პარტია "დროა"რუსეთის მოქალაქეებისთვის ტურისტული გადასახადის დაწესებას ითხოვს
“დროა” რუსებისთვის ტურისტული გადასახადის დაწესებას ითხოვს
ოპოზიციური პარტია „დროა“ ითხოვს, საქართველოში შემოსული რუსი ვიზიტორებისთვის სამკვირიანი ვიზები და ტურისტული გადასახადი დაწესდეს.
პარტიაში ამბობენ, რომ რუსეთიდან შემოსული ტურისტები დაბალი მხარჯველობითი უნარის არიან. მათი დიდი რაოდენობა კი აფუჭებს ტურისტულ პროდუქტებს საქართველოში:
“საქართველო არ არის მასობრივი ტურიზმის ქვეყანა. ინდუსტრიის განვითარების სტრატეგია ეფუძნება მაღალ მხარჯველი ვიზიტორების მოზიდვას და ნიშური ტურიზმის განვითარება. რუსი ტურისტისთვის მისაღები ტურისტული ინფრასტრუქტურა და პროდუქტები მიუღებელია ახლო აღმოსავლეთის რეგიონიდან, ევროპიდან და შეერთებული შტატებიდან, აგრეთვე აზიის ქვეყნებიდან შემოსული ტურისტებისათვის”.
- პარტია “ლელო” რუსეთისა და ბელარუსის მოქალაქეებისთვის სავიზო რეჟიმის გამკაცრებას ითხოვს
- რუსეთის მოქალაქეებისთვის ვიზის შემოღებაზე პეტიციას ხელი რამდენიმე ათასმა ადამიანმა უკვე მოაწერა
- ირაკლი კობახიძე რუსეთის მოქალაქეების მიმართ ნეგატიურ განწყობას ანტისემიტიზმს ადარებს
ამასთან, „დროა“ ამბობს, რომ რუსი ტურისტების უკონტროლო შემოსვლა განსაკუთრებულ საფრთხეებს შეიცავს:
„ბოლო ათი წლის განმავლობაში, ოცნებას რუსეთის არც ერთი აგენტი არ გამოუვლენია. ამ ფონზე, ცხადია, რომ ტურისტული საფარით ჩვენს ქვეყანაში რუსეთის უამრავი აგენტი და პროვოკატორი შემოდის. შეგახსენებთ, რომ სერგეი და იულია სკრიპალების ქიმიური იარაღით მოწამვლის ავტორები, რუსეთის სამხედრო დაზვერვის ოფიცრები: რუსლან ბოშიროვი და ალექსანდრე პეტროვი ბრიტანეთში სწორედ ტურისტული მიზნით იმყოფებოდნენ“.
“დროაში” აცხადებენ, რომ რუსეთის მოქალაქეების „ღირსების“ დაცვის არგუმენტი რუსეთის ხელისუფლებამ შესაძლოა საქართველოს წინააღმდეგ გამოიყენოს.
პარტია გამოსავალს შემდეგში ხედავს:
- დაწესდეს სამკვირიანი ტურისტული ვიზები რუსეთის მოქალაქეებისათვის;
- შეიზღუდოს ბიზნესისა და კერძო საკუთრების რეგისტრაცია;
- შეიზღუდოს ბინადრობის უფლება;
- დაწესდეს ტურისტული გადასახადი რუსეთის მოქალაქეებისთვის
კერძოდ, “დროა” ითხოვს, რომ:
- რუსეთიდან შემოსულ თითოეულ მოქალაქეს საერთაშორისო პასპორტისა და რუსეთის შიდა პასპორტის (პირადობის მოწმობის) შემოწმების საფუძველზე საზღვარზე დაეკისროს გადასახადი 20 ლარის ოდენობით;
- თუ პირს ამავე დროს ექნება რუსეთის საბიუჯეტო სტრუქტურების საიდენტიფიკაციო დოკუმენტი – დაეკისროს გადასახადი 100 ლარის ოდენობით;
- რუსულ ნომრიან სატრანსპორტო საშუალებას, რომელიც არ ეწევა სავაჭრო ტვირთების გადაზიდვას, დაუწესდეს გადასახადი 50 ლარის ოდენობით;
- რუსული საბიუჯეტო სტრუქტურების სატრანსპორტო საშუალებას, დაუწესდეს გადასახადი 200 ლარის ოდენობით.
- ბათუმსა და აჭარის საზღვაო დასახლებებში გადაადგილებისა და პარკირების უფლებისთვის რუსული სანომრე ნიშნის ავტომანქანამ უნდა შეიძინოს სპეციალური საშვი. ერთდღიანი საშვი – 10 ლარი, სამდღიანი საშვი – 30 ლარი, ერთკვირიანი საშვი – 50 ლარი, ორკვირიანი საშვი – 100 ლარი. საპატრულო პოლიციას დაევალოს საშვების შემოწმება, რომლის არარსებობის შემთხვევაშიც ჯარიმამ უნდა შეადგინოს 150 ლარი.
პარტიაში ამბობენ, რომ ამ გზით მიღებული თანხა უნდა გადაირიცხოს “სახელმწიფო ფონდში”. ეს ფონდი უნდა მოხმარდეს:
- აფხაზეთის, სამაჩაბლოსა და აგვისტოს ომის ვეტერანებს;
- აფხაზეთიდან და სამაჩაბლოდან იძულებით გადაადგილებულ პირებს;
- საქართველოში 2022 წლის 23 თებერვლის შემდგომ შემოსულ უკრაინის მოქალაქეებს;
“2022 წლის ივნისისა და ივლისის თვეების მონაცემებზე დაყრდნობით, ამ ინიციატივის შედეგად მიღებული შემოსავალი შესაძლებელია ყოფილიყო მინიმუმ 20 მილიონი ლარი ორი თვის განმავლობაში“, – აცხადებენ პარტიაში.
2022 წლის მეორე კვარტალში საქართველოში ერთ მილიონზე მეტი (1 094 400) ვიზიტორი შემოვიდა. ამათგან, 19.3 პროცენტი – 147 700 ადამიანი, რუსეთიდან იყო.
შეგახსენებთ, რუსეთისა და ბელორუსის მოქალაქეებისთვის ვიზების დაწესების მოთხოვნით თავდაპირველად ოპოზიციური პარტია “ლელო” გამოვიდა. პარტია ითხოვს დროებითი ზომების შემოღებას, “რათა შესაძლებელი გახდეს საქართველოს ტერიტორიაზე შემომსვლელთა ნაკადის კონტროლი”.
“დროა” რუსებისთვის ტურისტული გადასახადის დაწესებას ითხოვს
