რაიან ჰარისი: აშშ იდგება უკრაინისა და საქართველოს გვერდით
აშშ იდგება უკრაინისა და საქართველოს გვერდით
აშშ–ის ელჩის მოვალეობის შემსრულებელმა რაიან ჰარისმა სპეციალური მიმართვა გაავრცელა, სადაც ამბობს, რომ აშშ–მ ზუსტად არ იცის როგორ განვითარდება მოვლენები უკრაინაში, თუმცა უშვებენ, რომ რუსეთი შეეცდება თავდასხმისთვის საბაბის შექმნას. ჰარისის თქმით, ქართველები რუსეთს კარგად იცნობენ და მათთვის რუსეთის აგრესია ახალი არ არის.
რაიან ჰარისმა ხაზი გაუსვა იმას, რომ აშშ უკრაინის და საქართველოს გვერდით იდგება. ასევე, ელჩის მოვალეობის შემსრულებლის თქმით, აშშ დიპლომატიის გზას ირჩევს და რუსეთსაც მოუწოდებს დეესკალაციისკენ.
“ამ კვირის დასაწყისში, რუსეთის ოფიციალურმა პირებმა თქვეს, რომ ისინი სიტუაციის დეესკალაციას და სამხედრო ძალების გაყვანას აპირებდნენ. სამწუხაროდ, რუსეთის ქმედებები არ შეესაბამება მათ სიტყვებს. ქართველებმა ყველაზე კარგად იცით რუსეთის ცარიელი დაპირებების შესახებ. ეს საკუთარმა ისტორიამ გასწავლათ 1801 წელს 1921 წელს და 2008 წელს“, – ამბობს ჰარისი.
● უკრაინა, აშშ, რუსეთი, ირანი, ტაივანი: მსოფლიო ჯერარნახული კრიზისის წინაშე?
● ემზადება თუ არა რუსეთი უკრაინაში შესაჭრელად? სცენარები და დასკვნები
● კომენტარი ბაქოდან: თურქეთისა და აზერბაიჯანის ალიანსი, ნატო და რუსეთი
იგი გვახსენებს სახელმწიფო მდივნის, ენტონი ბლინკენის სიტყვებს, რომელმაც თქვა, რომ “მოქმედებები სიტყვებზე ხმამაღლა მეტყველებს”. ჰარისის თქმით, ახლა მზადყოფნაშია რუსული ძალების 150 000 სამხედრო მძიმე შეიარაღებით და დამხმარე ტექნიკით, რომელსაც უკრაინაში სწრაფად შეჭრა შეუძლია:
“რუსეთი აცხადებს, რომ ეძებს მშვიდობიან გამოსავალს, თუმცა რუსეთმა ეს კონკრეტული მოქმედებებით უნდა დაადასტუროს. უკრაინელებმა, როგორც ქართველებმა, ევრო–ატლანტიკურ საზოგადოებასთან კავშირის გამყარება აირჩიეს. არცერთ ქვეყანას არ აქვს უფლება, ხელი შეუშალოს მათ გზას, მათი მომავლისკენ.”
მისი განმარტებით, თუ რუსეთი არაფრად ჩააგდებს აშშ-ს დიპლომატიურ მცდელობებს და ისევ შეიჭრება უკრაინაში, ეს იქნება ომის არჩევანი. თუ რუსეთი ამ არჩევანს გააკეთებს, აშშ–ისა და მისი პარტნიორების პასუხი იქნება მკვეთრი და გადამწყვეტი.
“ჩვენ არ ვირჩევთ დაპირისპირებას, ჩვენ გვირჩევნია, რომ ვიმუშაოთ ერთად, რათა ვებრძოლოთ გლობალურ პანდემიას და სხვა მრავალ გადაუდებელ საერთო პრობლემას. დიპლომატია არის ერთადერთი გონივრული გზა ამ კონფლიქტის მოსაგვარებლად. ჩვენ მტკიცედ და ერთად ვდგავართ რუსეთის აგრესიის წინააღმდეგ.” – ამბობს რაიან ჰარისი.
● აღიარებს თუ არა პუტინი „სახალხო რესპუბლიკებს“ უკრაინაში?
● რა შუაშია აქ ფინეთი? საიდუმლო და ღია დიპლომატია უკრაინის გარშემო
რაიან ჰარკერ ჰარისი აშშ-ის დიპლომატიური სამსახურის მრჩევლის რანგის კარიერული დიპლომატია, რომელიც ამჟამად საქართველოში, აშშ-ის ელჩის, კელი დეგნანის მოადგილე და დროებით მისი მოვალეობის შემსრულებელია.
ჰარისი მსახურობდა სახალხო დიპლომატიის პოლიტიკის, ეკონომიკისა და საკონსულო თანამდებობებზე აშშ-ის საელჩოებში ესპანეთში, სერბეთში, ავღანეთში, პაკისტანში, გვატემალასა და სომხეთში; ასევე, აშშ-ის საკონსულოში რუსეთში.
სომხეთში ყოფნისას 2003-2005 წლებში, იგი მივლინებით ხშირად სტუმრობდა საქართველოს აშშ-ის დიპლომატიური მისიის საქმიანობის მხარდასაჭერად “ვარდების რევოლუციის” დროს და მის შემდგომ.
2011-2012 წლებში ის მსახურობდა ვაშინგტონში, თეთრი სახლის ეროვნული უსაფრთხოების საბჭოს ევროპის საკითხების დირექტორად მაშინდელი პრეზიდენტის, ობამასა და ვიცე-პრეზიდენტ ჯო ბაიდენის მმართველობის პერიოდში; მის პასუხისმგებლობაში შედიოდა კავკასია და სამხრეთ ევროპის ექვსი ქვეყანა. 2010-2011 წლებში კი მსახურობდა ევროპისა და ევრაზიის საკითხებში სახელმწიფო მდივნის მოადგილის სპეციალურ თანაშემწედ.