აფხაზეთში პოლიციის მიერ დაკავებული 25 წლის ახალგაზრდის დაღუპვის გამოძიებას მოითხოვენ
აფხაზეთში პოლიციაში დაკავებული გარდაიცვალა
აფხაზეთში პოლიციის მიერ დაკავებული ახალგაზრდა მამაკაცი საავადმყოფოში აღმოჩნდა და გარდაიცვალა. გარდაცვლილის ოჯახი ირწმუნება, რომ პოლიციელებმა იგი თვითმკვლელობის მცდელობამდე მიიყვანეს. ომბუდსმენი დაკავებულთა მიმართ ძალადობის ამ და სხვა შემთხვევების გამოძიებას მოითხოვს.
25 წლის ანრი ატეიბა 7 აგვისტოს პოლიციის თანამშრომლების მიმართ ძალადობის გამოყენების ბრალდებით დააკავეს და დროებითი მოთავსების იზოლატორში მოათავსეს.
- ახრა ავიძბას აფხაზეთში სახელმწიფო გადატრიალების მცდელობაში ადანაშაულებენ
- მოსაზრება: „კრიმინალური აფხაზეთი – როგორ მივიღეთ ის?“
დაპატიმრებიდან მეორე დღეს, ადვოკატმა იგორ სკნარინმა, რომელიც ატეიბას ინტერესებს იცავდა, პროკურატურას განცხადებით მიმართა იმის შესახებ, რომ რომ მის კლიენტს სხეულზე მრავლობითი დაზიანებები ჰქონდა. მან სასამართლო ექსპერტიზის ჩატარება მოითხოვა, რადგანაც მიაჩნდა, რომ დაზიანებები პოლიციის თანამშრომლებმა მიაყენეს.
![](https://jam-news.net/app/uploads/2021/09/242155511_552518402691141_4979640276043013281_n.jpeg)
ახლა გენერალური პროკურატურა აცხადებს, რომ სასამართლო ექსპერტის მიერ ეჭვმიტანილ ატეიბას დათვალიერების შედეგად მის სხეულზე დაზიანებები არ აღმოჩნდა .
თუმცა, ოთხი დღის შემდეგ, ანუ 12 აგვისტოს, ატეიბამ იზოლირებულ საკანში თვითმკვლელობა სცადა. უგონო მდგომარეობაში, იგი იმავე დღეს გაგრას საავადმყოფოს რეაინმაციის განყოფილებაში, შემდეგ კი მძიმე მდგომარეობის გამო (1-2 ხარისხის კომა) სოხუმის რესპუბლიკურ საავადმყოფოში გადაიყვანეს. იქიდან იგი საქართველოში გადაიყვანეს, სადაც ანრი ატეიბა 14 სექტემბერს გარდაიცვალა ისე, რომ გონზე არ მოსულა.
გარდაცვლილის დედა ირწმუნება, რომ მისი შვილი დროებითი მოთავსების იზოლატორში ყოფნისას გაგრელმა პოლიციელებმა თვითმკვლელობამდე მიიყვანეს.
ატეიბას გარდაცვალების ფაქტზე გენერალურმა პროკურატურამ წინასაგამოძიებო მოკვლევა დაიწყო.
აფხაზეთის ადამიანის უფლებათა რწმუნებული ასიდა შაკრილი არაერთხელ მიუთითებდა ძალადობის ფაქტებზე თავისუფლების აღკვეთის ადგილებში. იმავე გაგრის მილიციაში, რამდენიმე პოლიციელი თანამდებობიდან გაათავისუფლეს რუსი ტურისტის არტიომ რუსკიხის ცემასთან დაკავშირებით.
რუსი ტურისტი აპრილში ცემეს, სისხლის სამართლის საქმე კი მხოლოდ ხუთი თვის შემდეგ აღიძრა მას შემდეგ, რაც მომხდარი ინციდენტი მედიაში გაშუქდა. თუმცა, ამ ცემის ყველა მონაწილე ჯერ არ არის გამოვლენილი.
ბრალდებული მხოლოდ სამია – კრიმინალური საგამოძიებო განყუოფილების უფროსი, კაპიტანი ჰაჯარატ ბაღათელია და ორი ოპერმუშაკი.
აფხაზეთის შინაგან საქმეთა მინისტრმა დიმიტრი დბარმა გაგრელი პოლიციელები სამსახურიდან გაათავისუფლა. და სულ ეს იყო. მინისტრის მხრიდან რაიმე ოფიციალური განცხადება ან ბოდიში არ ყოფილა.
”გამოვთქვამ იმედს, რომ სამართალდამცავები, რომლებსაც ატეიბას გარდაცვალებაში და პატიმრობის ადგილებში სხვა მსგავს ძალადობის ფაქტებში ბრალი მიუძღვით, დაისჯებიან. ამავდროულად, მივმართავ ხელისუფლებას, დაუყოვნებლივ მიიღოს ყველა აუცილებელი ზომა სამართალდამცავი ორგანოების მხრიდან ძალადობის აღსაკვეთად “, – ნათქვამია ომბუდსმენის წერილში გენერალურ პროკურორს.
ფოტოები მთავარ გვერდზე: Hennie Stander, unsplash.com
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო