სომხეთ-აზერბაიჯანის საზღვარზე ზავის რეჟიმი დაირღვა - ბრძოლა გრძელდება
16 ივლისის ღამეს, სომხეთ-აზერბაიჯანის საზღვარზე, სიმშვიდე ისევ არ არის. მიუხედავად იმისა, რომ გუშინ, ორი ქვეყნის თავდაცვის სამინისტროებმა შედარებით მშვიდი ვითარების შესახებ განაცხადეს, უკვე დილით ცნობილი გახდა, რომ საბრძოლო მოქმედებები განახლდა.
სომხეთ-აზერბაიჯანის საზღვარზე არსებული ვითარების ყველა დეტალი, ესკალაციის დაწყებიდან მეხუთე დღეს.
● სომხეთისა და აზერბაიჯანის საზღვარზე, ორმხრივი სროლების მეოთხე დღეს ვითარება დამშვიდდა
ინფორმაცია ერევნიდან
„დაახლოებით, ღამის 03:40 საათზე, სომხეთის შეიარაღებული ძალების პოსტებზე მყოფმა მორიგეებმა მოწინააღმდეგის გადაადგილება შენიშნეს. წრიულ დაცვაზე გადასვლით, სომხურმა ქვედანაყოფებმა აღკვეთეს მოწინააღმდეგის დივერსიული შემოჭრის მცდელობა. ინტენსიური ბრძოლების შემდეგ, მტერმა, რომელმაც ზარალი განიცადა, უკან დაიხია“, – სომხეთის თავდაცვის სამინისტროს პრესმდივნის ასეთი შეტყობინებით დაიწყო 16 ივლისის დილა.
შუშან სტეპანიანმა Facebook-ის საკუთარ გვერდზე ასევე დაწერა, რომ 05:20 საათზე, აზერბაიჯანულმა ქვედანაყოფებმა ცეცხლი გახსნეს საზღვრისპირა სოფლების, აიგეპარისა და მოვსესის მიმართულებით, რისთვისაც Д-30 ტიპის „ჰაუბიცები“ გამოიყენეს. სომხეთის მხრიდან, სამხედრო მოსამსახურეებს შორის ახალი მსხვერპლი არ არის.
მოგვიანებით გავრცელდა ინფორმაცია იმის შესახებ, რომ ღამით, ტავუშში, სომხურ პოზიციებს აზერბაიჯანული სპეცრაზმის, „იაშმას“ 100-კაციანი დანაყოფი უტევდა, არტილერიის მხარდაჭერით. ბრძოლის მიმდინარეობისას, სომეხმა სამხედროებმა მოწინააღმდეგის ტანკი ააფეთქეს.
აზერბაიჯანული მხრიდან დივერსიის მცდელობა დაადასტურა ტავუშის პროვინციის გუბერნატორმა, აიკ ჩობანიანმა. მან Facebook-ის საკუთარ გვერდზე დაწერა:
„ძვირფასო ტავუშელებო, გთხოვთ, გამოიჩინოთ უკიდურესი სიფრთხილე და თავი შეაფარეთ სამალავებს“.
დილის 10 საათისთვის, სომხეთის თავდაცვის სამინისტროს ყოფილმა პრესმდივანმა, არცრუნ ოვანისიანმა, რომელიც ახლა ტავუშის პროვინციაში, ერთიანი საინფორმაციო ცენტრის შექმნას უწევს კოორდინირებას, განაცხადა, რომ საზღვარზე დაძაბულობამ იკლო.
„მოწინააღმდეგეს, ნამდვილად ჰყავს მსხვერპლი“, – დაწერა ოვანისიანმა Facebook-ის საკუთარ გვერდზე.
ჩამოგდებული დრონის შესახებ ინფორმაციის უარყოფა
სომხეთის თავდაცვის სამინისტრო უარყოფს აზერბაიჯანის შეიარაღებული ძალების მიერ გავრცელებულ ინფორმაციას, ჩამოგდებული დრონის, Х-55-ის შესახებ.
„სომხეთის შეიარაღებულ ძალებში, მსგავსი მოდელის დრონი არ გამოიყენება. მოწინააღმდეგე ასე ცდილობს საკუთარი დანაკარგების გადაფარვას“, – დაწერა Facebook-ის საკუთარ გვერდზე, თავდაცვის სამინისტროს პრესმდივანმა შუშან სტეპანიანმა.
ომბუდსმენი: „სამიზნის ქვეშ არის მშვიდობიანი მოსახლეობა“
სომხეთის ომბუდსმენმა, არმან ტატოიანმა გამოაქვეყნა იმ ჭურვებისა და ნამსხვრევების ფოტოები, რომლებიც დასახლებულ პუნქტებს დაეცა.
„არსებობს ყველა მონაცემი, რომელიც ადასტურებს დასახლებულ პუნქტებზე განხორციელებულ მიზანმიმართულ ცეცხლს. ჩამოვარდნილი ჭურვები წვრილ ნაწილებად იშლება, რომელთაგან ნებისმიერს შეუძლია მოკლას ან დაასახიჩროს ადამიანი. მე აღარ ვლაპარაკობ ზარალზე, რომელიც ადამიანების ქონებასა და სახლებს მიადგა“, – განაცხადა სახალხო დამცველმა.
დღისით, ტავუშის პროვინციის გუბერნატორმა განაცხადა, რომ მშვიდობიან მოსახლეობას შორის დაჭრილები და დაღუპულები არ არიან.
დღის მეორე ნახევარში, სამხედრო ექსპერტმა, არცრუნ ოვანისიანმა განაცხადა, რომ „აზერბაიჯანული უპილოტო თვითმფრინავის დარტყმის შედეგად, დაიჭრა სოფელ ჩინარის მცხოვრები, არამაის ოვაკიმიანი“.
სომხეთის პრემიერ-მინისტრმა უკვე დაავალა შესაბამის სამსახურებს მატერიალური ზარალის შეფასება, რომელიც აზერბაიჯანის მხრიდან გახსნილმა ცეცხლმა საზღვრისპირა დასახლებულ პუნქტებს მიაყენა.
სომხური მხარის განცხადება
დღისით, სომხეთის თავდაცვის სამინისტროს პრესმდივანმა Facebook-ის საკუთარ გვერდზე დაწერა:
„აზერბაიჯანის შეიარაღებული ძალების მხრიდან ცეცხლის შეწყვეტისა და შესაბამისი ხელსაყრელი პირობების შექმნის შემთხვევაში, სომხური მხარე მზად არის, დაუშვას საბრძოლო მოქმედებების ადგილას საძიებო სამუშაოები, რათა მოხდეს ბრძოლის ველიდან დაღუპულთა და დაჭრილთა გაყვანა“.
დღის მეორე ნახევარში, მან სოციალურ ქსელებში კიდევ ერთხელ დაწერა, რომ აზერბაიჯანი, რომელმაც დაარღვია ცეცხლის შეწყვეტის შესახებ შეთანხმება, კვლავ იყენებს მოიერიშე უპილოტო თვითმფრინავებს, მათ შორის, დასახლებული პუნქტების მიმართულებით:
„ვაფრთხილებთ: შეიძლება, მკვეთრად გაიზარდოს აზერბაიჯანელთა დილის ზარალი“.
ინფორმაცია ბაქოდან
აზერბაიჯან-სომხეთის საზღვარზე, შედარებით მშვიდი ღამის შემდეგ, დღეს დილით, კვლავ განახლდა აქტიური საბრძოლო მოქმედებები ორივე მხრიდან.
აზერბაიჯანის თავდაცვის სამინისტრომ განაცხადა, რომ თოვუზის რაიონში, აზერბაიჯანის არმიის პოზიციების თავზე აღმოაჩინეს და გაანადგურეს სომხეთის არმიის ტაქტიკური უპილოტო თვითმფრინავი Х-55. საფრენი აპარატი სადაზვერვო გაფრენის განხორციელებას ცდილობდა.
ამის პარალელურად, ქვეყნის სამხედრო უწყებამ უარყო მოწინააღმდეგის მიერ გავრცელებული ინფორმაცია, აზერბაიჯანული არმიის აფეთქებული ტანკისა და ჩამოგდებული 13 უპილოტო თვითმფრინავის შესახებ.
მინგეჩაურის წყალსაცავზე სომხური ძალების შესაძლო თავდასხმის შესახებ ჟურნალისტების მიერ დასმული კითხვის საპასუხოდ, აზერბაიჯანის თავდაცვის სამინისტროს პრესსამსახურის უფროსმა, ვაგიფ დარგიახლიმ ხმამაღალი განცხადება გააკეთა. მან სიტყვასიტყვით შემდეგი რამ თქვა: „სომხეთმა არ უნდა დაივიწყოს, რომ უახლეს სარაკეტო სისტემებს, რომელიც აზერბაიჯანის შეიარაღებული ძალების განკარგულებაშია, თავისუფლად შეუძლია დარტყმა მიაყენოს მეწამორის ატომურ ელექტროსადგურს, რაც სომხეთისთვის კატასტროფა იქნება“.
პოლკოვნიკმა ასევე დასძინა, რომ რელიეფი, რომელზეც მინგეჩაურის წყალსაცავი მდებარეობს, ამ ობიექტზე ჩატარებული გამაგრებითი სამუშაოები, ასევე, აზერბაიჯანის არმიის შეიარაღებაში არსებული საჰაერო თავდაცვის სისტემები, არ მისცემს მოწინააღმდეგეს ამ სტრატეგიულ ობიექტზე დარტყმის შესაძლებლობას.
ბრძოლების მიმდინარეობისას, დაიღუპა აზერბაიჯანის არმიის ჯარისკაცი, ნაზიმ ისმაილოვი. ის მეთორმეტე აზერბაიჯანელი სამხედრო მოსამსახურეა, რომელიც სომხეთის საზღვართან ბრძოლას ემსხვერპლა.
