აფხაზეთის ხელისუფლებასა და ოპოზიციას ორივეს ცალ-ცალკე უყვარს რუსეთი
უკრაინაში რუსეთის სამხედრო ოპერაციის მხარდაჭერა აფხაზეთში
უკრაინაში რუსეთის მოქმედებებს, აფხაზეთში მხარს უჭერს როგორც ხელისუფლება, ისე ოპოზიცია. ეს მხარდაჭერა შიდაპოლიტიკური ბრძოლის ელემენტად იქცა – ოპოზიცია ხელისუფლებისგან მის კიდევ უფრო აქტიურად გამოხატვას მოითხოვს. მიუხედავად მცდელობისა, ჩაეტარებინა საერთო-ეროვნული მიტინგი თავისი სტრატეგიული პარტნიორის ქმედებების გასამართლებლად, აფხაზეთის პოლიტიკურ ელიტას ეს არ გამოუვიდა.
უკრაინაში სამხედრო კონფლიქტის დასაწყისიდანვე, ოპოზიცია პრეზიდენტ ასლან ბჟანიას სთავაზობდა, ჩაეტარებინათ ერთობლივი აქცია მოსკოვის მოქმედებების მხარდასაჭერად.
და თუმცა, აფხაზეთის ხელისუფლებასა და ოპოზიციას ამ კონფლიქტის შეფასებაში შეუთანხმებლობა არ აქვს – ორივე მხარე უპირობოდ ამართლებს „სამხედრო ოპერაციას“, ამის მიუხედავად, ამ განზრახვიდან არაფერი გამოვიდა.
პრეზიდენტმა არანაირი რეაგირება არ მოახდინა ოპოზიციის წინადადებაზე, ამ უკანასკნელმა კი თავის მხრივ მიტინგის დამოუკიდებლად გამართვა არ მოისურვა.
„საქართველოში ხელისუფლება დუმს, ოპოზიცია კი უკრაინის მხარდამჭერ მიტინგებს მართავს. ხოლო აფხაზეთში ხელისუფლება დუმს, რუსეთის მხარდამჭერი მიტინგები კი ოპოზიციამ უნდა გამართოს? ეს არასწორია.
ამ საკითხში ვალდებული ვართ ერთიანობა გამოვიჩინოთ. ამიტომ, ვლაპარაკობთ საერთო-ეროვნულ ღონისძიებაზე. რათა არავის და განსაკუთრებით საქართველოს ეჭვი არ შეეპაროს, რომ საგარეო პოლიტიკის საკითხებში აფხაზი ხალხი ერთიანია, როგორც შეკრული მუშტი. ეს ძალიან მნიშვნელოვანია იმის გათვალისწინებით, რაც ხდება და რაც მოხდება მსოფლიოში და კერძოდ, ჩვენს რეგიონში“, – განაცხადა 7 მარტს ოპოზიციის ლიდერმა ადგურ არძინბამ ტელეგრამ-არხ „რესპუბლიკასთან“ ინტერვიუში, არშემდგარ მიტინგთან დაკავშირებული სიტუაციის კომენტირებისას.
თუმცა, რამდენიმე საათის შემდეგ, გუდაუთაში, პარლამენტის დეპუტატობის შვიდმა კანდიდატმა (სახალხო კრების არჩევნები მაჟორიტარული სისტემით 12 მარტს ჩატარდება), რომლებმაც საკუთარი თავი „მოქმედი ხელისუფლების მხარდამჭერებად“ წარმოადგინეს, გამართეს აქცია უკრაინის ტერიტორიაზე რუსეთის შეიარაღებული ძალების სპეცოპერაციის და ლსრ/დსრ-ის დამოუკიდებლობის ცნობის მხარდასაჭერად.
„ყოველთვის მეჯავრებოდნენ მლიქვნელები. ჩვენი ხელისუფლების მხარდაჭერის „ხარისხი“ სტრატეგიული მოკავშირის მიმართ, დამოუკიდებულია მათ ლოიალობაზე მათდამი, როგორც ხელისუფლებისადმი და სურვილზე, თვალი დახუჭონ მისი ფინანსური დახმარების დატაცებაზე.
რუსეთისა და მისი ხალხის მხარდაჭერა უანგარო უნდა იყოს, ეს არ უნდა გადაიზარდოს პოლიტიკურ შოუსა და ტრიგერის – „ჩვენ უფრო გვიყვარხართ, ვიდრე ჩვენს პოლიტიკურ ოპონენტებს“ – დემონსტრირებაში, არამედ, უფრო მარტივად, გულწრფელად, პატიოსნად და აფხაზეთის შიდაპოლიტიკურ ბრძოლაში ამ აქციის ჩათრევის გარეშე.
და საერთოდაც, ჩემი აზრით, სწორია, როდესაც აფხაზი ხალხი მხარდაჭერას უცხადებს რუსეთის ხალხს მისთვის ასე რთულ პერიოდში. პოლიტიკოსების გარეშე, ისინი მოდიან და მიდიან, ხალხები კი რჩებიან. ასეთი მხარდაჭერა უფრო მტკიცეა და პოლიტიკურ კონიუნქტურაზე არაა დამოკიდებული“, – წერს ფეისბუკის საკუთარ გვერდზე, ცნობილი აფხაზი ბლოგერი თენგიზ ჯოპუა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
