საქართველო: იანვარში ყველაზე მეტი ფულადი გზავნილი იტალიიდან და რუსეთიდან შემოვიდა
ფულადი გზავნილები საქართველოში
საქართველოს ეროვნული ბანკი აქვეყნებს მონაცემებს, რომლის მიხედვითაც ირკვევა, რომ 2022 წლის იანვარში ქვეყანაში შემოსული ფულადი გზავნილების მოცულობამ 168.8 მილიონი დოლარი (520 მლნ ლარი) შეადგინა, რაც 12.7 პროცენტით (19 მლნ დოლარი) მეტია გასული წლის ანალოგიური პერიოდის მაჩვენებელზე.
შემოსული გზავნილების 44.2 პროცენტი ევროკავშირის ქვეყნებზე მოდის, 55.7 პროცენტი კი დანარჩენ ქვეყნებზე.
ქვეყნები, საიდანაც იანვარში საქართველოში ყველაზე მეტი თანხა შემოვიდა:
- იტალია – 33 მილიონი დოლარი;
- რუსეთის ფედერაცია – 22 მილიონი დოლარი;
- აშშ – 20 მილიონი დოლარი;
- საბერძნეთი – 16 მილიონი დოლარი;
- ისრაელი – 14 მილიონი დოლარი;
- გერმანია – 8 მილიონი დოლარი;
- ყაზახეთი – 6 მილიონი დოლარი;
- თურქეთი – 6 მილიონი დოლარი;
- უკრაინა – 5 მილიონი დოლარი;
- აზერბაიჯანი – 4 მილიონი დოლარი.
ეროვნული ბანკის მიხედვით, 2022 წლის იანვარში საქართველოდან საზღვარგარეთ 23.3 მილიონი დოლარი გადაიგზავნა, რაც 2021 წლის იანვრის ანალოგიურ მაჩვენებელთან შედარებით 35.3 პროცენტით მეტია. 2021 წლის იანვარში, საქართველოდან სულ 17.2 მლნ დოლარი გაიგზავნა.
![](https://jam-news.net/app/uploads/2022/02/Screen-Shot-2022-02-15-at-18.04.00-1024x534.png)
● სიღარიბე, ინფლაცია, კორონავირუსი. NDI-ს ახალი კვლევის მთავარი მიგნებები და ტენდენციები
● დედა-შვილობა სკაიპით. ათასობით ემიგრანტი ქალი ვერ ხედავს, როგორ იზრდებიან მათი შვილები
● საქართველოში 307 ათას ადამიანს ლომბარდის ვალი აქვს
აღსანიშნავია, რომ გასული წლის აგვისტოში, საქართველოში შემოსული ფულადი გზავნილების წილის მიხედვით, პირველ ადგილზე რუსეთის ფედერაცია იყო ($37.6 მილიონი), მას მოჰყვებოდა იტალია ($33.6 მილიონი) და აშშ ($24.6 მილიონი).
მსოფლიო ბანკის ინფორმაციით, საქართველო ფულად გზავნილებზე დამოკიდებული ქვეყნების რეიტინგში 21-ე ადგილზეა. ამავე რეიტინგში პირველ ადგილს ტონგა იკავებს, რომლის მთლიანი შიდა პროდუქტის (მშპ) 37.2 პროცენტი ფულად გზავნილებზე მოდის; 35.3 პროცენტით მეორე ადგილზე სომალია; მესამე ადგილს კი ყირგიზეთი იკავებს, მისი ეკონომიკის 31.3% ფულად გზავნილებზეა დამოკიდებული.