ოცნების“ გამარჯვების შემდეგ კი პარლამენტის სპიკერი გახდა. პარლამენტის სპიკერობიდან კობახიძე 2019 წელს იძულებული გახდა გადამდგარიყო. მისი გადადგომა რუსი დეპუტატის, სერგეი გავრილოვის სახელს უკავშირდება.
2021 წლის 16 იანვარს, მას შემდეგ, რაც ბიძინა ივანიშვილმა პოლიტიკიდან მეორედ წასვლის შესახებ განცხადება გააკეთა, კობახიძე „ქართული ოცნების“ თავმჯდომარედ აირჩიეს.
