საქართველოში საშუალო თვიური ხელფასი 1 368 ლარამდე გაიზარდა
გაზიარება
გაზიარება
საქართველოს სტატისტიკის ეროვნული სამსახურის ინფორმაციით, 2021 წლის მესამე კვარტალში საშუალო თვიური ხელფასი, გასული წლის შესაბამის პერიოდთან შედარებით 129 ლარით [10.4%] გაიზარდა და 1 368 ლარი შეადგინა.
წყარო: საქსტატი
ყველაზე მაღალი ხელფასებია შემდეგ დარგებში:
საფინანსო და სადაზღვევო საქმიანობა – 2 234 ლარი (ზრდა 10.4%);
ინფორმაცია და კომუნიკაცია – 2 193 ლარი (ზრდა 2%);
პროფესიული, სამეცნიერო და ტექნიკური საქმიანობები – 2 003 ლარი (ზრდა 4.3%).
აღსანიშნავია ისიც, რომ 2021 წლის მესამე კვარტალში ქალების საშუალო ხელფასი 1106 ლარით, ხოლო კაცების – 1 612 ლარით განისაზღვრა. ხელფასების წლიურმა ზრდამ ქალებში 128.2 ლარი (13.1%) შეადგინა, ხოლო კაცებში – 139.6 ლარი (9.5%).
საქსტატის აგვისტოს მონაცემებით, საარსებო მინიმუმმა 221.1 ლარი შეადგინა, რაც ქვეყნის ისტორიაში რეკორდული ნიშნულია. ეს ნიშნავს აგრეთვე იმას, რომ აგვისტოში შრომისუნარიანი ასაკის მამაკაცის საარსებო მინიმუმი, წინა თვესთან შედარებით, 2.8 ლარით გაიზარდა.
აღსანიშნავია ისიც, რომ იანვრის თვეში საარსებო მინიმუმი 195.6 ლარი იყო, 7 თვეში კი მაჩვენებელი რეკორდული ტემპით, 25.5 ლარით გაიზარდა.
საარსებო მინიმუმის ზრდა ინფლაციის მაღალ დონეს უკავშირდება. აგვისტოს მდგომარეობით, ქვეყანაში ინფლაციის მაჩვენებელი 10 წლის განმავლობაში ყველაზე მაღალი – 12.8 პროცენტი იყო.
საქართველოს ეროვნული ბანკის პრეზიდენტმა, კობა გვენეტაძემ 10 ნოემბერს განაცხადა, რომ საქართველოში ინფლაცია უფრო მაღალი იქნება, ვიდრე ეროვნული ბანკი ვარაუდობდა. გვენეტაძე აღნიშნავს იმასაც, რომ ვალუტის კურსის სტაბილურობაც განაპირობებს, იმას რომ ინფლაცია უფრო მაღალი იქნება.