covid-19-ის 13 ახალი შემთხვევა გამოვლინდა საქართველოში

ბოლო 24 საათში საქართველოში კორონავირუსით ინფიცირების 13 ახალი შემთხვევა გამოვლინდა, 1 კი გამოჯანმრთელდა.

14  ივნისის მონაცემებით, საქართველოში კორონავირუსით ინფიცირების 864 შემთხვევაა დადასტურებული. კარანტინის რეჟიმშია 2795 ადამიანი, ხოლო სტაციონარში მეთვალყურეობის ქვეშ – 252 პირი. კორონავირუსით ინფიცირებულთაგან 703 გამოჯანმრთელდა და 13  გარდაიცვალა.

კორონავირუსის ოთხი ახალი შემთხვევა დაფიქსირდა ბოლნისის მუნიციპალიტეტის სოფელ მუშევანში. ოთხივე მათგანი თვითიზოლაციაში იმყოფებოდა. ინფიცირებულები საავადმყოფოში გადაიყვანეს. 

• როგორი იქნება ტურიზმი კორონავირუსის შემდეგ. საქართველო ტურისტების მისაღებად ემზადება
• პირბადე, დამცავი ფარი და უკონდიციონერობა. 6 ივლისს საქართველოში ეროვნული გამოცდები იწყება
• ვირუსის აფეთქება სომხეთში – მიზეზები და დასკვნები საქართველოსთვის

კორონავირუსი დაუდასტურდა კასპის მუნიციპალიტეტის სოფელ მეტეხში მცხოვრებ ქალსაც, რომელიც რესპუბლიკური საავადმყოფოს სანიტარია. ის რესპუბლიკური საავადმყოფოს ინფიცირებული მედდის  კლასტერს მიეკუთვნება და თბილისში, თვითიზოლაციაში იმყოფებოდა.

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. კორონავირუსის პანდემიის შესაჩერებლად 21 მარტიდან 23 მაისამდე საქართველოში საგანგებო მდგომარეობა იყო გამოცხადებული. 

კორონავირუსის პანდემიის გამო დაწესებული შეზღუდვების მოხსნის პირველი ეტაპი საქართველოში 27 აპრილიდან ამოქმედდა.15 ივნისიდან საქართველო შიდა ტურიზმის განახლებას გეგმავს, 1 ივლისიდან კი საზღვრების გახსნას და უცხოელი ტურისტების მიღებას.