"შეიძლება, რამდენიმე ახალგაზრდა თავადვე მოეკლათ" - საქართველოს პრემიერის ინტერვიუ. კიდევ რა თქვა ღარიბაშვილმა
საქართველოს პრემიერის ინტერვიუ
საქართველოს პრემიერმა ირაკლი ღარიბაშვილმა სამთავრობო “TVიმედთან” ვრცელ ინტერვიუში 7-9 მარტის მოვლენებზე განაცხადა, რომ “შეიძლება, რამდენიმე ახალგაზრდა აქციის ორგანიზატორებს თავადვე მოეკლათ.”
“მათი ამოცანა იყო ქაოსი, არეულობა, მუდმივი დესტაბილიზაციის შენარჩუნება. შეიძლება, რამდენიმე ახალგაზრდა თავადვე მოეკლათ. ვთქვით, რომ ამ ნაბიჯით ჩვენ ვუფრთხილდებით ჩვენთვის ყველაზე უფრო ძვირფასს, საქართველოს სტაბილურობას, მშვიდობასა და არა ომის პოლიტიკას.” – ამბობს ღარიბაშვილი.
კიდევ რა თქვა ირაკლი ღარიბაშვილმა.
“მერაბიშვილმა დაადასტურა, რომ მათი ამოცანა არის ხელისუფლების გადატრიალება, შეცვლა და ომის დაწყება“
ირაკლი ღარიბაშვილის განცხადებით, შს ყოფილმა მინისტრმა აღიარა, რომ მათი მიზანი არის რუსეთის წინააღმდეგ ომის წარმოება.
პრემიერის განცხადებით, ვანო მერაბიშვილმა დაადასტურა, რომ მათი ამოცანაა, გადატრიალება და ომის დაწყება:
„მერაბიშვილმა დაადასტურა, თქვა, რომ მათი ამოცანა, მათი მიზანი არის ხელისუფლების გადატრიალება, ხელისუფლების შეცვლა და ომის დაწყება. კაცმა აღიარა, რომ მათი მიზანი არის ომის წარმოება რუსეთის წინააღმდეგ, ანუ მეორე ფრონტის გახსნა, რასაც ვუყვებოდით ჩვენს საზოგადოებას, ხალხს მთელი ერთი წლის განმავლობაში. ყველა ეს პროვოკაცია, დაწყებული სააკაშვილის შემოგზავნით, დამთავრებული უამრავი პროვოკაციით, რომელიც თავიდან ავიცილეთ, დასრულებული რამდენიმე დღის წინანდელი აქციებით.“
მანამდე ყოფილმა შს მინისტრმა, ვანო მერაბიშვილმა 10 მარტს “უკრინფორმის” მედიაცენტრში მასობრივი საპროტესტო აქციები დააანონსა.
ამასთან დაკავშირებით, ტვ იმედმა გაავრცელა ინფორმაცია, რომ მერაბიშვილის სიტყვებით, “საქართველოს ახალი მთავრობა რუსეთის წინააღმდეგ იომებს”. მერაბიშვილმა ზემოთ აღნიშნული უარყო და დასძინა, რომ იმედის ეს განცხადება “ქართული ოცნების კიდევ ერთი კომიკური მცდელობაა ყველგან და ყოველთვის, უკონტექსტოდ და ფეიქ ნიუსებით ახსენონ ვანო მერაბიშვილი.”
განცხადება გაავრცელა “ერთიანმა ნაციონალურმა მოძრაობამაც”, მათი თქმით მერაბიშვილის წინააღმდეგ სამთავრობო მედიის დეზინფორმაცია “ზოგიერთმა ოპოზიციონერმა დაიჯერა”.
“რუსი პროპაგანდისტები და მათი ქართველი მონები შეურაცხყოფას აყენებენ ქართველ ხალხს, განსაკუთრებით ახალგაზრდობას, რომელსაც შეცდომაში შეყვანილ მარიონეტებად ხატავენ. “ტვ ნაძეჟდამ” და “პოსტივიმ” დეზინფორმაციის ახალი კამპანია წამოიწყეს, ამჯერად ვანო მერაბიშვილზე დეზინფორმაციისა და Fake News-ების გავრცელებით, რომლებიც ოფიციალურად უარყოფილია.” – წერია განცხადებაში.
“რამდენიმე ახალგაზრდის ფოტო ვნახე, სატანისტების ფორმა ეცვათ“
“ძალიან ბევრი კრიტიკა მოვისმინეთ, რომ თითქოს პოლიციამ გადაამეტა. ეს სიცრუე და სისულელეა. ვინ დაიწყო ძალადობა, ძალადობა დაიწყო ნაცმოძრაობის ახალგაზრდულმა ფრთამ და მათი სახელები და გვარები ყველამ ვიცით, ე.წ. ამ გირჩის მოძრაობამ, პროვოკატორი ჯაფარიძის მოძრაობამ და ფრანკლინის კლუბის “ანარქისტებმა”, რამდენიმეს ფოტო ვნახე, გაოგნებული დავრჩი, რაღაც სატანისტების ფორმები ეცვათ, რამდენიმე ადამიანს, ახალგაზრდებს, არ მინდა მათი სახეები ვაჩვენო, მაგრამ ეს შემაშფოთებელია, რაც აქ ხდება. ეს ორგანიზაცია, კოლექტიური ნაცმოძრაობა, უკვე გადაქცეულია ექსტრემისტულ ორგანიზაციად და ცოტაღა უკლია, რომ ტერორისტული გახდეს.”
“აქციის შემდეგ ბევრმა დამირეკა და ბოდიში მომიხადა, მეგონა მართლა რაღაც ხდებოდაო“
“ამბობენ, რომ 800 მილიარდიდან 1 ტრილიონამდე მიყენებული აქვს უკრაინას ზარალი. ამ ქვეყანას რა დააყენებს ფეხზე. 20 მილიონი არის მიგრირებული. აი ეს ადამიანები, ვინც ეს ყველაფერი იცის, ცდილობენ, რომ ჩვენს ამ დალაგებულ და დაწყნარებულ ქვეყანაში შემოიტანონ დესტაბილიზაცია და ომი. ვიქნებით უკომპრომისო.
ჩვენს ხელთ არსებულ ყველა კანონიერ საშუალებას გამოვიყენებთ, რომ არცერთი ასეთი ადამიანის ქმედება არ დარჩეს პასუხგაუცემელი. ჩვენ ვეუბნებით მათ [სტუდენტებს], ნუ გახდებით მანიპულირების ობიექტი და ვიღაც პოლიტიკრი პარტიების ხელში ბრძოლის ინსტრუმენტი. მივმართავ ჩვენს სტუდენტებს: თქვენ გიყენებენ! გატყუებენ ეს ხელმოცარული, გაკოტრებული ადამიანები, თითქოს ოცნებას არ უნდა ევროპული გზა.
მე ფაქტები მოგიყვანეთ. ფაქტები მოიყვანონ ნაცმოძრაობის, ამ ფაშისტური ორგანიზაციის წარმომადგენლებმა. რა გააკეთეს ევროპულ გზაზე? არაფერი არ გაუკეთებიათ. ვიზა ლიბერალიზაციაზე მუშაობა 3 წლით გადადეს, ჩვენ დავიწყეთ, ჩვენ გავაკეთეთ. ასოცირება ჩააგდეს. შესაბამისად, ეს არის მითი, სიყალბე. ძალიან ბევრი ადამიანი, ნაცნობი ოჯახები აღმოვაჩინე აქციაზე. ძალიან ბევრმა დამირეკა, ბოდიში მომიხადა, მართლა მეგონა, რაღაც ხდებოდაო.”
● საპროტესტო ბანერები – აგენტების წინააღმდეგ მიმდინარე დემონსტრაციებიდან
● გაზი, წყლის ჭავლი, დაკავებები – მასშტაბური აქცია თბილისში რუსული კანონის წინააღმდეგ. ქრონოლოგია და ბევრი ფოტო
● მოსაზრება სომხეთიდან საქართველოში განვითარებულ მოვლენებზე: “სომხეთის მომავალიც წყდება”
პრემიერი თავდაცვის კოდექსზე ამბობს, რომ მოტივაცია გირჩის ანტიქართული მოძრაობის გამოწვევის დაძლევაა
“ჩვენი მთავარი ამოცანა არის ძლიერი რეზერვის შექმნა – ჩვენ ვართ მცირერიცხოვანი ერი, გვაქვს ძალიან მდიდარი სამხედრო ტრადიციები, ვართ მეომარი ხალხი, ძლიერი ხალხი ვართ და ჩვენ არ გვინდა, ქვეყანაში გავრცელდეს მავნე პოლიტიკა, ისეთი, როგორიც აწარმოა გირჩმა – ერთ-ერთი მთავარი მოტივაცია იყო სწორედ ამ გირჩის გამოწვევის დაძლევა.
არ მოვერიდები ამის თქმას, ეს ანტიქართული მოვლენაა, ანტიქართული ფენომენია და ანტიქართული მოძრაობაა. როდესაც შენს ჯანსაღ, ყველაზე მაგარ წარმომადგენელს, ახალგაზრდა კაცს თუ ქალს ეუბნები, რომ ჯარს თავი რომ დააღწიო, რომ არ ემსახურო შენს ქვეყანას, შენ გახდი ცრუ მღვდელმსახური და გახდი გასაბერი ეკლესიის წევრი, ბოდიშს ვიხდი ამ მკრეხელური სიტყვისთვის, ეს არის უბედურება, ეს ტრაგედიაა. 10 000-ზე მეტი ახალგაზრდა არის შეცდომილი. მათ ეუბნებიან, ჯარში არ წახვიდე და გახდი მღვდელმსახურიო, ეს ხომ უბედურებაა?!”
“სჯობს, ევროპარლამენტმა თავის თავს მიხედოს“
“მიხეილ სააკაშვილმა მთელ მსოფლიოში ლობისტური კომპანიები დაიქირავა. მხოლოდ აშშ-ში, ოფიციალურად მილიონი დოლარი აქვთ გადახდილი, რაც რეგისტრირებულია ისევ ამ კანონის მეშვეობით, FARA-ს კანონით, რომელიც ჩვენ უნდა მიგვეღო.
აი, ამ კანონის მოქმედების შედეგად, ჩვენ გავიგეთ, რომ მიხეილ სააკაშვილმა დედამისის მეშვეობით ლობისტები დაიქირავა და მათ საქმიანობაში მილიონი დოლარი გადაიხადა. მათ შორის, ევროპაშიც. ევროპარლამენტზე მაქვს საუბარი, თქვენ მათ რეზოლუციაზეც მკითხეთ. სჯობს, ევროპარლამენტმა თავის თავს მიხედოს. კორუფციის სკანდალში 100 ევროპარლამენტარია გახვეული. ჩვენ რატომ გვარიგებენ ჭკუას? ამ არეულობის დროს, როცა სპეცრაზმს, პოლიციასა და აგრესიულ ბრბოს შორის დაპირისპირება გახურებული იყო, რამდენიმე ევროპარლამენტარი გამოდიოდა და ამბობდა, რომ აქ რეჟიმის შეცვლა და დამხობა იყო საჭირო. ეს არის ანტიდემოკრატიული.”
ღარიბაშვილი კლიჩკოზე, არახამიაზე და სხვებზე: ვიღაც გაუგებარი ადამიანები, მიხედონ თავის თავს
“თქვენ ახსენეთ ზელენსკის მიმართვა – ახლა ომში მყოფი ადამიანი როცა იცლის და აქ საქართველოში რამდენიმე ათასი ადამიანის გამართულ დესტრუქციულ აქციას ეხმაურება, ეს უკვე პირდაპირი მტკიცებულებაა, რომ ეს ადამიანი ჩართულია, მოტივირებულია, რომ აქაც რაღაც მოხდეს, შეიცვალოს.
გამოვიდა კლიჩკო, გამოვიდა ფეიგინი, ვიღაც გაუგებარი ადამიანები გამოვიდნენ, კიდევ სხვებიც, უკრაინის პოლიტიკოსები, არახამია და ვიღაც ხელმოცარული ლუზერები, რომლებიც ამბობენ, რომ საჭიროა ცვლილება და საჭიროა რაღაც სცენარები, გადატრიალება და… ეს არის სხვა ქვეყნის შიდა პოლიტიკაში პირდაპირი ჩარევა. არ მინდა ახლა, ადამიანი ომშია და მინდა ყველას წარმატება ვუსურვო, ამ ომის დროულად დასრულება და სიმშვიდე. და ქვეყნის გაერთიანება მინდა ვუსურვო, მაგრამ თქვენ მიხედეთ თქვენს თავს და მიხედეთ თქვენ ქვეყანას – ეს მინდა ვუთხრა ყველას.”
“ქართული ოცნება” ამბობს, რომ გაიწვევს რუსულ კანონს. თუმცა, ექსპერტები გვაფრთხილებენ, რომ განცხადება არ კმარა
“ეს კანონი არავის სჭირდებოდა, არსაიდან არ მოდის, თუ არა მოსკოვის კარნახით” – სალომე ზურაბიშვილი
17 თებერვალს ოცნების სატელიტმა “ხალხის ძალამ” პარლამენტში განსახილველად ორი კანონპროექტი დაარეგისტრირა – „უცხოური გავლენის გამჭვირვალობის შესახებ“ კანონპროექტი და მეორე – „უცხოელი აგენტების რეგისტრაციის შესახებ“.
როგორც ამას პროცედურები ითვალისწინებს, ორივე კანონპროექტი ვენეციის კომისიაშია გადაგზავნილი.
ამ ორიდან ერთი – „უცხოური გავლენის გამჭვირვალობის შესახებ“ კანონპროექტი 7 მარტს პარლამენტმა 76 ხმით 13-ის წინააღმდეგ პირველი მოსმენით მიიღო.
კანონის ინიციირებას თბილისში, რუსთაველის გამზირზე საპროტესტო აქციები მოჰყვა. კანონპროექტის მიღების შემდეგ კი პროტესტი მრავალათასიან მიტინგებში გადაიზარდა, რომელიც ხელისუფლებამ ძალის გამოყენებით დაშალა. მომიტინგეებს დაუშინეს წყლის ჭავლსა და ცრემლმდენ გაზი.
ამ კანონპროექტს როგორც საქართველოში, ისე მის ფარგლებს გარეთ ყველა, მთავრობის გარდა, რუსულ კანონს უწოდებს და ამბობს, რომ მისი მიღება ქვეყნისთვის დიდი ბარიერია ევროკავშირისკენ მიმავალ გზაზე.
საბოლოოდ, უმრავლესობამ „რუსული კანონი“ მეორე მოსმენით ჩააგდო. „ხალხის ძალის“ მიერ ინიციირებული კანონის პროექტი კენჭისყრაზე განხილვის გარეშე დააყენეს. მის წინააღმდეგ ხმა 35 დეპუტატმა მისცა, მხარი 1-მა დაუჭირა.
რუსული კანონპროექტის ერთ-ერთი ავტორი დიმიტრი ხუნდაძე ამბობს, რომ ამ კანონის არმიღებით საზოგადოებამ “ხელიდან შანსი გაუშვა”. “ქართულმა ოცნებამ” “უცხოური გავლენის გამჭვირვალობის შესახებ” რუსული კანონპროექტის გაწვევის შესახებ 9 მარტს, დილას განაცხადა.
