კელი დეგნანი: რაც პოლიტიკურ დევნას ჰგავს, რისკის ქვეშ აყენებს საქართველოს ევროატლანტიკურ მომავალს

კელი დეგნანი საქართველოს ევროატლანტიკურ მომავალზე

ამერიკის შეერთებული შტატების ელჩის, კელი დეგნანის თქმით, ყველაფერი, რაც პოლიტიკურ დევნას ჰგავს, რისკის ქვეშ აყენებს საქართველოს ევროატლანტიკურ მომავალს. ასე გამოეხმაურა კელი დეგნანი “მთავარი არხის” დამფუძნებლის, ნიკა გვარამიას საქმეზე სააპელაციო სასამართლოს გადაწყვეტილებას.

“თქვენ ყველამ ნახეთ აშშ-ს, ევროკავშირისა და საქართველოს სხვა ევროპელი მეგობრების განცხადებები. ყველაფერი, რაც აშშ-მ 30 წლის მანძილზე საქართველოში გააკეთა მიზნად ისახავს ხელი შეუწყოს ქართველი ხალხის არჩევანს, განამტკიცონ წარმატებული და დემოკრატიული მომავალი.” – განაცხადა დეგნანმა.

მისივე განმარტებით, მიუკერძოებელი სასამართლო სისტემის მნიშვნელობა ცენტრალურია ამ მომავლისთვის. “ეს ის დაპირებაა, რაც საქართველოს ლიდერებმა, მათ შორის მმართველი პარტიიდან, ქართველ ხალხს მისცეს” საპარლამენტო არჩევნებში, “რომ მიღწეულ იქნეს” შემდეგი ძალიან მნიშვნელოვანი ნაბიჯი საქართველოს ევროატლანტიკური მომავლის გზაზე.

“ყველაფერი, რაც ამას ახლა ხელს უშლის, ან თუნდაც რისკის ქვეშ აყენებს, ძლიერ შემაშფოთებელია. აშშ-ში ჩვენ ვიცავთ და ვუფრთხილდებით ჩვენი სასამართლოს დამოუკიდებლობას, რადგან ჩვენ ვიცით, რომ მიუკერძოებელი სასამართლო არის საფუძველი ჩვენი დემოკრატიის. ეს არის ის, რაც მას ანიჭებს გამძლეობასა და ძალას, გაუმკლავდეს სხვადასხვა გამოწვევებს და დროის გამოცდებს. იგივე გვსურს საქართველოსთვისაც.” – აღნიშნა აშშ-ს ელჩმა.

● რატომ დააპატიმრეს ნიკა გვარამია. მოკლედ საქმის არსი და შეფასებები
● გვარამიას საქმის მოსამართლე ამბობს, რომ აშშ-ს საელჩომ ანგარიში მოსთხოვა და პროგრამიდან მოხსნა
● არავის არ ვიწყალებ! მორჩით სპეკულაციებს! – საქართველოს პრეზიდენტის საპირისპირო განცხადებები

ქვეყნის ყველაზე პოპულარული ოპოზიციური ტელეკომპანიის, “მთავარის” გენერალური დირექტორი ნიკა გვარამია 16 მაისს, სასამართლო დარბაზში დააპატიმრეს, ხოლო 2 ნოემბერს თბილისის სააპელაციო სასამართლომ ძალაში დატოვა თბილისის საქალაქო სასამართლოს გადაწყვეტილება და ნიკა გვარამია დამნაშავედ ცნო.

გვარამიას სამი წლით და ექვსი თვით თავისუფლების აღკვეთა მიესაჯა ეპიზოდზე, რომელშიც მას სამსახურებრივი მანქანის ოჯახის საჭიროებებისთვის გამოყენებას ედავებიან.

სააპელაციოს გადაწყვეტილებას გამოეხმაურა ამერიკის საელჩო და ღრმა შეშფოთებას გამოხატა. მათი განმარტებით, იმ დროს, როდესაც საქართველოს ერთგულება მიუკერძოებელი სასამართლოსა და მედია პლურალიზმის მიმართ განსაკუთრებული დაკვირვების საგანია, მთავარი ოპოზიციური ტელეარხის გენერალური დირექტორის, ნიკა გვარამიას მიმდინარე პატიმრობა რისკის ქვეშ აყენებს ქართველი ხალხის მკაფიო არჩევანსა და “საქართველოს ლიდერების გაცხადებულ მიზანს – უფრო უსაფრთხო, დემოკრატიული, ევროპული მომავლისა.”

დამოუკიდებელი ექსპერტები, არასამთავრობო ორგანიზაციების წარმომადგენლები და პოლიტიკოსები გვარამიას დაკავებას პოლიტიკურად მოტივირებულად მიიჩნევენ.

გვარამიას დაკავებას გამოეხმაურა Amnesty International-ის აღმასრულებელი დირექტორი აღმოსავლეთ ევროპასა და ცენტრალურ აზიაში მარი სტრუტერსიც. მისი თქმით, საქმე პოლიტიკურად მოტივირებულია და გვარამია სასწრაფოდ უნდა გათავისუფლდეს.