სამშაბათს პარლამენტში ამნისტიის კანონპროექტი შევა და მოხდება რურუას შეწყალება
მომდევნო სამშაბათს ოპოზიცია პარლამენტში ამნისტიის კანონპროექტის დასარეგისტრირებლად შევა, რომელიც 20 ივნისის მოვლენებს ეხება და საუბარია ყველა მონაწილის – მათ შორის პოლიციელების ამნისტიაზეც. ამავე დღეს, პრეზიდენტი სალომე ზურაბიშვილი “მთავარი არხის” მეწილეს, გიორგი რურუას შეიწყალებს.
________________________________
● გიორგი რურუას საქმე
● კარტოგრაფების საქმე, გიორგი რურუა და სასამართლო კლანი – საქართველო სახდეპის ანგარიშში
___________________________________
ამის შესახებ პრეზიდენტ სალომე ზურაბიშვილთან გამართული სამუშაო ვახშმის შემდეგ გახდა ცნობილი, რომელსაც ევროპული საბჭოს პრეზიდენტი, შარლ მიშელი და ხელისუფლებისა და ოპოზიციის წარმომადგენლები ესწრებოდნენ.
“ნაციონალური მოძრაობის” წევრის, სალომე სამადაშვილის თქმით, ევროპული საბჭოს პრეზიდენტ შარლ მიშელთან სამუშაო ვახშამზე სწორედ ამ შეთანხმების შესრულების გეგმაზე ისაუბრეს.
“ჩვენ რაც შეიძლება სწრაფად მივიღებთ ამნისტიის კანონს და თუ მანამდე ვერ მოხერხდა რაიმე სხვა გზებით ნიკა მელიას გათავისუფლება, მაშინ ამნისტიის შესახებ კანონის თანახმად, ნიკა მელიაც გათავისუფლდება საპატიმროდან”, – განაცხადა სამადაშვილმა.
მმართველი პარტიის წარმომადგენლის, შალვა პაპუაშვილის თქმით, საქართველოში პოლიტპატიმრები არ არიან. რაც შეეხება კონკრეტულ სისხლის სამართლის საქმეებს, მოხდება შესაბამისი კანონპროექტის ინიცირება.
პაპუაშვილმა აღნიშნა ისიც, რომ მელია თავის ღირსებას ქვეყნის ინტერესზე მაღლა აყენებს, მაგრამ “ქართული ოცნება” ამნისტიას მაინც მიიღებს:
“რა ვქნათ, ჩვენ სახელმწიფოს უფრო წინ ვაყენებთ, ამიტომ ამნისტიას მაინც მივიღებთ და ნიკა მელია გამოვა გარეთ, ისევე როგორც სხვა ბრალდებული. ჩვენთვის სახელმწიფო და ეს ქვეყანა, ჩვენი სამშობლო უფრო წინ არის, ვიდრე ნიკა მელია.”
![](https://jam-news.net/app/uploads/2021/04/publika.ge-100-1604518196-196875.jpg)
პროცედურები უფრო დეტალურად განმარტა “სტრატეგია აღმაშენებლის” ლიდერმა გიორგი ვაშაძემ. მისი თქმით, ყველა მხარემ გამოთქვა მზაობა, რომ პროცედურული საკითხებიდან გამომდინარე, რაც შეიძლება სწრაფად მოხდეს ამნისტიის კანონის მიღება.
“ჩვენ პარლამენტში ვიწყებთ ამნისტიის კანონის განხილვას, რომელიც შეეხება იმ მუხლებს, რომლითაც პასუხისგებაში მიცემული არიან დღეს ადამიანები 20 ივნისს ჩადენილ დანაშაულთან დაკავშირებით, მათ შორის, ეს ეხება მელიას, მათ შორის, ეს ეხება თამლიანს და ა.შ.“, – განაცხადა ვაშაძემ.
მოსალოდნელ ამნისტიას გამოეხმაურა 20 ივნისს დაზარალებული მაკო გომური, რომელმაც აქციის დაშლისას თვალი დაკარგა.
“ამნისტია არის დასასრული და დასამარება 20 ივნისის – რომ არასდროს დაისჯება ის, ვის გამოც დღეში 7 მილიარდჯერ პროთეზს ვრეცხავ და ერთი სული მაქვს სახლში მივიდე, რომ გამოვიძრო თვალიდან ეს დამპალი და წყეული რაღაც. მე დაუსჯელობით დაღლილი დაზარალებული ვარ, ვისი ამოთხრილი თვალის ხარჯზეც არ მინდა პარლამენტის სკამზე ვინმემ საჯდომები გაითბოს”, – წერს მაკო გომური.
მაკო გომურის ისტორია, რომელმაც თბილისში, საპროტესტო აქციაზე თვალი დაკარგა:
_________________________________
● რა წერია შარლ მიშელის ახალ გეგმაში – ხუთივე პუნქტი მოკლედ
● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა
● მოსაზრება: რატომ არ გამოდიან ქართველები ქუჩაში?
__________________________________
18 აპრილს, ევროპული საბჭოს პრეზიდენტმა შარლ მიშელმა წინადადებების ახალი პაკეტი შესთავაზა საქართველოს პოლიტიკურ პარტიებს.
დოკუმენტს ჰქვია “სამომავლო გზა საქართველოსთვის” და იგი რამდენიმე მნიშვნელოვანი დეტალით განსხვავდება ბოლო დოკუმენტისგან, რომელიც შარლ მიშელის წარმომადგენელმა, ქრისტიან დანიელსონმა 31 მარტს წარუდგინა ოპოზიციას.
სიახლეები ეხება ორ ყველაზე მნიშვნელოვან და მხარეებს შორის ყველაზე შეუთანხმებელ პუნქტს – პოლიტიკური ნიშნით დაკავებულ ადამიანებს და ახალ საპარლამენტო არჩევნებს, რომელთა რიგგარეშე ჩატარებასაც ითხოვს ოპოზიცია.
ახალი წინადადების შესათანხმებლად 18 აპრილს ევროკავშირის დელეგაციის ოფისში მივიდა ყველა პარტიის წარმომადგენელი, მმართველი პარტიის გარდა. მოგვიანებით მმართველმა პარტიამ გაავრცელა განცხადება, სადაც წერია, რომ ხელისუფლება “მზად არის” მიშელის წინადადებების განსახილველად.
საბოლოო ჯამში მიშელის დოკუმენტს ხელი მოაწერეს შემდეგმა ოპოზიციურმა პარტიებმა:
ლელომ [ბადრი ჯაფარიძე და მამუკა ხაზარაძე]
სტრატეგია აღმაშენებელმა [გიორგი ვაშაძე]
რესპუბლიკურმა პარტიამ [ხათუნა სამნიძე]
გირჩმა [ვახტანგ მეგრელიშვილი]
მოქალაქეებმა [ალეკო ელისაშვილმა]
იყო ინდივიდუალური ხელმოწერებიც, კერძოდ: სალომე სამადაშვილი, დავით ბაქრაძე და ზურაბ ჯაფარიძე.
დღეს დილით, ყველასათვის მოულოდნელად, დოკუმენტს ხელი მოაწერა ნაციონალური მოძრაობის გადამდგარმა თავმჯდომარემ გრიგოლ ვაშაძემაც.
დღესვე, საქართველოს თავად შარლ მიშელი ეწვია. ის მთელი დღის განმავლობაში შეხვედრებს მართავდა პრეზიდენტთან, პრემიერთან, ხელისუფლების წარმომადგენლებთან და ოპოზიციასთან.