ფაიზერის პირველი ანტივირუსული აბები საქართველოსთვისაც გახდება ხელმისაწვდომი
ჯანდაცვის მინისტრის მოადგილის, თამარ გაბუნიას თქმით, “ფაიზერის” პირველი ანტივირუსული აბების – Paxlovid-ის მიღებაზე ხელისუფლებას მუშაობა დაწყებული აქვს.
ფაიზერის ანტივირუსული აბები Paxlovid არის კოვიდის სამკურნალოდ ავტორიზებული პირველი ანტივირუსული ტაბლეტი, რომელსაც მომხმარებელი სახლშიც გამოიყენებს მანამ, სანამ მისი ჰოსპიტალიზაცია გახდება საჭირო.
12 წლის ზემოთ რისკჯგუფში შემავალი პირები ტაბლეტის მიღებას ექიმის დანიშნულების შესაბამისად შეძლებენ, ისინი სულ მცირე 39,9 კილოგრამს უნდა იწონიდნენ.
აშშ-ს საკვებისა და წამლის ადმინისტრაციის (FDA) განმარტებით, ტაბლეტების მიღება რეკომენდებულია კოვიდის დიაგნოზის დასმიდან მალევე და სიმპტომების გამოვლენიდან ხუთი დღის განმავლობაში.
FDA-მ პრეპარატს ავტორიზაცია 22 დეკემბერს მიანიჭა.
გაბუნიას განმარტებით, დეტალებს, თუ როდის იქნება ეს აბები საქართველოს მოქალაქეებისთვის ხელმისაწვდომი, მოსახლეობას მოკლე ხანებში გააცნობენ.
“ეს ძალიან იმედისმომცემი სიახლეა. ჩვენ ამაზე მუშაობა დაწყებული გვაქვს და მოკლე ხანში შესაძლებლობა გვექნება, რომ საზოგადოებას გავაცნოთ ის დეტალები, თუ კონკრეტულად როდის იქნება ხელმისაწვდომი ეს მედიკამენტი.
მედიკამენტის გამოყენება ხდება ბინის პირობებშიც, რადგან მას არ სჭირდება განსაკუთრებული ზედამხედველობა მოხმარების პროცესში. რეკომენდაციაა და, უმჯობესია, პროგნოზულად მაღალი რისკი ვისაც აქვს, იმ პირებში მოხდეს მედიკამენტის გამოყენება და ძალიან იმედისმომცემია შედეგები, რომლებსაც ეს მედიკამენტი კვლევების შედეგად აჩვენებს – ჰოსპიტალიზაციის შემცირების თვალსაზრისით, რომელსაც თან ახლავს გართულებისა და ლეტალობის შემცირებაც”, – ამბობს გაბუნია.
მისივე თქმით, მედიკამენტი სახელმწიფო ბიუჯეტიდან იქნება დაფინანსებული და როგორც ვაქცინის ხელმისაწვდომობა არ ხდება ჯერჯერობით კომერციულ საფუძველზე, ასევე კოვიდის მედიკამენტების დაფარვა სრულად ხდება სახელმწიფოს მიერ.
● რა საერთო აქვთ ქართველ, სომეხ და უკრაინელ ანტივაქსერებს
● 18 თვე კორონავირუსთან ერთად: დაავადებათა კონტროლის ცენტრის ვრცელი ანგარიში
● 1 დეკემბრიდან საქართველოში “მწვანე სტატუსი” ამოქმედდა. რა იცვლება – დეტალური გიდი
დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის, ამირან გამყრელიძის განმარტებით, წამალი ვაქცინას ვერ შეცვლის, ამიტომ საჭირო იქნება “ისევ და ისევ ვაქცინაცია.”
“ამ პანდემიის დამთავრების გზა გადის მოსახლეობის ვაქცინაციაზე. მთელი მოსახლეობის 75% უნდა იყოს აცრილი. წამალი პაქსლოვიდი, რომელსაც გუშინ მიეცა ავტორიზაცია, ძალიან წინგადადგმული ნაბიჯია. ეს წამალი ორი ანტივირუსული წამლისგან შედგება და კვლევებში აჩვენა 90%-იანი ეფექტიანობა გართულების და სიკვდილიანობის პრევენციის თვალსაზრისით. ჯანდაცვის სამინისტრო დიდი ხანია აწარმოებს მოლაპარაკებებს ფაიზერთან ამ წამლის მისაღებად და საქართველოში ის ხელმისაწვდომი იქნება”, – განაცხადა გამყრელიძემ.
