არასამთავრობოები: საქართველოს სპეცსამსახურები რუსული გავლენების გასანეიტრალებლად არ მოქმედებენ

არასამთავრობოები ოთარ ფარცხალაძის სანქცირებაზე

საქართველოს არასამთავრობო ორგანიზაციები აშშ-ს მიერ ოთარ ფარცხალაძის სანქცირებასთან დაკავშირებით განცხადებას ავრცელებენ და ამბობენ, რომ საქართველოს სპეცსამსახურები რუსული გავლენების გასანეიტრალებლად არ მოქმედებენ.

როგორც არასამთავრობო ორგანიზაციები აღნიშნავენ, ისინი შეშფოთებული არიან იმ ფაქტით, რომ ყოფილი მთავარი პროკურორის რუსულ სპეცსამსახურებთან კავშირი ქართულმა საზოგადოებამ აშშ-ს სახელმწიფო დეპარტამენტისგან გაიგო და არა საქართველოს სახელმწიფო უსაფრთხოების სამსახურისგან.

მათივე განმარტებით, მნიშვნელოვანია, რომ პარლამენტმა გამოიყენოს ყველა საკონტროლო მექანიზმი. განცხადებაში ასევე წერია, რომ სახელმწიფო უსაფრთხოების სამსახურის უფროსმა საქართველოს უსაფრთხოებასთან დაკავშირებულ ყველა კითხვას უნდა გასცეს პასუხი და სუს-მა საზოგადოებას უნდა განუმარტოს, რა კეთდება მათი მხრიდან ქვეყანაში რუსული სპეცსამსახურების გავლენების შესამცირებლად.

დღეს, როგორც არასოდეს, აშკარაა, რომ საქართველოს სპეცსამსახურები არაეფექტიანი არიან ოკუპანტი სახელმწიფოს, რუსეთის გავლენების წინააღმდეგ ბრძოლაში და საჭიროებენ სერიოზულ რეფორმირებას, მათ შორის ეროვნული უსაფრთხოების სექტორში დემოკრატიული კონტროლის ქმედითი მექანიზმების დანერგვას

NGO–ები ასევე ხაზს უსვამენ, რომ “დღეს, როგორც არასდროს”, აშკარაა, რომ საქართველოს სპეცსამსახურები არაეფექტიანი არიან “ოკუპანტი სახელმწიფოს, რუსეთის გავლენების წინააღმდეგ ბრძოლაში და საჭიროებენ სერიოზულ რეფორმირებას,” მათ შორის ეროვნული უსაფრთხოების სექტორში დემოკრატიული კონტროლის ქმედითი მექანიზმების დანერგვას.

“რთულად დასაჯერებელია, რომ საქართველოს სახელმწიფოს უსაფრთხოების უზრუნველყოფაზე პასუხისმგებელ შესაბამის სამსახურებს ამის შესახებ ცნობები არ ჰქონდათ.

მიუხედავად იმისა, რომ სანქცირების შესახებ ინფორმაცია ცნობილი რამდენიმე დღის წინ გახდა, სახელმწიფო უსაფრთხოების სამსახურს ამ ფაქტზე ეფექტიანი რეაგირება ჯერ არ მოუხდენია, რაც, სავარაუდოდ, ფარცხალაძის გავლენებს უკავშირდება.” – აღნიშნულია განცხადებაში.

● საქართველოს პრეზიდენტი: ყველაზე დიდი უბედურებაა, როცა ქვეყანაში გენერალური პროკურორი „ეფესბეს“ აგენტი ყოფილა
● ოთარ ფარცხალაძეს ქართულმა ბანკებმა ყველა ანგარიში გაუყინეს
● უკრაინა ბიძინა ივანიშვილის და მისი გარემოცვის სანქცირებას ითხოვს

14 სექტემბერს ოთარ ფარცხალაძეს ამერიკის შეერთებულმა შტატებმა სანქციები დაუწესა. სანქციების დაწესება ოთარ ფარცხალაძის ბიზნესსაქმიანობას და რუსულ “ეფესბესთან” თანამშრომლობას უკავშირდება. პაკეტის ოფიციალურად გამოცხადებამდე, მედიაში გავრცელდა ინფორმაცია, რომ სანქცირებულთა შორის იყო “ქართველი-რუსი ოლიგარქი”.

აშშ-ის სახელმწიფო დეპარტამენტის ინფორმაციით, რუსეთის უშიშროების ფედერალური სამსახური [“ეფესბე”] ოთარ ფარცხალაძესთან მუშაობდა, რათა მას გავლენა მოეხდინა ქართულ საზოგადოებასა და პოლიტიკაზე რუსეთის სასარგებლოდ.

გარდა ამისა, აშშ-ს სახელმწიფო დეპარტამენტის განცხადებაში ნათქვამია, რომ ფარცხალაძის გარდა, სანქციები დაუწესდა რუსეთის დაზვერვის სამსახურის ოფიცერს, ალექსანდრ ონიშჩენკოს. რომელიც, სავარაუდოდ, “თავის თანამზრახველ ფარცხალაძეს რუსული პასპორტის და, შესაძლოა, რუსეთის მოქალაქეობის მოპოვებაში” დაეხმარა. 

18 სექტემბერს ცნობილი გახდა, რომ საქართველოს ეროვნულმა ბანკმა ყოფილ გენერალურ პროკურორს და აშშ-ს მიერ სანქცირებულ ოთარ ფარცხალაძეს საბანკო აქტივებზე წვდომა და ფინანსური ტრანზაქციების შესრულება შეეზღუდა. მას ყველა ანგარიში გაუყინეს.

როგორც ეროვნულ ბანკში განმარტავენ, სანქცირებულ პირს ეზღუდება როგორც სახსრების განკარგვა, ისე ყველა სახის ფინანსური ოპერაციის განხორციელების შესაძლებლობა.