"სააკაშვილი სიკვდილის პირასაა" - რას ამბობენ ექსპრეზიდენტის ჯანმრთელობაზე ადვოკატები, ექსპერტები და თანამებრძოლები

მიხეილ სააკაშვილის ჯანმრთელობაზე

“მიხეილ სააკაშვილი ფაქტობრივად, ადამიანი აღარ არის, აქვს 38-მდე სიცხე, წნევა 170, საკვებს და წამლებს ვერ იღებს, არის ლოგინში”, – ამბობს სახელმწიფო დაცვის სამსახურის ყოფილი უფროსი და დეპუტატი “ნაციონალური მოძრაობიდან” თემურ ჯანაშია, რომელმაც მესამე პრეზიდენტი კლინიკა “ვივამედში” მოინახულა. ხოლო გუშინ,  ამერიკელმა ექსპერტმა შაჰინ ლახანმა საქართველოს მესამე პრეზიდენტის, მიხეილ სააკაშვილის მონახულების შემდეგ განაცხადა, რომ ყველა კვლევა აჩვენებს მწვავე დეფიციტს, ყველა იმ “სასიცოცხლო მაჩვენებლისა, რაც ნორმალურ ადამიანს, ნორმალური ჯანდაცვის პირობებში არ უნდა ჰქონდეს.” საწინააღმდეგოს ამტკიცებს კლინიკა “ვივამედი”, სადაც ამბბოენ, რომ მართალია სააკაშვილს აქვს მაღალი ტემპერატურა და წნევა, მაგრამ მისი მდგომარეობა სტაბილურია.

კლინიკაში სააკაშვილი მოინახულა მისმა უცხოელმა ადვოკატმა მასიმო დანჯელომაც. მისი თქმით, სააკაშვილის ჯანმრთელობის მდგომარეობა მნიშვნელოვნად არის დეგრადირებული.

“მისი სასიცოცხლო პარამეტრები არის ზღვარზე, რის მერეც ჩვენ კოლაფსი გველოდება. კოლაფსში მისი სიცოცხლის მოსპობას ვგულისხმობ”, – განაცხადა დანჯელომ.

როგორც ადვოკატი განმარტავს,  მიხეილ სააკაშვილს აქვს „სასიცოცხლო საფრთხე“, თუკი მისი სასიცოცხლო მაჩვენებლების გაუმჯობესება არ დაიწყება:

„ჩვენ დღეს გავარკვიეთ, რომ პრეზიდენტმა სააკაშვილმა გუშინ, მას შემდეგ, რაც მის ოთახში პროკურატურის წარმომადგენლები შეიჭრნენ და სასამართლო სხდომის გამართვას შეეცადნენ, მაღალი წნევისა და შეტევის ფონზე გონება დაკარგა. გონების დაკარგვის ეპიზოდი არ არის პირველი. ჩვენ ყველას კარგად გვახსოვს არაერთი ეპიზოდი, როცა მას გონების დაკარგვის შემთხვევები უფიქსირდება ძლიერი აღელვების და შოკური მდგომარეობის გამო, რაც გამოწვეული არის მოულოდნელი თავდასხმებით და სტუმრების ვიზიტებით მის ოთახში.”

აღსანიშნავია, რომ  მიხეილ სააკაშვილის მონახულება ლიცენზიის არქონის გამო ამერიკელმა ექსპერტმა, ნობელის პრემიის ლაურეატმა ჯეიმს კობიმ ვერ შეძლო. თუმცა სააკაშვილის კიდევ ერთი ადვოკატის, შალვა ხაჭაპურიძის თქმით, სასამართლო-სამედიცინო ექსპერტს დღეს მიხეილ სააკაშვილთან დაუშვებენ.

საქართველოს მესამე პრეზიდენტის, მიხეილ სააკაშვილის საქმეში ჩასართავად საქართველოში ნობელის პრემიის ლაურეატი სასამართლო-სამედიცინო ექსპერტი ჯეიმს კობი ორშაბათს ჩამოვიდა.

ჯანდაცვის სამინისტროში აცხადებდნენ, რომ თავდაპირველად ჯეიმს კობის სამუშაო აქტივობის დამადასტურებელი დოკუმენტები არ იყო წარმოდგენილი, რის გამოც პროფესიული განვითარების საბჭომ საქმეში ჩასართავად მისი მოთხოვნა არ დააკმაყოფილა. შემდეგ კი ცენტრ „ემპათიამ” ჯეიმს კობის საქმიანობასთან დაკავშირებით დამატებითი დოკუმენტები წარადგინა.

ჯეიმს კობის საქმეში ჩართვას ითხოვდნენ „ნაციონალური მოძრაობის“ წევრებიც, აღნიშნულის გამო მათ ჯანდაცვის სამინისტროსთან აქციაც გამართეს.

„ბატონი კობი ამდენი დღის განმავლობაში მოთმინებით იცდიდა მისთვის ლიცენზიის მინიჭების საკითხზე. თქვენ ხედავდით, ეს პატივსაცემი ადამიანი მსოფლიოში ძალიან ცნობილი ექიმი როგორ იჯდა და ელოდებოდა თანხმობას. იმისათვის რომ შეწყდეს საუბრები, ხომ არ იყო ჩვენი მხრიდან რაიმე დაჩქარების მეთოდი, ჩვენ მიღებული გვაქვს გადაწყვეტილება, რომ ბატონმა კობიმ უნდა მიიღოს ლიცენზია. შესაბამისად, მისი ფრენის გრაფიკი შეიცვალა და საქართველოში დარჩება, ვიდრე პრეზიდენტს არ ნახავს.” – ამბოს მასიმო დანჯელო.

● სააკაშვილის საქმეები. რისთვის ზის ციხეში ყოფილი პრეზიდენტი
● უკრაინული მიშა
● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?

საქართველოს სახალხო დამცველთან არსებული კონსილიუმის შეფასებითაც, რომელიც მიმდინარე წლის აპრილში გამოქვეყნდა, საქართველოს პატიმარი ექსპრეზიდენტის, მიხეილ სააკაშვილის ჯანმრთელობის მდგომარეობა მნიშვნელოვნადაა დამძიმებული. ოჯახი, მის საზღვარგარეთ სამკურნალოდ გადაყვანას ითხოვს. 

საქართველოში აშშ-ის ელჩმა კელი დეგნანმა საქართველოს მთავრობას მოუწოდა, საქართველოს მესამე პრეზიდენტის, მიხეილ სააკაშვილის ჯანმრთელობის საკითხზე სახალხო დამცველის რეკომენდაციებს სერიოზულად მიუდგეს.

უკვე 1 წელია, მიხეილ სააკაშვილი, დაპატიმრებულია. ექსპრეზიდენტი დააპატიმრეს მას შემდეგ, რაც ის 2021 წლის 1 ოქტომბერს, ფარულად დაბრუნდა საქართველოში.

საქართველოს ყოფილი პრეზიდენტი რუსთავის მე-12 სასჯელაღსრულების დაწესებულებაში იმყოფებოდა. იგი თავს პოლიტიკურ პატიმრად მიიჩნევს, ამიტომ, ამ ხნის განმავლობაში, პროტესტის ნიშნად ორჯერ იშიმშილა. მათ შორის, პირველ შემთხვევაში შიმშილობა 51 დღე გაგრძელდა.

მაშინ მიხეილ სააკაშვილის ჯანმრთელობის მდგომარეობა ისე დამძიმდა, რომ მკურნალობა დასჭირდა. იგი სამკურნალოდ ჯერ გორის სამხედრო ჰოსპიტალში, ხოლო შემდეგ კლინიკა “ვივამედში” გადაიყვანეს, სადაც ამ დრომდე მკურნალობს.

არსებობდა სტრასბურგის ადამიანის უფლებათა სასამართლოს 10 ნოემბრის გადაწყვეტილებაც. სასამართლომ მიხეილ სააკაშვილს შიმშილის შეწყვეტისკენ მოუწოდა, სახელმწიფოს კი დაავალა, უზრუნველეყო პატიმრის უსაფრთხოება და ადეკვატური მკურნალობა.