სომხეთში მიტინგებისა და გაფიცვის გამართვაზე აკრძალვა მოიხსნა
სომხეთში მოხსნეს შეზღუდვები, რომელიც შეკრებებისა და გაფიცვების ორგანიზებასა და მათში მონაწილეობაზე იყო დაწესებული. ის ძალაში 27 სექტემბერს, ქვეყანაში საომარი მოქმედებების გამოცხადებისთანავე შევიდა – ანუ ყარაბაღში საბრძოლო მოქმედებების დაწყებისთანავე.
გადაწყვეტილება უკვე გამოქვეყნდა სომხეთის მთავრობის ვებგვერდზე და ძალაში გამოქვეყნებისთანავე შევიდა.
მიუხედავად მიტინგების ჩატარებაზე ამ დრომდე მოქმედი აკრძალვისა, ქვეყანაში 10 ნოემბრიდან მოყოლებული საპროტესტო აქციები იმართებოდა, რომელსაც ორგანიზებას გაერთიანებული 17 ოპოზიციური პარტია უწევდა.
ათასობით ადამიანი იკრიბებოდა ერევანში, თავისუფლების მოედანზე, რათა თავიანთი უარყოფითი დამოკიდებულება გამოეთქვათ ყარაბაღში საბრძოლო მოქმედებების შესახებ 10 ნოემბერს ხელმოწერილი სამმხრივი განცხადების მიმართ. დემონსტრანტები და საპროტესტო აქციების ორგანიზატორი ოპოზიცია ითხოვდნენ და ამ დრომდე ითხოვენ პრემიერ-მინისტრის გადადგომას.
მათ მიაჩნიათ, რომ ნიკოლ ფაშინიანმა „მოღალატეობრივ შეთანხმებას“ მოაწერა ხელი ყარაბაღის აზერბაიჯანისთვის ნებაყოფლობით გადაცემის შესახებ. ამიტომ, ერევნის ცენტრში, სადაც დაუმორჩილებლობის აქციები იმართება, ხშირად შეიძლება გაიგოთ, როგორ სკანდირებენ ადამიანები – „ნიკოლ, წადი“ და „ნიკოლ – მოღალატე“.
მიტინგების გამართვასა და მასში მონაწილეობაზე ხელისუფლების მიერ დაწესებული შეზღუდვების მოხსნამდე, პოლიცია აქციის მონაწილეებს საომარი მდგომარეობის მოთხოვნების დარღვევის გამო აპატიმრებდა.