"ფაიზერის" 29250 დოზა უკვე საქართველოშია
“ფაიზერის” 29250 დოზა უკვე საქართველოშია. ქვეყანაში გამოიყენება მხოლოდ ჯანმოს და მკაცრი მარეგულირებელი ორგანოების მხრიდან ავტორიზებული ვაქცინები, რაც ხარისხის, უსაფრთხოებისა და ეფექტურობის გარანტიაა.
ვაქცინის გაკეთების შესაძლებლობა მედპერსონალსა და 65 წელს ზევით ადამიანებს შეუძლიათ – მათ ვაქცინის არჩევის საშუალება აქვთ.
თუმცა, შესაძლებელია, ვაქცინაცია ძალიან მალე საყოველთაო გახდეს – ინფექციური საავადმყოფოს დირექტორის, თენგიზ ცერცვაძის თქმით, ვაქცინაციის მიმართ საქართველოში უპრეცედენტო პასიურობაა განსაკუთრებით მას შემდეგ, რაც “ასტრაზენეკათი” აცრის შემდეგ, ახალციხეში 27 წლის ექთანი გარდაიცვალა. დიდი ალბათობით, ქალს ვაქცინაზე მწვავე ალერგიული რეაქცია ჰქონდა, რაც ვაქცინის ძალიან იშვიათი გვერდითი მოვლენაა.
ჯანდაცვის მინისტრის მოადგილის, თამარ გაბუნიას განცხადებით, საქართველოში ფაიზერით ვაქცინაცია 30 მარტიდან დაიწყება და ის სამი ქალაქის ექვს კლინიკაში იქნება შესაძლებელი. ეს კონკრეტული ვაქცინა იქნება თბილისის ოთხ, ბათუმის ერთ და ქუთაისის ერთ კლინიკაში.
გაბუნიას თქმით, კლინიკებში მიმდინარეობს ასტრაზენეკათი ვაქცინაცია და სრულად გადმოწყობა ფაიზერის ვაქცინაზე მოხერხდება მხოლოდ სამშაბათიდან.
მისივე თქმით, ჯანდაცვის სამინისტრო ფიქრობს, ვაქცინაზე საყოველთაო რეგისტრაცია აპრილის შუა რიცხვებამდე დაიწყოს. ანუ სავარაუდოდ აპრილის შუა რიცხვებიდან ნებისმიერ მოქალაქეს ექნება შესაძლებლობა დარეგისტრირდეს პორტალზე.
თუმცა, ჯანდაცვის მინისტრის მოადგილე განმარტავს, რომ “ეს არ ნიშნავს, რომ სიაში მყოფ ადამიანს ხვალვე შეგვიძლია შევთავაზოთ ვაქცინა. საყოველთაო ვაქცინაცია დაიწყება მესამე, მეოთხე კვარტალში, ასეა გეგმით განსაზღვრული”
_____________________________________
● საქართველოში ასტრაზენეკით ვაქცინაციის პროცესი გაგრძელდება
● ახალციხეში აცრის შემდეგ ექთანს ანაფილაქსიური რეაქცია განუვითარდა
● საპატრიარქო არ ჩაერთვება ვაქცინაციის პროპაგანდაში – ჯანდაცვის მინისტრი პატრიარქს შეხვდა
________________________________________
საქართველომ კოვაქს პლატფორმის საშუალებით ასტრაზენეკას ვაქცინის 43,200 დოზა 13 მარტს მიიღო. ვაქცინა AstraZeneca-SKBio-ს (კორეის რესპუბლიკა) მიერ არის დამზადებული. უშუალოდ ვაქცინაცია კი 15 მარტს დაიწყო.
ეს ვაქცინის პირველი პარტიაა, რომელიც ქვეყანამ მიიღო.
აღნიშნული ვაქცინის შეძენაში ქვეყნის მთავრობას გაეროს ბავშვთა ფონდი (UNICEF) დაეხმარა. ჯანდაცვის მინისტრის თქმით, შერჩეულია ის 82 სამედიცინო დაწესებულება, სადაც ვაქცინაციის პროცესი დაიწყება.
