ამერიკის ელჩი: მთავრობისგან ველით, სანქციებს დაემორჩილონ. რუსეთმა ჯარი უნდა გაიყვანოს
ამერიკის ელჩი სანქციებზე
ამერიკის ელჩის, კელი დეგნანის თქმით, საქართველოს ხელისუფლების გადასაწყვეტია, დაუწესებს თუ არა რუსეთს სანქციებს, თუმცა საქართველოს აქვს ვალდებულება, რომ უკვე დაწესებულ საერთაშორისო სანქციებს დაემორჩილოს. ასევე, ელჩის თქმით, სანამ რუსეთი საქართველოს გზებს ან რაიმე სხვას დაპირდება, მანამდე ქვეყნიდან ჯარი უნდა გაიყვანოს – საუბარია ჩეჩნეთისა და საქართველოს დამაკავშირებელი გზის მშენებლობის რუსული გეგმის შესახებ.
15 მარტს, გროზნოში, რუსეთის უშიშროების საბჭოს მდივანი, ნიკოლაი პატრუშევი რამზან კადიროვს შეხვდა, სადაც ითქვა, რომ ჩეჩნეთიდან საქართველოსთან დამაკავშირებელი გზა უნდა აშენდეს. მხარეების თქმით, ეს სტრატეგიული მნიშვნელობის გზა იქნება, რომელსაც უცხოეთიდან ჩეჩნეთში ტვირთბრუნვის გაზრდაში მნიშვნელოვანი როლი ექნება.
2019 წელს რუსეთის პრეზიდენტმა ვლადიმერ პუტინმაც აღნიშნა, რომ ეს მნიშვნელოვანი პროექტია, თუმცა თქვა, რომ მისი განხორციელება ჯერ არ იგეგმებოდა.
ელჩის თქმით, რუსეთის პროექტებისა და დანაპირების გულწრფელობაზე მსჯელობისას არ უნდა დაგვავიწყდეს, რომ ის 2008 წლის შეთანხმებით დაკისრებულ ვალდებულებებს ამ დრომდე არ ასრულებს და არ გაჰყავს ჯარები საქართველოდან.
“თუ გსურთ განსაჯოთ რუსეთის გულწრფელობა ნებისმიერი მისი დაპირებისა თუ განცხადების მიმართ, საკმარისია შეხედოთ თუ რას აკეთებენ იმისათვის, რომ 2008 წლის შეთანხმებით ნაკისრი ვალდებულებები შეასრულონ“, – აცხადებს ელჩი.
კელი დეგნანის თქმით, ამ ეტაპზე მთავარი უკრაინისთვის გაერთიანებული ძალებით მხარდაჭერის ჩვენებაა, რისი შემადგენელი ნაწილიცაა საერთაშორისო სანქციებთან დამორჩილება და ასევე ის, რომ დაწესებულ სანქციებთან თანხვედრა, მათი აღსრულება ყველა იმ ქვეყნის ვალდებულებაა, ვინც რუსეთის აგრესიის წინააღმდეგია. ამ სანქციების არ აღსრულების შემთხვევაში კი დადგება დამრღვევი ქვეყნების პასუხისმგებლობის საკითხი.
დეგნანის განმარტებით, საქართველო ამ კუთხით ყოველთვის კარგი პარტნიორი იყო და თანხვედრაში მოდიოდა თუნდაც ირანისთვის დაწესებულ საერთაშორისო სანქციებთან.
“მნიშვნელოვანია არ ავურიოთ თუ რას ვგულისხმობთ, რაზე ვსაუბრობთ, როცა საერთაშორისო სანქციებთან დამორჩილებაზე ვსაუბრობთ. საქართველო ყოველთვის ემორჩილებოდა ამ სანქციებს. სანქციების დიდი ნაწილი, შესაძლოა, პირდაპირ არ ეხებოდეს საქართველოს“, – აღნიშნა დეგნანმა.
● აბა ომი გინდათ?! – ვინ და რატომ აძლიერებს საქართველოში ომის ბუნებრივ შიშს? ექსპერტების შეფასებები
● ხანგრძლივი ომი, დიპლომატია, გადატრიალება. უკრაინაში ომის ხუთი სცენარი BBC-ის ანალიტიკოსისგან
● ელიან თუ არა საკუთარი ქვეყნიდან გამოქცეულ რუსეთის მოქალაქეებს საქართველოში?
უკრაინაში შეჭრის გამო, მსოფლიოს ბევრმა ქვეყანამ რუსეთს უმკაცრესი ეკონომიკური სანქციები დაუწესა – რუსეთიდან გავიდნენ ცნობილი ბრენდები, მათი თვითმფრინავებისთვის დაიხურა ცა ევროპის თავზე, მოქალაქეებს შეუწყდათ წვდომა საბანკო ანგარიშებზე და ვერ იყენებენ ბარათებს, პუტინთან დაახლოებულ ოლიგარქებს კი დაუყადაღეს ქონება ევროპაში და ჩამოართვეს ძვირადღირებული იახტები. ქვეყანა ამჟამად ეკონომიკური კოლაფსის წინაშე დგას.
თუმცა საქართველო დაწესებულ სანქციებს არ შეუერთდა. მეტიც – რუსეთმა, მოლაპარაკების შედეგად, ქართულ საწარმოებს რძის პროდუქტების ექსპორტის ნება დართო. ამ ინფორმაციამ რუსეთ-უკრაინის ომის და რუსეთის წინააღმდეგ დაწესებული სანქციების კონტექსტში ოპოზიციის და საზოგადოების აღშფოთება გამოიწვია. თბილისმა საყვედური კიევისგანაც მიიღო, სადაც საქართველო-რუსეთის ეკონომიკური ურთიერთობის ამგვარ განვითარებას “ზურგში დანა” უწოდეს.
უკრაინაში რუსული აგრესიის შედეგად 3 მილიონამდე ადამიანი ლტოლვილად იქცა, ხოლო 100-ზე მეტი ბავშვი დაიღუპა.
