სალომე ზურაბიშვილი: ისეთ ქვეყანაში ვართ, საუბარი რომ გვინდა, ვფიქრობთ, ტელეფონი ხომ არ დავტოვოთ
სალომე ზურაბიშვილი მოსმენებზე
საქართველოს პრეზიდენტმა სალომე ზურაბიშვილმა ე.წ მოსმენების კანონის შესახებ ისაუბრა, რომელსაც მან ვეტო დაადო. მისი თქმით, დღეს ჩვენ “ისეთ ქვეყანაში ვართ, საუბარი რომ გვინდა, ვფიქრობთ, ტელეფონი ხომ არ დავტოვოთ.”
“აქ გადის გამყოფი ხაზი, ჩვენ ვართ საბჭოთა მემკვიდრეობაში კიდევ, თუ გადავდივართ მართლაც ევროპულ სისტემაში. არის დაცული ჩვენი პირადი ცხოვრება მოსმენებისგან, თუ არა?! ჩვენ ვიცით, რომ ჯერ კიდევ ისეთ ქვეყანაში ვცხოვრობთ, სადაც სადმე რომ შევდივართ და საუბარი გვინდა, ვფიქრობთ, ტელეფონი გავიტანოთ თუ დავიტოვოთ? მერე ვძლევთ ამას და ვამბობთ, რომ ჯანდაბას, იყოს ეს ტელეფონი და მოუსმინონ – ეს არ არის ევროპული ცხოვრება, არ არის ადამიანის უფლებების დაცვა, ეს არის სხვა სისტემა და ჩვენ ამ სისტემიდან უნდა გამოვიდეთ. სწორედ ამის თქმა მინდოდა ამ ვეტოთი.” – თქვა ზურაბიშვილმა.
7 ივნისს “ქართული ოცნების” დეპუტატების ინიციირებული კანონპროექტი პარლამენტმა მესამე მოსმენით მიიღო, ხოლო პრეზიდენტმა მას ვეტო დაადო.
ევროპის საბჭოს ვენეციის კომისიის იურიდიული და საკონსტიტუციო ექსპერტთა გადაუდებელი დასკვნის მიხედვით, მოსმენების შესახებ კანონპროექტი მიღებულია ნაჩქარევად და მოითხოვს როგორც ზემოქმედების შეფასებას, ასევე უფრო დეტალურ დასაბუთებას.
ვენეციის კომისიის მიხედვით:
● საქართველოში ფარული თვალთვალის ღონისძიებების ზედამხედველობის მექანიზმი არაადეკვატურია და საჭიროა არსებული ფარული თვალთვალის სისტემების ყოვლისმომცველი გადახედვა.
● კომუნიკაციის თავისუფლება და კონფიდენციალურობა ფუნდამენტური ღირებულებებია ნებისმიერ ლიბერალურ საზოგადოებაში. ამიტომ ფარული თვალთვალის ზომები უნდა იყოს ფრთხილად ფორმულირებული და ვიწრო ინტერპრეტაციით სახელმწიფო უწყებებისა და სასამართლოების მიერ.
პრეზიდენტმა ბრიფინგზე ასევე აღნიშნა, რომ იმ ფორმით, რა ფორმითაც იყო მიღებული ცვლილებები, დაუსაბუთებლად და აჩქარებული წესით და ა.შ – ეს ყველაფერი აჩენს ახალ ეჭვს, რომ “ეს არის ძალაუფლების გამყარებისთვის მიღებული ცვლილებები”.
“ეს არ შეიძლება იმ მომენტში, როცა ჩვენ ვაცხადებთ რომ ამ რამდენიმე თვეში მივდივართ კანდიდატის სტატუსის მისაღებად. თუ მივდივართ ევროპისკენ, უნდა წავიდეთ. თუ არ მივდივართ და მაშინ უნდა ითქვას. ვეტო ამისი მთქმელი იყო, რომ ერთხელ და სამუდამოდ გადავწყვიტოთ საითკენ ვართ.” – აცხადებს საქართველოს პრეზიდენტი.
მისივე თქმით, როცა ვენეციის კომისიას არაკომპეტენტურობას აბრალებენ, “მით უმეტეს ისინი, რომლებიც სხვა დროს და სხვა სიტუაციებში სწორედ ამ კომისიის დასკვნებს იშველიებდნენ”, არასერიოზულია.
ასევე, პრეზიდენტი განმარტავს, რომ არის საკითხები, როცა ვეტო ატარებს ძალიან მაღალ პოლიტიკურ ნიშანს, რადგან ეს ეხება სისტემას:
“რადგან მოსმენები ეხება ჩვენს დღევანდელ და ხვალინდელ სისტემას.”