მიხეილ სააკაშვილი: პრეზიდენტის მხრიდან მოვისმინე სიტუაციის ძალიან ზუსტი დახასიათება

საქართველოს მესამე პრეზიდენტი მიხეილ სააკაშვილი სალომე ზურაბიშვილის გუშინდელ განცხადებას ციხიდან ეხმაურება. ექსპრეზიდენტის თქმით, ბევრი წლის განმავლობაში პირველად მოისმინა “სიტუაციის ობიექტური და ძალიან ზუსტი დახასიათება”. ასევე, მშვიდობიანი პროტესტის პარალელურად, სააკაშვილი მიესალმება დიალოგის შეთავაზებას. 

“ის, რომ ჩვენ ეკონომიკური ბუმი და წარმატებები კი არ გვაქვს, როგორც მთავრობა ამბობს, არამედ ქვეყანაში არის უმძიმესი სოციალურ-ეკონომიკური, პოლიტიკური კრიზისი და საქართველოს მასობრივად ტოვებს ხალხი. ჩვენი ქვეყანა და საზოგადოება ვერ მიდის წინ.

ამის თქმას ნამდვილად დიდი გამბედაობა სჭირდებოდა და დღეს სალომე ზურაბიშვილმა ეს თვისება უდავოდ გამოაჩინა“, – აცხადებს ექსპრეზიდენტი.

ის ხაზს უსვამს იმასაც, რომ ერთი წუთითაც არ შეწყვეტს ბრძოლას, სანამ ის უმძიმესი სიტუაცია, რომელიც საქართველოს მეხუთე პრეზიდენტმაც “აღწერა დღევანდელ გამოსვლაში”, თითოეული ქართველისთვის რეალურად და რადიკალურად არ შეიცვლება.

“მთავარი ახლა შედეგია – ჩვენი ქვეყნის სამშვიდობოზე გაყვანა, ერთხელ და სამუდამოდ და შეუქცევადად დასავლურ გზაზე დაყენება და ჩვენი სახელმწიფოებრიობის ერთადერთი მტრის – რუსეთისგან სამუდამოდ გამოხსნა. საბოლოო ჯამში, ყველანი ამ ქვეყნის შვილები ვართ და სამოქალაქო თანხმობას, თამაშის პატიოსან წესებზე შეთანხმებას ალტერნატივა არ აქვს”, – წერს სააკაშვილი. 

● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
● შიმშილობის შემდეგ. გია ნოდიას თვალსაზრისი
● სააკაშვილის საქმეები. რისთვის ზის ციხეში ყოფილი პრეზიდენტი

16 დეკემბერს საქართველოს პრეზიდენტმა სალომე ზურაბიშვილმა წინასაახალწლო მიღებაზე პოლიტიკური პარტიების ლიდერებს და დამოუკიდებელ დეპუტატებს სიტყვით მიმართა. პრეზიდენტის თქმით, პოლარიზაციის განმუხტვის და შერიგების პროცესი უნდა იყოს ინკლუზიური, წინაპირობების გარეშე და “ქართული.”

ზურაბიშვილის თქმით, შერიგების პროცესი უნდა იყოს სრულიად გამჭვირვალე, რაც ნიშნავს იმას, რომ პროცესი დაიწყება კონსულტაციებით, ინდივიდუალურ თუ ჯგუფურ დონეზე ყველა სფეროს მონაწილეობით.

მისივე განმარტებით, ამ პროცესის დაწყებას არ შეიძლება წინ უსწრებდეს რამე ფორმის წინაპირობა, რადგან სხვადასხვა წინაპირობები ნიშნავს, რომ ეს ახალ პოლარიზაციას და ახალ დაპირისპირებას წარმოშობს.