ჭყონდიდის ეპარქიაში დაპირისპირების შედეგად, აივნიდან ათამდე ადამიანი გადავარდა

მარტვილში, ჭყონდიდის ეპარქიის შენობის მოაჯირი მოწყდა და ათამდე ადამიანი, მათ შორის ჟურნალისტები, მეორე სართულიდან ჩამოვარდნენ.

დაშავებულები – ოთხი ჟურნალისტი და ორი მრევლის წარმომადგენელი, მრავლობითი მოტეხილობებით, საავადმყოფოში გადაიყვანეს.

როგორც იქ მყოფი ჟურნალისტები ჰყვებიან, ინციდენტს წინ უძღოდა ფიზიკური დაპირისპირება ეპარქიის სამღვდელოების წარმომადგენლებს და მრევლს შორის – მღვდლები ფიზიკურად მიაწვნენ შენობაში შეკრებილებს, რა დროსაც აივნის მოაჯირმა ვერ გაუძლო და ჩამოინგრა.

ჭყონდიდის ეპარქიაში ხალხმრავლობისა და დაპირისპირების მიზეზი ახლად დანიშნული მიტროპოლიტი გახდა.

მიტროპოლიტ სტეფანეს ჭყონდიდის ეპარქიის სამღვდელოების ნაწილი და ასევე მრევლის ნაწილი უნდობლობას უცხადებს. ისინი ძველი მიტროპოლიტის, მეუფე პეტრეს მხარდამჭერები არიან. მეუფე პეტრე ამ თანამდებობიდან პატრიარქთან, ილია მეორესთან დაპირისპირების შემდეგ გაათავისუფლეს.

რამდენიმე მღვდელმა უარი თქვა მეუფე სტეფანესთან მსახურებაზე, პასუხად სტეფანემ მათ საერთოდ აუკრძალა წირვის ჩატარება.

მრევლის ნაწილი მოითხოვს, რომ მიტროპოლიტმა სტეფანემ სასწრაფოდ დატოვოს ეპარქია.