"გარკვეული პროექტების შეჩერებაზეა ლაპარაკი" - ლუგარის ლაბორატორია შესაძლოა ამერიკული დახმარების გარეშე დარჩეს
ლუგარის ლაბორატორია
ტელეკომპანია “ფორმულას” ინფორმაციით, დაავადებათა კონტროლის ეროვნულ ცენტრსა და ლუგარის ლაბორატორიას ამერიკის შეერთებული შტატების ფინანსური დახმარება შეუჩერდა. წყაროს ცნობით, 95 მილიონი დოლარის ნაწილი, რომელსაც მთავრობა ანტიდემოკრატიული პოლიტიკის და ანტიდასავლური რიტორიკის გამო ვეღარ მიიღებს, ამ უწყებაშიც უნდა წასულიყო.
დაავადებათა კონტროლის ეროვნული ცენტრის დირექტორის მოადგილე პაატა იმნაძე “ფორმულასთან” ამბობს, რომ ცენტრისთვის და ლუგარის ლაბორატორიისთვის, სავარაუდოდ, აშშ-ის გარკვეული პროექტები შეჩერდა, თუმცა აქვე აღნიშნავს, რომ აშშ-ის დახმარება არ შეწყვეტილა.
“არ შეწყვეტილა, არის რაღაც პროექტები, რაზეც არის ლაპარაკი”, – ამბობს პაატა იმნაძე. თუმცა კონკრეტულად რა პროექტებზეა საუბარი იმნაძე აღნიშნავს, რომ “ჯერ ვერაფერს იტყვის”.
ლუგარის ლაბორატორიის ფინანსური სამსახურის დეპარტამენტის უფროსის, ოთარ ნამიჭეიშვილის თქმით, ლაბორატორიაში “რაღაც რიგი პროექტები დაპაუზდა დროებით”, თუმცა დეტალებზე ინფორმაცია ჯერჯერობით არ აქვს.
“ვაშინგტონი ცენტრის ერთ-ერთი მთავარი მხარდამჭერია”
დაავადებათა კონტროლია ეროვნული ცენტრის ყოფილი ხელმძღვანელი, ამირან გამყრელიძე ადასტურებს, რომ ვაშინგტონი ცენტრის ერთ-ერთი მთავარი მხარდამჭერია. მისი თქმით, ცენტრი ყოველწლიურად შეერთებული შტატებისგან 10 მილიონი დოლარის დახმარებას იღებდა, რაც სამეცნიერო პროექტებსა და პერსონალის გადამზადებას ხმარდებოდა.
“ზუსტი გადაწყვეტილებები, ალბათ, ამ კვირაში იქნება, რამდენადაც ვფლობ ინფორმაციას. დადასტურებული, ყოველ შემთხვევაში ჯერჯერობით, მე არ მაქვს. რატომღაც მგონია, რომ ჯანმრთელობის სფეროთი არ დაიწყება.
რა თქმა უნდა, ამერიკელების როლი დიდია. აშშ მოგეხსენებათ ჩვენი ყველაზე მნიშვნელოვანი და დიდი პარტნიორია, მათ შორის ჯანმრთელობის სფეროში. სახელმწიფო აფინანსებს ამ ლაბორატორიული სისტემის შენახვის ხარჯებს 2018 წლიდან, მაგრამ გრძელდება სერიოზული დახმარება.
2022 წლის აგვისტოში გვქონდა გრანტები და დიდი პროექტები, არა მარტო ამერიკული, იყო ევროკავშირი და გაეროც, დაახლოებით10 მლნ ლარის ოდენობის. ცხადია, ეს არ იქნება კარგი, თუმცა მე მაინც მგონია, რომ შეიძლება რადგან ეს ჯანმრთელობას ეხება და საზოგადოებრივ ჯანმრთელობას, არ გაავრცელონ ჩვენმა მთავარმა პარტნიორებმა.” – ამბობს გამყრელიძე.
პოლიტიკური შეფასება
საპარლამენტო უმრავლესობის წევრმა, გურამ მაჭარაშვილმა ამ თემაზე საუბრისას აღნიშნა, „რომ შესრულდეს ის, რისი სურვილიც უცხოურ ძალას აქვს, ლუგარის ლაბორატორია კი არა, ყველაფერი უკან მოგვრჩება”.
“ფიცი მწამს, ბოლო მაკვირვებს! – როცა ჩვენ ნაბიჯი ურთიერთობების გადატვირთვისკენ გადავდგით და ვამბობთ, რომ აშშ-სთან და ევროკავშირთან გადატვირთვისთვის მზად ვართ, იქიდან ვხედავთ, რომ დაფინანსება ისეთ კარგ საქმეებს უწყდება, რაზეც ჩვენც მადლობას ვამბობთ! სამაგიეროდ, საჯაროდ რადიკალური NGO-ები ფინანსდებიან – როდესაც იქიდან საუბარია, რომ ჩვენ მეგობრობა გვინდა, მაგრამ ქართველ ჯარისკაცს იარაღის შეძენაზე უარს ეუბნები, ხოლო გიგაურს ბომბების შესაძენად აფინანსებ, ვინ დაიჯერებს, რომ მეგობრობა გინდა?! მარტო სიტყვები არაფერს ნიშნავს!” – თქვა მაჭარაშვილმა.
“ერთიანობის” ერთ-ერთმა ლიდერმა, პაატა მანჯგალაძემ განაცხადა, რომ „ქართული ოცნების” ხელისუფლებაში ყოფნის თითოეული დღე, ქართული ოჯახებისთვის უფრო მეტ სიღარიბეს და ცივილიზებულ სამყაროსთან უფრო მეტ იზოლაციას ნიშნავს.
მანჯაგალაძის თქმით, აშშ-ის მხრიდან საქართველოსთვის 95 – მილიონიანი და ლუგარის ლაბორატორიის დაფინანსების შემდეგ, შესაძლოა ქვეყანაში მოქმედი 100-მდე პროექტიც შეჩერდეს, რაც მისი თქმით, სიღარიბესა და კიდევ უფრო დიდ ემიგრაციას გამოიწვევს.
“ჩვენ უნდა ვიცოდეთ, რომ დღეს საქართველოში მოქმედებს 10 მილიარდი ლარის ღირებულების, 100-მდე პროექტი, ეს პროექტები თუ შეჩერდება, საქართველოს სიღარიბე და უმუშევრობა ემუქრება და კიდევ უფრო მეტ ქართველს მოუწევს ქვეყნის დატოვება. თუ ხელისუფლება შეიცვლება, კიდევ 14 მილიარდს მიიღებს საქართველო, 4 წლის განმავლობაში, რაც სიღარიბის დამარცხებისა და ქართველების საქართველოში დაბრუნების წინაპირობა იქნება.
არათუ ლუგარის ლაბორატორიის დაფინანსება, არამედ სტუდენტებისთვის “ერასმუსის” პროგრამაც შეიძლება შეჩერდეს, იმიტომ, რომ შენ თუ „ჰეზბოლასთან“ და „ჰამასთან“ ხარ, მაშინ არაფერი არ გესაქმება ევროპაში, უნდა წახვიდე ვენესუელაში ან ირანში.
“ქართულმა ოცნებამ” ნათლად თქვა, “დასავლელი პარტნიორები არ არიან ჩვენი მეგობრები, ჩვენი მეგობრები არიან ირანი, “ჰეზბოლა”, ვენესუელაო“. ლუგარი ამერიკელების დაფინანსებული და შექმნილი პროექტია. ეს ლაბორატორია რომ არა, პანდემიის დროს, კოვიდ ანალიზების გაკეთება გაგვიჭირდებოდა.” – განაცხადა მანჯგალაძემ.
რა არის ლუგარის ლაბორატორია
ლუგარის ლაბორატორია თბილისის გარეუბანში, აეროპორტის გზაზე მდებარეობს. იგი ამერიკელი სენატორის, რიჩარდ ლუგარის სახელს ატარებს. ოფიციალურად მას რიჩარდ ლუგარის სახელობის საზოგადოებრივი ჯანმრთელობის კვლევითი ცენტრი ეწოდება.
ლაბორატორია აშშ-ის თავდაცვის დეპარტამენტის მიერაა დაფინანსებული და როგორც ამირან გამყრელიძე ამბობს, ამერიკელი ხალხის დახმარების ერთ-ერთი საუკეთესო მაგალითია. ლუგარის ლაბორატორია მოწინავეა ამ რეგიონში და მისი არსებობა არამხოლოდ საქართველოსთვის, მეზობელი ქვეყნებისთვისაც მნიშვნელოვანია.
ამირან გამყრელიძის თქმით, ზუსტად ეს არის ის, რის გამოც ის ხშირად ხდება რუსეთის თავდასხმის სამიზნე. მისი თქმით, კრემლს აღელვებს ის, რომ საქართველოს თავად აქვს ასეთი მაღალი დონის სამეცნიერო ლაბორატორია და რუსეთზე დამოკიდებული აღარ არის.
ლუგარის ლაბორატორიას წლებია უწევს რუსული პროპაგანდის მოგერიება.
კრემლთან დაახლოებული მედია, ქართული პრორუსული რესურსების დახმარებით, ცენტრის წინააღმდეგ ნამდვილ საინფორმაციო ომს აწარმოებენ.
დოკუმენტური ფილმებიც კი იქმნება, სადაც ლუგარის ლაბორატორიას საქართველოში საშიში ვირუსების გავრცელებაში ადანაშაულებდნენ.
საქართველოში აცხადებენ, რომ რუსულ დეზინფორმაციას მიზანში, როგორც წესი, ამოღებული აქვს წარმატებული პროგრამები, რომლებიც საქართველოში ხორციელდება. მაგალითად, იგივე C ჰეპატიტის ელიმინაციის წარმატებული პროგრამა, რომელიც ასევე რუსული დეზინფორმაციის სამიზნეა ხშირად.
2022 წლის 12 ივლისს რუსეთის საგარეო საქმეთა მინისტრის პრესსპიკერმა მარია ზახაროვამ TASS-თან ინტერვიუში თქვა, რომ ლუგარში ვაშინგტონი ბიოლოგიურ კვლევებს ატარებენ.
“ამ ბიოლოგიური ობიექტის ბაზაზე მიმდინარეობს კვლევები მწერების განსაკუთრებით საშიში ბიოლოგიური და ინფექციური აგენტების მატარებლებად გამოყენებაზე”, – განაცხადა მარია ზახაროვამ.
კორონავირუსის მსოფლიო პანდემიის დროს ლუგარის თანამედროვედ აღჭურვილმა ლაბორატორიამ და მისმა მზაობამ განსაკუთრებული როლი შეასრულა საზოგადოებრივი ჯანდაცვის უსაფრთხოებაში.
ექსპერტები აღიარებენ, რომ ლუგარის ცენტრის მზაობა არის ვირუსთან ბრძოლაში საქართველოს წარმატების ერთ-ერთი მთავარი მიზეზი.
