გამყრელიძე: პიკი ნოემბერში დადგება და მაჩვენებელმა შესაძლოა 4-5 ათასს მიაღწიოს

დაავადებათა კონტროლისა და საზოგადოებივი ჯანდაცვის ეროვნული ცენტრის ხელმძღვანელის, ამირან გამყრელიძის განცხადებით, ვირუსის გავრცელების პიკი ნოემბრის შუა რიცხვებში დადგება და ამ პიკის დროს, დღიურმა მაჩვენებელმა შესაძლოა 4-5 ათას შემთხვევას მიაღწიოს: „პროგნოზირება ძალიან უმადური რამ არის. არ არსებობს არც ერთი ინსტრუმენტი, რომელიც ზუსტად განსაზღვრავს ვითარებას”.

მისივე თქმით, დაავადებათა კონტროლის ცენტრი პროგნოზების მოდელირებაში იყენებს სამ ინსტრუმენტს: “ეს არის გარკვეული მათემატიკური მოდელირების ინსტრუმენტები, სადაც შეგვყავს ბევრი სხვადასხვა ციფრი, მოცემულობები და ამის მიხედვით ეს ინსტრუმენტები ითვლიან, როგორი შეიძლება იყოს გავრცელება. ზუსტად არ გიჩვენებს, მაგრამ ტენდენციებს გიჩვენებს.”

გამყრელიძის თქმითვე, როცა სექტემბრის ბოლოსთვის თავიდან დაიწყო ამ პრინციპით მუშაობა, სამივე ინსტრუმენტი ერთსა და იმავეს ამბობდა, რომ ზრდა აუცილებლად იქნებოდა.

“გარკვეულწილად მივყვებით ამ პროგნოზს, მაგრამ ცოტა მეტი შემთხვევა გვაქვს – გეტყვით პირდაპირ”, – აღნიშნა მან.

რაც შეეხება ინფექციის მართვას, დაავადებათა კონტროლის ცენტრის ხელმძღვანელის თქმით, მათ ინფექციის უკეთ მართვა ისწავლეს:

“არ ვმალავ იმას, რომ ინფიცირება გაიზრდება, სამაგიეროდ ვისწავლეთ ინფექციის უკეთ მართვა, რისიც გვეშინოდა გაზაფხულზე”

ამჟამად საავადმყოფოებში ინფიცირებულთა მხოლოდ 24% იმყოფება.

„დანარჩენი პაციენტები არიან ბინაზე, ან კოვიდსასტუმროებში. მოგეხსენებათ, რომ კოვიდსასტუმროებში სამედიცინო პერსონალი არის და პაციენტები ყოველდღე ისინჯებიან. ხოლო ბინაზე მყოფებთან ხდება დარეკვა. საკმაოდ კარგად გაიშალა პირველადი ჯანდაცვის ექიმების ჩართულობა ამ ქსელში”, – განაცხადა გამყრელიძემ.