კორონავირუსის პანდემიის მიუხედავად, სომხეთში, საზაფხულო გაწვევა მაინც ჩატარდება
სომხეთში გადაწყვიტეს, რომ კორონავირუსის პანდემიის გამო, არმიაში, საზაფხულო გაწვევა არ გააუქმონ. უსაფრთხოებისთვის თავდაცვის სამინისტრომ შეიმუშავა წესები, რომელსაც მკაცრად დაიცავენ გაწვევის დროს. ამის შესახებ, Facebook-ის საკუთარ გვერდზე, თავდაცვის სამინისტროს პრესმდივანმა, შუშან სტეპანიანმა დაწერა.
გაწვევა პირველი ივლისიდან 30 აგვისტოს ჩათვლით გაგრძელდება, მაგრამ პირველი მაისიდან დაიწყება მისთვის მზადება.
როგორ ჩატარდება გაწვევა
წვევამდელებსა და სამხედრო მომსახურების ოფისების (კომისარიატი) პირად შემადგენლობას გადაეცემა ინდივიდუალური დამცავი საშუალებები: ნიღბები, ხელთათმანები და ალკოგელი.
წვევამდელებს კომისარიატებში გამოიძახებენ მცირე ჯგუფებად, რათა თავიდან აიცილონ ხალხის დიდი ჯგუფების თავშეყრა. ამას გარდა, მთელი დღის განმავლობაში, შენობაში, პერიოდულად დეზინფექცია ჩატარდება.
წელს, მომავალი ჯარისკაცების მშობლებს საშუალება ექნებათ, თვალი მიადევნონ კენჭისყრის პროცესს – სად გაგზავნიან მათ შვილს – არა ცენტრალური შეკრების პუნქტში, როგორც ეს ადრე ხდებოდა, არამედ ონლაინ რეჟიმში. კენჭისყრის პროცესში, თითოეული წვევამდელი თავად მიიღებს ქაღალდს სამხედრო ნაწილის ნომრით, რომელშიც ის იმსახურებს.
ამავდროულად, წელს კენჭისყრა ჩატარდება არა შენობაში, არამედ ღია ცის ქვეშ.
შეზღუდული იქნება კონტაქტი წვევამდელებსა და სამხედრო ძალების პირად შემადგენლობას შორის.
ახალწვეულები, ორი კვირის განმავლობაში, კარანტინში იქნებიან – სხვა სამხედროებისგან მოშორებით და, საჭიროების შემთხვევაში, ტესტირება ჩაუტარდებათ.
კორონავირუსი სომხეთის არმიაში
ადრე გავრცელდა ინფორმაცია კორონავირუსით ინფიცირებული ექვსი სამხედრო მოსამსახურის შესახებ. ისინი, ყველა ერთ სამხედრო ნაწილში მსახურობდნენ, საბრძოლო პოზიციებისგან მოშორებით.
ისტორია იმით დაიწყო, რომ ერთ-ერთი სამხედროს ოჯახის წევრს კორონავირუსის დიაგნოზი დაუსვეს, შემდეგ – პირადად მას. თავდაცვის მინისტრმა მაშინ განაცხადა, რომ ინფიცირებულთან ერთად მომსახურე ყველა სამხედრო ადრევე იზოლირებული ჰყავდათ და ამან საგრძნობლად შეამცირა ვირუსის შემდგომი გავრცელების რისკი.
უკანასკნელი ინფორმაცია სომხეთის არმიაში კორონავირუსით ინფიცირებულთა შესახებ, 13 აპრილით თარიღდება. მაშინ, შეიარაღებული ძალების სამხედრო-სამედიცინო სამმართველოს ხელმძღვანელმა, სააკ ოგანიანმა განაცხადა, რომ ექვსი ჯარისკაცი, რომელთაც კორონავირუსი ჰქონდათ, გამოჯანმრთელდა და სამსახურს დაუბრუნდა.
