ამირან გამყრელიძე საქართველოში კორონავირუსის მესამე ტალღას პროგნოზირებს

საქართველოს დაავადებათა კონტროლის ეროვნული ცენტრის დირექტორმა, ამირან გამყრელიძემ, ქვეყნის მოსახლეობა კორონავირუსის ფართომასშტაბიანი გავრცელების და შესაძლო მესამე ტალღის შესახებ გააფრთხილა.

მისი თქმით, ამჟამინდელი ვითარება 2020 წლის სექტემბრის მსგავსია, როდესაც ქვეყნის სხვადასხვა კუთხეში მრავალი კლასტერის გაჩენამ გამოიწვია კორონავირუსის ახალი აფეთქება.

“დაიწყო ე.წ კლასტერული გავრცელება, ჩამოყალიბებული კლასტერები გვაქვს გურიაში, სამეგრელოსა და შიდა ქართლში. ეს ნიშანია იმისა, რომ შესაძლებელია, დაიწყოს საყოველთაო გავრცელება ქვეყანაში. შეიმჩნევა ეპიდვითარების გაუარესება და საზოგადოებას უნდა ვუთხრათ, რომ მოსალოდნელია მესამე ტალღა, რამაც შეიძლება დაგვაბრუნოს ნოემბერ-დეკემბრის ვითარებაში”. – განაცხადა გამყრელიძემ.

კორონავირუსის შემთხვევების ზრდის გამო, უსაფრთხოების ზომები გამკაცრდა კასპის, ზუგდიდის, ოზურგეთისა და ლანჩხუთის მუნიციპალიტეტების ზოგიერთ სოფელში. ამ სოფლების შესასვლელებსა და გასასვლელებში მობილიზებულია პოლიციის ქვედანაყოფები, რომლებიც მოსახლეობას თერმოსკრინიგნს უტარებენ. პარალელურად, ადგილობრივ მაცხოვრებლებს უტარდებათ მასობრივი ტესტირებაც.

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დაფიქსირდა. მთელი ამ დროის განმავლობაში ქვეყანაში 283 833 ადამიანი დაინფიცირდა, 274 599 პაციენტი გამოჯანმრთელდა, 3 811 კი გარდაიცვალა.

________________________________

● 30 მარტიდან საქართველოში “ფაიზერის” ვაქცინით აცრა დაიწყო
● NDI: საქართველოში გამოკითხულთა 53 პროცენტი კორონავირუსის აცრას არ გაიკეთებდა
● საპატრიარქო არ ჩაერთვება ვაქცინაციის პროპაგანდაში – ჯანდაცვის მინისტრი პატრიარქს შეხვდა