საქართველოში ვირუსის შემთხვევები მატულობს, თუმცა ბიზნესზე შეზღუდვების დაწესება არ იგეგმება
მიუხედავად კორონავირუსის მომატებული შემთხვევებისა, საქართველოს მთავრობა არ აპირებს მკაცრი შეზღუდვების დაწესებას. ამის შესახებ ეკონომიკის მინისტრმა, ნათია თურნავამ განაცხადა.
”ამ ეტაპზე არ უნდა ველოდოთ ახალ შეზღუდვებს. საზოგადოებრივი ტრანსპორტის შეზღუდვამ ხელი შეუწყო მობილობის შემცირებას. ამ ეტაპზე ჩვენ სერიოზულ შეზღუდვებს არ დავაწესებთ ბიზნესზე”, – აღნიშნა თურნავამ.
მინისტრის თქმით, გასულ წელს კორონავირუსის შემთხვევების რაოდენობის ზრდა კონტროლდებოდა ბიზნესის საკმაოდ მკაცრი დახურვით და შეზღუდვებით, ახლა კი ეპიდემიოლოგიური ვითარება იმართება ამ უკიდურესი ზომების გარეშე, რაც, თურნავას აზრით, სწორი მიდგომაა.
საქართველოში კორონავირუსის მესამე ტალღა აპრილის შუა რიცხვებში დაიწყო და ეპიდემიოლოგები მის პიკს მაისის შუაში ელოდებიან.
მობილობის შესამცირებლად, ხელისუფლებამ ხანგრძლივი სააღდგომო შვებულება გამოაცხადა – 13 მაისამდე. 3 მაისიდან 12 მაისამდე საქალაქო ტრანსპორტი არ იმუშავებს, ხოლო კომენდანტის საათის მოხსნაზე საუბარიც არ ყოფილა – ის ჩვეულებრივად გრძელდება 21:00 საათიდან 5:00 საათამდე. გარდა ამისა, შაბათს და კვირას კაფეები და რესტორნები კვლავ მხოლოდ ღია სივრცეებში მუშაობენ.
მანამდე მთავრობამ მოხსნა კორონავირუსის პანდემიის გამო დაწესებული შეზღუდვების უმეტესობა. თუმცა ამას ეკონომიკაზე პოზიტიურად მაინც არ უმოქმედია – 2020 წლის შემოდგომაზე, მშპ-ს მაჩვენებელი 6,2% -ით შემცირდა.
___________________________________
● საქსტატმა ახალი საარსებო მინიმუმი თვეში 178 ლარით და 10 თეთრით განსაზღვრა
● იანვარ-თებერვალში საქართველოს ეკონომიკა 8.3 პროცენტით შემცირდა
● საქართველოში 307 ათას ადამიანს ლომბარდის ვალი აქვს
● ისტორიული ვარდნა: 1994 წლის შემდეგ საქართველოს ეკონომიკა ყველაზე მეტად 2020 წელს შემცირდა
● რეფინანსირების განაკვეთის ზრდის გამო, საქართველოს 200 000-მდე მოქალაქეს სესხი გაუძვირდა
___________________________________
საქართველო კორონავირუსის პანდემიის გამო შარშან, მარტში ჩაიკეტა. თუმცა მანამდე, 2019 წელს, საქართველოს 9 მილიონზე მეტი საერთაშორისო ვიზიტორი ეწვია და ტურიზმმა ჯამში ქართულ ეკონომიკას 3.2 მილიარდი დოლარი მოუტანა.
სტატისტიკის ეროვნული სამსახურის ინფორმაციით, 2020 წელს საქართველოს ეკონომიკა 6.1 პროცენტით შემცირდა, რაც ბოლო 26 წლის განმავლობაში ვარდნის რეკორდული მაჩვენებელია.