4 ოპოზიციური პარტია აქციაზე დაზარალებულებზე და მოძალადეებზე რეესტრს შექმნის
რეესტრი დაზარალებულებზე და მოძალადეებზე
ბარიერგადალახული 4 ოპოზიციური პარტია (კოალიცია ცვლილებისთვის; ერთიანობა-ნაციონალური მოძრაობა; ძლიერი საქართველო და გახარია-საქართველოსთვის) ერთობლივ განცხადებას ავრცელებს, სადაც ნათქვამია, რომ ისინი მუშაობენ რეესტრის შექმნაზე, სადაც პარლამენტთან მიმდინარე საპროტესტო აქციებზე დაზარალებული მოქალაქეებისა და მათზე მოძალადე საპოლიციო ძალების წარმომადგენლების შესახებ დეტალური ინფორმაცია და მასალა განთავსდება.
“ჩვენ ვმუშაობთ და კიდევ უფრო ინტენსიურად გადავდგამთ ნაბიჯებს იმისთვის, რომ შეიქმნას რეესტრი, რომელშიც ყველა მტკიცებულების აღწერით, თითოეული დაზარალებული და თითოეული მოძალადე დეტალურად იქნება დოკუმენტირებული.
ამ მასალებს იმისთვის გამოვიყენებთ, რომ ყველა მოძალადის საერთაშორისო სისხლის სამართლებრივი პასუხისმგებლობის საკითხი დადგეს, რომელსაც ისინი ვერსად გაექცევიან. არ დავტოვებთ არცერთ საერთაშორისო მექანიზმს, მათ შორის საერთაშორისო სასამართლოებს, სადაც დაზარალებულების სახელით საქმეებს არ წავიღებთ იმისთვის, რომ თითოეულმა მოძალადემ პასუხი უმკაცრესად აგოს.
ასევე, ვიზრუნებთ იმაზე, რომ მოქალაქეებს სწრაფი და კვალიფიციური სამართლებრივი დახმარება ჰქონდეთ იმისთვის, რომ თვითმარქვია, არალეგიტიმური რეჟიმის მხრიდან ზეწოლას გაუმკლავდნენ”. – თქვა კოალიცია “ძლიერი საქართველოს” ერთ-ერთმა ლიდერმა, ანა ნაცვლიშვილმა.
“კოალიცია ცვლილებისთვის” წევრის, თენგიზ თევზაძის თქმით, რეესტრი გულისხმობს არა მარტო დაზარალებულების სიას იმის შესახებ, თუ მათ მიმართ რა სახის წამება და არაადამიანური მოპყრობა განხორციელდა, არამედ, იმ პირების რეესტრსაც, ვინც ეს ჩაიდინა.
მასშტაბური საპროტესტო ტალღა საქართველოში აგორდა მას შემდეგ, რას პრემიერმინისტრმა ირაკლი კობახიძემ განაცხადა, რომ ქვეყანა ოფიციალურად აჩერებს ევროკავშირთან მოლაპარაკებების გახსნას.
ამ განცხადების შემდეგ თბილისში მრავალათასიანი მიტინგები არ წყდება. უკვე ოთხი ღამეა, აქციის მონაწილეებს სასტიკად არბევენ, სცემენ, მათ წინააღმდეგ იყენებენ წყლის ჭავლს, წიწაკის სპრეის, მხუთავ აირს, მაგრამ, აქციები არ იშლება.
