ხელისუფლება ამბობს, რომ ოპოზიცია შეიარაღებული ამბოხებისთვის ემზადება. კომენტარები
საპარლამენტო არჩევნებამდე სამი დღით ადრე, ხელისუფლების წარმომადგენლები აცხადებენ, რომ ოპოზიცია შეიარაღებულ ამბოხებას გეგმავს.
“რადიკალური ოპოზიცია შეიარაღებული ამბოხების სცენარს განიხილავს და იკვლევს, რა რეაქცია ექნებათ მოქალაქეებს, თუ რადიკალური ოპოზიცია სახელმწიფოს წინააღმდეგ შეიარაღებული დაპირისპირების ფორმას მიმართავს!” – ეს განცხადება “ქართული ოცნების” აღმასრულებელმა მდივანმა, ირაკლი კობახიძემ სპეციალურ ბრიფინგზე გააკეთა.
მოგვიანებით, ამბოხებაზე განცხადება ოცნების კიდევ ერთმა ლიდერმა, მამუკა მდინარაძემაც გააკეთა.
შეიარაღებული ამბოხების სამზადისად კობახიძეს მიაჩნია ოპოზიციის დაკვეთით ჩატარებული სოციოლოგიური კვლევა, სადაც ერთ-ერთი კითხვა, მისი თქმით იყო “პროტესტის რა ფორმა იქნება თქვენთვის მისაღები იმ შემთხვევაში, თუ არჩევნების შედეგებმა არ დაგაკმაყოფილათ“.
● რა თქვა ბიძინა ივანიშვილის უსაფრთხოების ყოფილმა უფროსმა “მთავარ არხთან” ინტერვიუში
● დმანისში, “ქართული ოცნების” საარჩევნო შტაბში ოთხი ადამიანი დაჭრეს
“და ამ კითხვის პასუხებში მოქალაქეებს, სახელმწიფო დაწესებულებების ბლოკირების და შიმშილობის კვალდაკვალ, ასარჩევად შესთავაზეს გამაოგნებული პასუხები – სახელმწიფო შენობების დაკავება და მოთხოვნის დაკმაყოფილების მიზნით ფიზიკური ან შეიარაღებული ძალის გამოყენება!” – აღნიშნავს კობახიძე.
ეს კი, მისი თქმით, ნიშნავს იმას, რომ ოპოზიცია ამომრჩეველს ტესტავს:
“ეს ნიშნავს, რომ 2016, 2018 და სხვა წლების მსგავსად, რადიკალური ოპოზიცია შეიარაღებული ამბოხების სცენარს განიხილავს და იკვლევს, რა რეაქცია ექნებათ მოქალაქეებს, თუ რადიკალური ოპოზიცია სახელმწიფოს წინააღმდეგ შეიარაღებული დაპირისპირების ფორმას მიმართავს! ეს არის სრულიად გამაოგნებელი ფაქტი და არანაკლებ გამაოგნებელია მათი პარტნიორი კვლევითი კომპანიის წარმომადგენლების რეაქცია ჟურნალისტის კითხვაზე ამ ფაქტთან დაკავშირებით“ – განაცხადა კობახიძემ.
კობახიძის თქმით, ამბოხების სამზადისზე მიანიშნებს ისიც, რომ „ნაცმოძრაობას”, გარდა ოფიციალური საარჩევნო შტაბისა, “კრიმინალ ვანო მერაბიშვილის ხელმძღვანელობით ე.წ. რევოლუციური შტაბი აქვს გახსნილი”.
პარლამენტის ყოფილი თავმჯდომარის ამ განცხადებას უკვე გამოეხმაურნენ ოპოზიციის წარმომადგენლები და ექსპერტები
ფიქრია ჩიხრაძე, პოლიტიკური პარტია “ლელო საქართველოსთვის”
“პერსონაჟი მაინც უნდა გამოცვალონ, რომ დეჟავუ არ გვქონდეს… ეს არის ამაზრზენი, რადგან ეს არის სიმახინჯე, რომელიც ქართულ პოლიტიკას დასდევს თან უკვე რამდენი წელია -9+8 წელი. მგონი ამომრჩევლისთვის ესეც ნიშანი უნდა იყოს, რომ ეს ორი პოლიტიკური ძალა ისე მოძველდა თავისი მეთოდებით, რომ არ შეიძლება მათთვის სრული ძალაუფლების ჩაბარება, არც იმ პრეტენზიის გაზიარება, რომელიც „ნაციონალურ მოძრაობას“ „ქართულ ოცნების“ მმართველობის 8 წლის ფონზე გაუჩნდა, რადგან ის მეთოდებს, რომელსაც ისინი წლების განმავლობაში იყენებდნენ აზიანებს, რყვნის და ცნობიერებას არღვევს ქართველი ამომრჩევლის და საზოგადოების. ამიტომ ეს სიმახინჯე უნდა დამთავრდეს,“
● პროსახელისუფლებო და ოპოზიციური წინასაარჩევნო კვლევების მიგნებები მნიშვნელოვნად განსხვავდება
● არჩევნები საქართველოში: როგორ მუშაობს ადმინისტრაციული რესურსი
● მოსახლეობის 70%-ს კოალიციური მთავრობა ურჩევნია
სერგი კაპანაძე, პოლიტიკური პარტია “ევროპული საქართველო”
“ბატონი კობახიძე არის მატყუარა – არაფერი გამოუვათ, არანაირი შეიარაღებული ამბოხება და ძალადობა არ იქნება, ძალიან წყნარად ამ შაბათს, ისინი წააგებენ ამ არჩევნებს და მორჩება ეს ისტორია ასე. ტყუილები დარჩება ისტორიას, როგორც მორიგი მაჩვენებელი იმისა, თუ როგორი საბჭოური სტილის მმართველობა უნდა რომ ჰქონდეს ივანიშვილს“
ვანო მაჭავარიანი, ექსპერტი
„ქართული ოცნება“, როგორც ჩანს, ისევ ძველი სცენარით მიდის, რომ ოპოზიცია არის, მათი თვალსაზრისით, დესტრუქციული, ქვეყნის მტერი და მხოლოდ და მხოლოდ „ქართული ოცნებაა“ ამ ქვეყნის პატრიოტი”
ირაკლი კობახიძის განცხადებას, რომელიც დიდი ნდობით არ გამოირჩევა, აჟიოტაჟის შემოტანა უნდა და დარწმუნებული ვარ, არასერიოზულად იქნება აღქმული. მე ვურჩევდი „ქართულ ოცნებას“, რომ უფრო მეტად კონცენტრირებული იყოს ამომრჩევლის საჭიროებებზე, ვიდრე კონსპირაციების თეორიების შემოტანაზე – იქნება ეს რევოლუციური შტაბები, დავით გარეჯი, თუ სხვა ძალიან არასერიოზული და სახელმწიფოსთვის დამაზიანებელი“.
ნოდარ ხარშილაძე, ექსპერტი
“ირაკლი კობახიძე საქართველოში, ალბათ ყველაზე რადიკალური განცხადებების ავტორია. ეს ფაქტია. გამომდინარე იქიდან, რომ ის არის „ქართული ოცნების“ ერთ-ერთი წამყვანი ფიგურა, ამასთან ერთად, მას ძალიან ხშირად აქვს ხოლმე შენიშვნები და ქილიკობს სხვადასხვა კვლევებზე. არ დაგვავიწყდეს, რომ ზუსტად ის იყო, ვინც პრეზიდენტის არჩევნების პირველ ტურში 15%-იანი ცდომილებით გამოაცხადა შედეგები, თავისი გამოცხადებით და არა რომელიმე კომპანიის. ის იყო, ვინც 53% დააანონსა პირველ ტურში. აქედან გამომდინარე, არ მგონია, რომ რაიმე ნდობის კრედიტი დარჩა ბატონ ირაკლის და მისი ლოგიკაც, მსუბუქად რომ ვთქვათ, საეჭვოა ყველა მიმართულებით”
