ექსპრეზიდენტი მიხეილ სააკაშვილი რუსთავის ციხეში დააბრუნეს

საქართველოს მესამე პრეზიდენტი მიხეილ სააკაშვილი გორის ჰოსპიტლიდან რუსთავის ციხეში დააბრუნეს. ამის შესახებ ინფორმაცია თავდაპირველად სააკაშვილის ადვოკატმა, შოთა თუთბერიძემ გაავრცელა. თუმცა ამ დროს ჯერ კიდევ არ იყო ცნობილი, სად გადაიყვანეს სააკაშვილი.

“ღამით მიეპარნენ და ავადმყოფი ადამიანი უბრალოდ გაიტაცეს ჰოსპიტლიდან. ჩვენთვის ინფორმაციის წყარო იყო იგივე, რაც თქვენთვის – ადგილობრივი მოსახლეობა”, – ამბობს ადვოკატი.

მოგვიანებით პენიტენციურმა სამსახურმა დაადასტურა ინფორმაცია, რომ ექსპრეზიდენტი №12 [რუსთავის] პენიტენციურ დაწესებულებაშია გადაყვანილი.

პარლამენტის დეპუტატი და ჯანდაცვის ყოფილი მინისტრი დავით სერგეენკო ამბობს, რომ გადაყვანამდეც ცხადი იყო, სააკაშვილი დასტაბილურების მერე უკან დაბრუნდებოდა. მისივე განმარტებით, ექიმები პაციენტის მდგომარეობას ხელოვნურად არ დაამძიმებდნენ და მათ უნდა მიეცეთ თავისი საქმის კეთების საშუალება.

“ცუდი იქნება რა თქმა უნდა თუ [მიხეილ სააკაშვილი] შიმშილობას დაიწყებს ადამიანურად და ჰუმანურადაც.” – ამბობს დავით სერგეენკო.

● პოლიტიკური კრიზისი და პრორუსული განწყობები. საქართველოში არსებული სიტუაცია უკრაინელი ჟურნალისტების თვალით
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
● სააკაშვილის საქმეები. რისთვის ზის ციხეში ყოფილი პრეზიდენტი

დღის განმავლობაში ექსპრეზიდენტის ადვოკატი ნიკა გვარამია და თანაპარტიელები, რომლებმაც სააკაშვილი მოინახულეს, ამბობდნენ, რომ მიხეილ სააკაშვილის მდგომარეობა კრიტიკულად მძიმეა.

მესამე პრეზიდენტი გორის ჰოსპიტალში ომბუდსმენის წარმომადგენელმაც მოინახულა. ჰოსპიტლიდან გამოსულმა საბა ბრაჭველმა თქვა, რომ 27 დეკემბერს სააკაშვილს ახალ დიაგნოზი დაუსვეს. მან დიაგნოზი არ გაახმაურა და აღნიშნა, რომ ნინო ლომჯარიას აპარატს სურს, მისმა კონსილიუმის წევრებმაც შეაფასონ პაციენტის მდგომარეობა და დადონ დასკვნა სააკაშვილის მკურნალობის საჭიროებების შესახებ.

თავად სააკაშვილმა კი ბრაჭველს უთხრა, რომ თავს ცუდად გრძნობს და დამატებით სპეციალისტებთან, მათ შორის ნევროლოგთან ითხოვს შეხვედრას. თუმცა სააკაშვილის ექიმები – რომლებიც გორის ჰოსპიტალში აკვირდებიან – ამბობენ, რომ მისი მკურნალობის დინამიკა დადებითია.

აღსანიშნავია ისიც, რომ მიხეილ სააკაშვილისთვის ახალი მკურნალი ექიმი ამ დრომდე არაა [სააკაშვილის მკურნალი ექიმი, ნიკოლოზ ყიფშიძე ჯანმრთელობის გაუარესების გამო პაციენტს ჩამოშორდა] დანიშნული, ხოლო მისი მკურნალობის შესახებ გადაწყვეტილებებს სხვადასხვა პროფილის ექიმები ერთობლივად იღებენ. ბრაჭველისვე განმარტებით, უახლოეს დღეებში სახალხო დამცველის კონსილიუმი კვლავ შეეცდება მოინახულოს მიხეილ სააკაშვილი.

27 დეკემბერსვე გახდა ცნობილი გახდა, რომ გორის ჰოსპიტლიდან მიხეილ სააკაშვილის გლდანის სამედიცინო დაწესებულებაში გადაყვანას აპირებდნენ, თუმცა ექსპრეზიდენტი საბოლოოდ რუსთავის ციხეში გადაიყვანეს.

● შიმშილობის შემდეგ. გია ნოდიას თვალსაზრისი
● არჩევნები, პანდემია, მედიის მდგომარეობა და სააკაშვილი – ომბუდსმენის 2021 წლის ანგარიში

საქართველოს მესამე პრეზიდენტი მიხეილ სააკაშვილი, რომელიც ხელისუფლებას ძებნილად ჰყავდა გამოცხადებული, საქართველოში ფარულად დაბრუნდა. 1 ოქტომბერს ის დააკავეს და გლდანის ციხეში გადაიყვანეს.

დაპატიმრებისთანავე ყოფილმა პრეზიდენტმა პროტესტის ნიშნად შიმშილობა დაიწყო. სააკაშვილი თავს პოლიტიკურ, უფრო კონკრეტულად კი რუსეთის პრეზიდენტის ვლადიმერ პუტინისა და საქართველოს არაფორმალური მმართველის ბიძინა ივანიშვილის პატიმრად მიიჩნევს.

ყოფილი პრეზიდენტი 50 დღე შიმშილობდა. ბოლო ორი კვირა ის აღარ იღებდა აღარც სამკურნალო მედიკამენტებს. მისი მდგომარეობა დღითიდღე უარესდებოდა. ექიმთა ჯგუფმა, რომელიც სახალხო დამცველმა შექმნა, მისი მდგომარეობა კრიტიკულად შეაფასა.

საქართველოს სამოქალაქო სექტორი, დიპლომატები, რიგითი მოქალაქეები, მსახიობები, მწერლები და საზოგადოების სხვა ცნობილი სახეები ხელისუფლებას ექს-პრეზიდენტის მრავალპროფილურ კლინიკაში გადაყვანას სთხოვდნენ. ამ მოთხოვნით ხელისუფლებას მიმართა საქართველოს სახალხო დამცველმა, სახელმწიფო ინსპექტორის აპარატმა. განცხადება გაავრცელა აშშ-ს სახელმწიფო დეპარტამენტმაც. საბოლოოდ, მესამე პრეზიდენტი გორის სამედიცინო დაწესებულებაში 19 ნოემბერს გადაიყვანეს.

გარდა ამისა, არსებობდა სტრასბურგის ადამიანის უფლებათა სასამართლოს 10 ნოემბრის გადაწყვეტილება. სასამართლომ მიხეილ სააკაშვილს შიმშილის შეწყვეტისკენ მოუწოდა, სახელმწიფოს კი დაავალა, უზრუნველეყო პატიმრის უსაფრთხოება და ადეკვატური მკურნალობა.