ნამახვანჰესის მოწინააღმდეგეები ფილარმონიასთან გზას გადაკეტავენ, ხვალ კი ხეობაში დაბრუნდებიან

რიონის ხეობის მცველები დღეს ფილარმონიის ტერიტორიაზე გადაინაცვლებენ და გზას გადაკეტავენ, ხოლო ხვალ, 26 მაისს, თბილისიდან რიონის ხეობის მიმართულებით კოლონით დაიძვრებიან და ხელს შეუშლიან კომპანია “ენკას” მუშაობას.

აქციის ორგანიზატორი ვარლამ გოლეთიანი 26 მაისზე გაკეთებულ მისივე განცხადებას განმარტავს და ამბობს, რომ დამოუკიდებლობის დღის აღნიშვნის ჩაშლას არავინ გეგმავს. 

“რა თქმა უნდა არავინ გეგმავს მეგობრებო, რომ ჩვენ გადავინაცვლებთ იქ და უბრალოდ ღონისძიებას შევუშლით ხელს, ეს არ იყო ნაგულისხმები ჩემ სიტყვებში რასაც მოჰყვა დიდი სპეკულაცია, რომ თითქოს რაღაც ღონისძიების ჩატარებას ხელს ვუშლით. 

აქ საუბარია იმაზე, რომ როდესაც ხელისუფალი ჩვენ სახელმწიფო ინტერესებს თმობს, ვის სასარგებლოდ ეს ჯერ კიდევ გაუგებარია და არ არის ეროვნული ინტერესების გამტარი, არ ითვალისწინებს სახალხო ნებას, უბრალოდ გაუგებარია, რატომ უნდა მივიდეს, აი ასეთი, ამ ჩინოვნიკის მოსასმენად კონკრეტულად თავისუფლების მოედანზე ადამიანი”, – თქვა გოლეთიანმა.

მან რესპუბლიკის მოედანზე შეკრებილებს სამოქმედო გეგმა წარუდგინა და კიდევ ერთხელ აღნიშნა, რომ არ შეიძლება ხეობა კერძო პირის ხელში იყოს:

“ეს არის დიდი ტერიტორია… ამიტომ, არ შეიძლება კერძო პირის ხელში, არ აქვს მნიშვნელობა, ეს იქნება უცხოელი თუ ეს იქნება ქართველი, გადადიოდეს მთელი ხეობა. ეს არის, რა თქმა უნდა, ანტისახელმწიფოებრივი მოქმედებაა. ამიტომ ამ და სხვა ნაწილში, თუნდაც მომგებიანია თუ არა ეკონომიკურად ეს პროექტი. ჩვენ ყველამ ვნახეთ, რომ ხელშეკრულებაში დათმობილია მათ შორის ეს ნაწილიც და არანაირ მოგებას აქედან პრაქტიკულად სახელმწიფო ვერ ნახულობს და თან ამ ხელშეკრულების გამფორმებელი არის თავად და ეს ბადებს ყველაზე დიდ ეჭვს, რომ აქ არის კორუფციული გარიგება”. 

დღეს მედიაგამოცემა მთის ამბებმა მოიპოვა იუსტიციის სამინისტროს დასკვნა, რომელიც უარყოფითად აფასებს ნამახვანჰესის ხელშეკრულებას. რიონის ხეობის მცველების მოთხოვნები უცვლელი რჩება.

_____________________________________

● “არა ნამახვანჰესს!” რატომ აპროტესტებენ საქართველოში დიდი ჰესების მშენებლობას
● “მოვახდენთ დედაქალაქის პარალიზებას” – თბილისში ნამახვანჰესის წინააღმდეგ საპროტესტო აქცია გაიმართა

______________________________________

ნამახვანჰესის მშენებლობის მოწინააღმდეგეებმა ორი დღის წინ რესპუბლიკის მოედანზე კარვები გაშალეს და განაცხადეს, რომ ისინი კარვებში ღამის გათენებას აპირებენ. აქციის მონაწილეების თქმით, ისინი უკან არ დაიხევენ. 

“რიონის მცველები” ითხოვენ: 

● შეჩერდეს ნამახვანჰესის მშენებლობა, კომპანია ENKA-მ დატოვოს რიონის ხეობა;

● გაუქმდეს ნამოხვანის ჰესების კასკადზე 2015 წელს გაცემული სამშენებლო ნებართვა და ყველა სხვა მასზე დაფუძნებული დოკუმენტი;

● გამოცხადდეს მორატორიუმი ენერგოსექტორში;

● თანამდებობიდან გადადგეს ეკონომიკისა და მდგრადი განვითარების მინისტრი ნათია თურნავა;

● დადგეს ყველა იმ პირის პასუხისმგებლობის საკითხი, ვინც ჩართულია ამ პროექტში – აღიძრას სისხლის სამართლის საქმე, არა მარტო ნათია თურნავას მიმართ, არამედ ყველა იმ პირთან დაკავშირებით, ვინც ხელს აწერს კონკრეტულ დოკუმენტაციებს. 

 _____________________________________

● მათი ხეობა. როგორ იცავენ ადგილობრივები საკუთარ სახლებს ნამახვანჰესის დიდი პროექტისგან. VIDEO
● „ორ ადამიანს დავიტოვებ, ჭამა-სმა ჩემზე იყოს“. თბილისი ნამახვანჰესის წინააღმდეგ მასშტაბური აქციისთვის ემზადება
● პოლიციამ სოფელ გუმათთან რკინის ბარიკადები აღმართა. რა ხდება რიონის ხეობაში

___________________________________

“ნამახვანიჰესი” – ასე ჰქვია პროექტს, რომლის განხორციელების შემთხვევაში იგი დამოუკიდებლობის გამოცხადების შემდეგ ქვეყნის ისტორიაში უდიდესი ენერგეტიკული პროექტი იქნება. პროექტს თურქეთის უმსხვილესი სამშენებლო კომპანია ENKA ახორციელებს და მისი ღირებულება 800 მილიონი აშშ დოლარია.

თუმცა, გარემოსდამცველებს და ადგილობრივ მოსახლეობას პროექტთან დაკავშირებით ბევრი კითხვა აქვთ. ისინი შიშობენ, რომ მასშტაბური ჰესი საფრთხეს შეუქმნის პატარა ხეობას, შექმნის სეისმურ საფრთხეს, შეცვლის მიკროკლიმატს, დააზიანებს უნიკალურ ვაზის ჯიშებსა და ღვინის წარმოებას.

ხელისუფლება კი, რომელიც აღნიშნული პროექტის მთავარი ლობისტია, ირწმუნება, რომ საფრთხეები გაზვიადებულია და ახალი ჰიდროელექტროსადგურების მშენებლობის გარეშე საქართველოს რამდენიმე წელიწადში სერიოზული პრობლემები ელის ენერგეტიკული უსაფრთხოების კუთხით.

ხუთ თვეზე მეტია, მდინარე რიონის ხეობაში არ წყდება პროტესტი ნამახვანის ჰესის პროექტის წინააღმდეგ.

2020 წლის ოქტომბრის ბოლოს, ადგილობრივმა მაცხოვრებლებმა და სამოქალაქო აქტივისტებმა წყალტუბოს მუნიციპალიტეტის სოფელ ჯონეთში კარვები გაშალეს. მათ ENKA– ს მოსთხოვეს დაუყოვნებლივ შეეჩერებინა სამუშაოები და ხეობიდან ტექნიკა გაეყვანა.

ელენე ასათიანის ეს ფილმი რიონის ხეობის მცველებზეა, თუ როგორ დაუკავშირეს მათ საკუთარი ცხოვრება ხეობის პროტესტს ჰესის წინააღმდეგ:

3 აპრილს პოლიციამ ნამახვანისკენ მიმავალი გზა ორივე მხრიდან ჩაკეტა და ადგილობრივები ტერიტორიაზე არ შეუშვა, რასაც მასობრივი პროტესტი მოჰყვა.

მაშინ ხეობაში კომპანია ENKA– ს ახალი დირექტორი მერან ლომინაძე პოლიციის თანხლებით ჩავიდა. აქტივისტები მას შეძახილებით – “მონა” და “წადი” დახვდნენ.

ამის შემდეგ აქცია ჯერ წყალტუბოში, შემდეგ კი ქუთაისში გაიმართა. სწორედ მაშინ გადაწყდა მასშტაბური აქციის თბილისში გამართვა.