თბილისში სასტიკად მოკლული ტრანსგენდერი ქალის, კესარია აბრამიძის მკვლელობაში ეჭვმიტანილი დაკავებულია
კესარია აბრამიძის მკვლელობა
37 წლის ტრანსგენდერი ქალის, კესარია აბრამიძის მკვლელობის ფაქტზე პოლიციამ დღეს დილით 26 წლის ბექა ჯაიანი დააკავა. აღნიშნულთან დაკავშირებით ინფორმაციას შინაგან საქმეთა სამინისტრო ავრცელებს.
ტრანსგენდერი ქალი გუშინ, 18 სექტემბერს, საკუთარ საცხოვრებელ სახლში ცივი იარაღით მოკლეს.
გაავრცელებული ინფორმაციით, სავარაუდო მკვლელი კესარია აბრამიძის მეგობარი მამაკაცი იყო და მკვლელობას წინ უძღოდა ურთიერთშელაპარაკება.
სამართალდამცავებმა მკვლელობის იარაღი ნივთმტკიცებად ამოიღეს. დაკავებულს 16-დან 20-წლამდე ან უვადო თავისუფლების აღკვეთა ემუქრება.
„შინაგან საქმეთა სამინისტროს თბილისის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად, 1998 წელს დაბადებული ბ.ჯ., გენდერის ნიშნით განსაკუთრებული სისასტიკით დამამძიმებელ გარემოებაში ჩადენილი განზრახ მკვლელობის ბრალდებით დააკავეს.
დანაშაული 16-დან 20 წლამდე ან უვადო თავისუფლების აღკვეთას ითვალისწინებს.
გამოძიებით დადგინდა, რომ მიმდინარე წლის 18 სექტემბერს, დიდ დიღომში, ბრალდებულმა ურთიერთშელაპარაკების ნიადაგზე, 1987 წელს დაბადებულ კ.ა.-ს საკუთარ საცხოვრებელ სახლში, ცივი იარაღით მრავლობითი ჭრილობა მიაყენა და შემთხვევის ადგილიდან მიიმალა.
დაჭრილი კ.ა. მიყენებული დაზიანებების შედეგად ადგილზე გარდაიცვალა.
სამართალდამცველებმა ჩატარებული საგამოძიებო მოქმედებების შედეგად, დანაშაულის ჩამდენი პირი ცხელ კვალზე დააკავეს.
დანაშაულის ჩადენის იარაღი – დანა ნივთმტკიცებადაა ამოღებული,” – ვკითხულობთ შსს ოფიციალურ განცხადებაში.
● 17 სექტემბერს საქართველოს პარლამენტმა დისკრიმინაციული და ჰომოფობიური ანტი-ლგბტ კანონი მიიღო. კანონპროექტს 84-მა დეპუტატმა დაუჭირა მხარი. ცვლილებებმა კიდევ უფრო გააუარესა ტრანსგენდერი ადამიანების უფლებები საქართველოში, რადგან შეზღუდა სამედიცინო სერვისებზე ხელმისაწვდომობა, ტრანზიცია (სქესის შეცვლის პროცედურა), ასევე, შეზღუდა პირადობის დამადასტურებელ დოკუმენტებში გენდერული იდენტობის შესაბამისი სქესის ჩაწერა.
● საქართველოში სიძულვილის მოტივით ბოლო წლებში არაერთი ტრანსგენდერი ქალი მოკლეს:
__ საბი ბერიანი 2014 წლის 10 ნოემბერს მოკლეს. თავდამსხმელმა მას ჯერ დანით ცხრა ჭრილობა მიაყენა, შემდეგ კი მის საცხოვრებელ ბინას ცეცხლი წაუკიდა.
__ 2016 წლის 4 თებერვალს თავის საცხოვრებელ ბინაში გარდაცვლილი იპოვეს ტრანსგენდერი ქალი ბიანკა შიგუროვა. დაღუპვის მიზეზად გაზის გაჟონვა დასახელდა.
__ 2016 წლის 22 ნოემბერს, თითქმის ორმოცდღიანი კომის შემდეგ გარდაიცვალა ტრანსგენდერი ქალი ზიზი შეყილაძე, რომელიც დანით დაჭრეს თავსა და ყელში.
