ოპოზიციაში ამბობენ, რომ სამართალდამცავები ქვეყანას ტოვებენ. ხელისუფლება უარყოფს
სამართალდამცავები ქვეყანას ტოვებენ
“ერთიანი ნაციონალური მოძრაობის” თავმჯდომარის, ნიკა მელიას თქმით, სამართალდამცავი სტრუქტურებიდან კადრების მასობრივად გადინება ხდება და საქართველოს ათასობით პოლიციელი ტოვებს, ხელისუფლებაში კი ამბობენ, რომ ეს ინფორმაცია სიმართლეს არ შეესაბამება.
ნიკა მელია აღნიშნავს, რომ სამართალდამცავ სტრუქტურებში მომიშავე პირები სამსახურებს ტოვებენ იმის გამო, რომ მათ არ სურთ ოლიგარქის “პირად დაცვაში სამსახური.”
“ისინი ტოვებენ სამსახურის რადგან არ სურთ, რომ რუსული ოცნება მათი ხელით ახდეს ამ ქვეყანაში. ტოვებენ იმიტომ, რომ არ სურთ იცავდნენ რუსებს და მათ იმპერიალისტურ გამოხტომებს. არ სურთ საქართველოს დამოუკიდებლობის არმცნობი, კრემლის პროპაგანდისტი ჟურნალისტის, პოზნერის ღომის წელვის დაცვა და შედეგად აღშფოთებული ქართველი ახალგაზრდების დაჭერა.
მელიას განმარტებით, პოლიციელებს ასევე არ სურთ “უსამშობლო კადიროვისა და სერგეი ლავროვის ახლო მეგობრის”, ოკუპაციის კანონის არა ერთხელ დამრღვევის, ცნობილი კადიროველის, “ლევ ძენგოვის უსაფრთხოებას იცავდნენ ქართულ რესტორნებში დროს ტარებისას.”
ენმ-ს თავმჯდომარის თქმით, სამართალდამცავი სტრუქტურებიდან კადრების მასობრივ გადინებას შსს-ს მიერ მხოლოდ აგვისტოში გამოცხადებული ვაკანსიებიც ცხადყოფს. მელიას ცნობით, მხოლოდ საპატრულო პოლიციის დეპარტამენტში 145 ვაკანსიის დასაკავებლად შსს-მ კონკურსი გამოაცხადა:
“ასეთი მასშტაბური ვაკანსია ამ პოლიციას არ ახსოვს! უწყებაში სამსახურის დატოვების მოთხოვნით ასეულობით პატაკი დევს, რომელსაც არ უკმაყოფილებენ, მაგრამ ბევრი ისე გარბის, აღარც ეკითხებიან. გარბიან და მექსიკის გავლით ამერიკაში ჩასულები საუწყებლად რეკავენ რომ წავიდნენ უწყებიდან. გარბიან იმიტომ რომ ეს ხელისუფლება გასაჩერებელ ადგილს არ უტოვებს ამ ქვეყანაში პატრიოტ ადამიანებს.”
“ნაციონალური მოძრაობის” თავმჯდომარის თქმით, ხელისუფლების ცვლილების შემდეგ მოსული ძალა ყველაფერს გააკეთებს, რათა პოლიციელები ებრძოდნენ დამნაშავეებს და არა კვლავ ხელისუფლების ოპონენტებს.
ინფორმაცია შინაგან საქმეთა სამინისტროდან კადრების მასობრივი გადინების შესახებ, რამდენიმე თვეა ვრცელდება. როგორც სხვადასხვა სხვადასხვა წყაროს ამბობს, თანამშრომლების ნაწილი საზღვარგარეთ მიდის სამუშაოდ, ნაწილი კი საქართველოშივე, სხვა სამსახურის ძებნას იწყებს.
რამდენიმე დღის წინ გამოქვეყნდა “რადიო თავისუფლების’ ვრცელი ინტერვიუ უწყების ერთ-ერთ ყოფილ თანამშრომელთან, რომელიც მედიას ეუბნება, რომ ახლაც, შინაგან საქმეთა სამინისტროში რამდენიმე ასეული პატაკია დაწერილი დაკავებული პოზიციიდან გათავისუფლების მოთხოვნით.
თანამშრომლების მასობრივი გადინების შესახებ გავრცელებული ინფორმაციის პარალელურად, 17 აგვისტოს, შინაგან საქმეთა სამინისტრომ კონკურსი გამოაცხადა საპატრულო პოლიციის დეპარტამენტში 145 ვაკანსიის დასაკავებლად.
აღსანიშნავია, რომ განცხადება შინაგან საქმეთა სამინისტრომ არა მხოლოდ უწყების იმ ოფიციალურ საიტზე გამოაქვეყნა, სადაც როგორც წესი, მსგავსი ტიპის ვაკანსიების სია ქვეყნდება, არამედ ინფორმაცია სამინისტროს ფეისბუკის გვერდზეც ატვირთა.
თუმცა, როგორც შინაგან საქმეთა სტრატეგიული კომუნიკაციების დეპარტამენტის გავრცელებულ განცხადებაშია ნათქვამი, 145 ადგილზე ვაკანსია სასაზღვრო გამტარ პუნქტში მგზავრთა და ტრანსპორტის ნაკადის გაზრდით და რეგიონებში საპატრულო პოლიციის ეკიპაჟების რაოდენობის გაზრდის გამო გამოაცხადეს.
„ძალიან ბევრმა პროფესიონალმა დატოვა შსს იმიტომ, რომ აღარ უნდოდათ ამ მანკიერი ჯაჭვის რგოლები ყოფილიყვნენ. ჩემთვის ძალიან მნიშვნელოვანმა ადამიანმა მითხრა, რომ მე გავიქეცი და შემეშინდა. არ ვიცი, შეიძლება ეს ასეც არის. არასდროს დამიკარგავს ბრძოლის ჟინი, მაგრამ როცა მივხვდი, რომ ჩემს უკან იდგნენ ჩემი ოჯახის წევრები და როცა, მაგალითად, სამსახურში რაიმე პროტესტს გამოვთქვამდი, შეიძლება ეს კარგად არ დასრულებულიყო არც ჩემთვის და არც სხვებისთვის. სამსახურიდან წასვლამდე ცოტა ხნით ადრე, ჩემს თანამშრომელს სპექტაკლი დაუდგეს და შემდეგ დააკავეს. მივხვდი, რომ თუკი მათ დღის წესრიგს არ ავუბამდი მხარს, ვერც შიგნით და ვერც გარეთ დაცული ვერ ვიქნებოდი.“ – ეუბნება შსს-ს ყოფილი თანამშრომელი “რადიო თავისუფლებას.”
