აშშ-თან ახალი დღის წესრიგი, ევროკავშირი და ეკონომიკის 7.5%-იანი ზრდა — რა წერია კობახიძის წლიურ ანგარიშში
კობახიძის წლიური ანგარიში
“ქართული ოცნების” პრემიერმინისტრის, ირაკლი კობახიძის მიერ პარლამენტისთვის წარდგენილი წლიური ანგარიში ქვეყნის საგარეო და ეკონომიკური პოლიტიკის მთავარ პრიორიტეტებს აჯამებს. დოკუმენტში განსაკუთრებული ყურადღება ეთმობა შეერთებულ შტატებთან ურთიერთობების აღდგენას, ევროკავშირში ინტეგრაციის პროცესს, უკრაინის მხარდაჭერას და ეკონომიკური მაჩვენებლების შეფასებას.
● მთავრობა აცხადებს, რომ აშშ-სთან სტრატეგიული პარტნიორობის განახლება მისი ერთ-ერთი უმთავრესი საგარეო პოლიტიკური ამოცანაა. ანგარიშის თანახმად, მიმდინარეობს აქტიური პოლიტიკური დიალოგი ვაშინგტონთან, რომლის მიზანია წინა ამერიკული ადმინისტრაციის პერიოდში შეჩერებული სტრატეგიული პარტნიორობის აღდგენა. ხელისუფლების შეფასებით, ახალი ორმხრივი დღის წესრიგი ორივე ქვეყნის ინტერესებს უნდა დაეფუძნოს და თანამშრომლობის სრულმასშტაბიან განახლებას შეუწყოს ხელი.
● დოკუმენტში ასევე ხაზგასმულია ევროკავშირთან თანამშრომლობა. მთავრობის ინფორმაციით, საანგარიშო პერიოდში გაგრძელდა ევროინტეგრაციის დღის წესრიგით გათვალისწინებული ვალდებულებების შესრულება. 2025 წლის აგვისტოში ევროკავშირში ინტეგრაციის კომისიამ დაამტკიცა როგორც მიმდინარე წლის სამოქმედო გეგმა, ასევე წინა წლის ანგარიშის შედეგები. პარალელურად, მომზადდა ახალი ანგარიშები და სამოქმედო გეგმები, მათ შორის ევროკომისიასთან თანამშრომლობის ფარგლებში საქართველოს მიერ შესრულებული ვალდებულებების შესახებ დოკუმენტები.
ანგარიშის ავტორები ამტკიცებენ, რომ ქვეყანაში არსებული უსაფრთხოების გამოწვევების მიუხედავად, საქართველო აგრძელებდა თანამშრომლობას ევროკავშირის საგარეო და უსაფრთხოების პოლიტიკის მიმართულებით. ხელისუფლება ამ პროცესს ქვეყნის ევროპული ინტეგრაციის ნაწილად წარმოაჩენს.
● საგარეო პოლიტიკის ნაწილში მნიშვნელოვანი ადგილი უკავია უკრაინასაც. ანგარიშის მიხედვით, საქართველო აგრძელებდა უკრაინის პოლიტიკური და დიპლომატიური მხარდაჭერის უზრუნველყოფას, ასევე ჰუმანიტარული დახმარების გაწევას. დოკუმენტის თანახმად, რუსეთის აგრესიის წინააღმდეგ მიმართულ საერთაშორისო ინიციატივებში საქართველომ მხარი დაუჭირა ან თანასპონსორობა გაუწია დაახლოებით 850 რეზოლუციას, გადაწყვეტილებასა და დეკლარაციას, ხოლო სხვადასხვა საერთაშორისო პლატფორმაზე 380-ზე მეტი ეროვნული განცხადება გააკეთა.
მთავრობა ასევე აღნიშნავს მონაწილეობას ეუთოს “მოსკოვის მექანიზმის“ ამოქმედებაში, უკრაინისთვის საერთაშორისო საჩივრების კომისიის დამფუძნებელ კონვენციაში გაწევრიანებასა და სხვადასხვა საერთაშორისო ღონისძიებაში მონაწილეობას. ანგარიშის მიხედვით, გაგრძელდა საქართველოში მყოფი უკრაინის მოქალაქეების მხარდაჭერა სოციალური და საგანმანათლებლო პროგრამების მეშვეობით, ხოლო უკრაინას ჰუმანიტარული დახმარების სახით გენერატორებიც გადაეცა.
● რეგიონული პოლიტიკის ნაწილში დოკუმენტი ყურადღებას ამახვილებს შავი ზღვის რეგიონში საქართველოს როლის გაძლიერებაზე. ხელისუფლება მიიჩნევს, რომ ქვეყნის სტრატეგიული მდებარეობა ევროკავშირის დაკავშირებადობის პოლიტიკისთვის განსაკუთრებულ მნიშვნელობას იძენს. ანგარიშში ხაზგასმულია, რომ ეს როლი ასახულია ევროკავშირის სხვადასხვა სტრატეგიულ დოკუმენტშიც.
● ეკონომიკური მიმართულებით მთავრობა ამტკიცებს, რომ საქართველო გეოპოლიტიკური დაძაბულობისა და გარე ეკონომიკური გამოწვევების მიუხედავად, ინარჩუნებდა მაკროეკონომიკურ სტაბილურობას. ანგარიშის თანახმად, 2025 წელს ქვეყნის ეკონომიკა 7.5 პროცენტით გაიზარდა, რაც ხელისუფლების შეფასებით, საერთაშორისო მასშტაბით ერთ-ერთ ყველაზე მაღალ მაჩვენებელს წარმოადგენს. მთავრობის მონაცემებით, მთლიანი შიდა პროდუქტი 104.6 მილიარდ ლარს მიაღწია, ხოლო ერთ სულ მოსახლეზე მშპ 28,235 ლარი, ანუ დაახლოებით 10,300 დოლარი იყო.
დოკუმენტში ასევე ნათქვამია, რომ ევროკავშირის კანდიდატი ქვეყნის სტატუსის მიღების შემდეგ მთავრობის მთავარი ამოცანა ეკონომიკის ევროკავშირის წევრობისთვის მომზადებაა. ხელისუფლება მიიჩნევს, რომ მომდევნო წლებში ეკონომიკური პოლიტიკა სწორედ ამ მიზანს უნდა ემსახურებოდეს.
● ირაკლი კობახიძე წერს, რომ ბრძოლის ველზე თავდაცვის ძალების დაცული, მდგრადი და ეფექტიანი მართვისა და კონტროლის, ასევე კავშირგაბმულობისა და ინფორმაციული სისტემებით მხარდაჭერის უზრუნველსაყოფად, მიმდინარეობს ქვედანაყოფების აღჭურვის პროცესი თანამედროვე რადიოსისტემებით. მთავრობის ანგარიშის თანახმად, უწყვეტ რეჟიმში გრძელდებოდა ქვედანაყოფების დაკომპლექტება კავშირგაბმულობის სპეციალური მანქანებითა და ტაქტიკური რადიოსადგურებით.
მოხსენებაში ნათქვამია, რომ თავდაცვის სამინისტროს საავიაციო პარკის აღდგენის პროცესის ფარგლებში, საფრენი აპარატების აღდგენითი სამუშაოები მიმდინარეობდა. მოდერნიზება ჩაუტარდა სასწავლო-სატრანსპორტო საფრენ აპარატებს, ასევე გარემონტა შვეულმფრენები და სხვა საფრენი აპარატები.
წლიური ანგარიში ამ ეტაპზე პარლამენტს წერილობითი ფორმით წარედგინა. ირაკლი კობახიძე მას საკანონმდებლო ორგანოში ზეპირი მოხსენების სახითაც წარადგენს, თუმცა განხილვის ზუსტი თარიღი ჯერ ცნობილი არ არის.
